ଭୁବନେଶ୍ୱର, ୭।୧ (ବନ୍ଦନା ସେଠୀ): ରାଜଧାନୀ ଭୁବନେଶ୍ୱର ସମେତ ସାରା ରାଜ୍ୟରେ ବୁଲା କୁକୁରଙ୍କ ପ୍ରାଦୁର୍ଭାବ ଦିନକୁ ଦିନ ବଢି ଚାଲିଛି। କଲୋନୀ, ଗଳିକନ୍ଦି ସମେତ ରାଜରାସ୍ତାରାରେ ଉତ୍ପାତ କରୁଛନ୍ତି। ଗୋଡ଼ାଇ କାମୁଡୁଛନ୍ତି। ଗାଡ଼ି ଚାଳକ ହୁଅନ୍ତୁ ଅବା ପଥଚାରୀ, କାହାକୁ ଛାଡୁନାହାନ୍ତି। ଆନିମଲ୍ ବାର୍ଥ କଣ୍ଟ୍ରୋଲ (ଏବିସି) ବନ୍ଦ ଥିବାରୁ ଏହି ସମସ୍ୟା ଜଟିଳ ହେବାରେ ଲାଗିଛି। ଏହାକୁ ନେଇ ଜନସାଧାରଣଙ୍କ ମଧ୍ୟରେ ଅସନ୍ତୋଷ ବଢି ଚାଲିଥିବାବେଳେ ଖୁବ୍ଶୀଘ୍ର ଏହାର ସମାଧାନ ହେବା ନେଇ ଆଶା ଦେଖାଦେଇଛି। ଆସନ୍ତା ସୋମବାର ୮ ତାରିଖରେ ହାଇକୋର୍ଟରେ କୁକୁର ବନ୍ଧ୍ୟାକରଣ ମାମଲାର ଶୁଣାଣି ହେବ। ହାଇକୋର୍ଟ ବିଏମ୍ସି ସପକ୍ଷରେ ଅର୍ଥାତ୍ ବନ୍ଧ୍ୟାକରଣ ଉପରେ ଲାଗିଥିବା ଷ୍ଟେ’ ଅର୍ଡର ହଟାଇବାର ଯଥେଷ୍ଟ ସମ୍ଭାବନା ଥିବା ବିଏମ୍ସି ଅଧିକାରୀ କହିଛନ୍ତି। ତେଣୁ ଅନୁମତି ମିଳିବା ପରେ ତୁରନ୍ତ କୁକୁରଙ୍କ ଅସ୍ତ୍ରୋପଚାର କରାଯିବ ଓ କୁକୁରଜନିତ ସମସ୍ୟାରେ କିଛିଟା ସୁଧାର ଆସିବ ବୋଲି ସେ କହିଛନ୍ତି। ସମସ୍ୟା ବଢୁଥିବାରୁ ବିଏମ୍ସି ନିଜ ପକ୍ଷରୁ ଏହି ମାମଲାରେ ହସ୍ତକ୍ଷେପ କରିଥିବାବେଳେ ଅନ୍ୟ କୌଣସି ସହରାଞ୍ଚଳ ବା ମ୍ୟୁନିସିପାଲିଟି ପକ୍ଷରୁ ଏଥିରେ ହସ୍ତକ୍ଷେପ କରାଯାଇଛି କି ନାହିଁ ସେ ନେଇ ସୂଚନା ମିଳିନାହିଁ। ତେଣୁ ଏହି ଶୁଣାଣି ସମଗ୍ର ରାଜ୍ୟରେ ବନ୍ଦ ଥିବା ଏବିସି କାର୍ଯ୍ୟକ୍ରମ ପାଇଁ ଲାଭଦାୟକ ହେବ ନା କେବଳ ଭୁବନେଶ୍ୱର ମହାନଗର ନିଗମ ଅଞ୍ଚଳ ପାଇଁ ହେବ ତାହା ଶୁଣାଣି ଦିନ ଜଣାପଡ଼ିବ।
ଏବିସି କାର୍ଯ୍ୟକ୍ରମ ଠିକ୍ ତଥା ସୁରକ୍ଷିତ ଭାବେ ହେଉ ନ ଥିବା ଅଭିଯୋଗ କରି ହାଇକୋର୍ଟରେ କେସ୍ କରାଯାଇଥିଲା। ଏହାର ଶୁଣାଣି କରି ହାଇକୋର୍ଟ ୨୦୨୨ ଜୁଲାଇ ୧୦ରୁ ସମଗ୍ର ରାଜ୍ୟରେ ଏବିସି କାର୍ଯ୍ୟକ୍ରମ ଉପରେ ରୋକ ଲଗାଇଥିଲେ। ପ୍ରଥମେ ଅଗଷ୍ଟ ୩୧ ଯାଏ ରୋକ୍ ଲଗାଇବା ସହ ରାଜ୍ୟରେ କୌଣସି ପ୍ରକାରର ଏବିସି କାର୍ଯ୍ୟକ୍ରମ ହୋଇପାରିବ ନାହିଁ ବୋଲି ହାଇକୋର୍ଟ ଆଦେଶ ଦେଇଥିଲେ। ମାତ୍ର କୌଣସି କାରଣରୁ ଏହାର ଶୁଣାଣିକୁ ଘୁଞ୍ଚାଇ ଦିଆଯାଇଥିଲା। ଇତି ମଧ୍ୟରେ ୪ମାସରୁ ଅଧିକ ସମୟ ବିତିଯାଇଥିଲେ ବି କେସ୍ଟି ସେପରି ପଡି ରହିଥିବାରୁ କିଛିଦିନ ତଳେ ବିଏମ୍ସି ନିଜ ଆଡୁ ହସ୍ତକ୍ଷେପ କରି ତୁରନ୍ତ ଏହାର ଫଇସଲା କରିବାକୁ ନିବେଦନ କରିଥିଲା। ଫଳସ୍ବରୁପ ସୋମବାର କେସ୍ର ଶୁଣାଣି ହେବା ନେଇ ସୂଚନା ଦିଆଯାଇଛି। ଅପରପକ୍ଷେ ୬ମାସରୁ ଅଧିକ ସମୟ ଧରି କୁକୁରଙ୍କ ବନ୍ଧ୍ୟାକରଣ ବନ୍ଦ ରହିଥିବାରୁ ଏମାନଙ୍କ ସଂଖ୍ୟା ଦ୍ରୁତ ଗତିରେ ବଢି ଚାଲିଛି। ଏକ ଆକଳନ ଅନୁଯାୟୀ ୬ମାସ ତଳେ କୁକୁରଙ୍କ ସଂଖ୍ୟା ୫୦ହଜାରରୁ ଊର୍ଦ୍ଧ୍ୱ ଥିବାବେଳେ ଏବେ ଏହି ସଂଖ୍ୟା ବୃଦ୍ଧି ପାଇ ୬୦ ହଜାର ଡେଇଁଛି। ହେଲେ ବିଏମ୍ସି ଏଯାବତ୍ କୁକୁର ଗଣନା କରିପାରି ନ ଥିବାରୁ ଠିକ୍ ତଥ୍ୟ ଦିଆଯାଇନାହିଁ। ପ୍ରତି ଓ୍ବାର୍ଡ ବୁଲି କେଉଁଠି କେତେ କୁକୁର ଅଛନ୍ତି ତାହାର ଗଣନା କରି ରିପୋର୍ଟ ପ୍ରସ୍ତୁତ କରିବାକୁ ବିଏମ୍ସି ଏକ ସଂସ୍ଥାକୁ ନିଯୁକ୍ତ କରିବା ନେଇ ଯୋଜନା କରିଥିଲା। ମାତ୍ର ସମୟକ୍ରମେ ଏହା ମଧ୍ୟ ନାଲିଫିତା ତଳେ ରହିଯାଇଛି। ସେହିପରି କୁକୁରଙ୍କ ବନ୍ଧ୍ୟାକରଣ ଅସ୍ତ୍ରୋପଚାର ପାଇଁ ବିଏମ୍ସି ସମ୍ପୂର୍ଣ୍ଣ ପ୍ରସ୍ତୁତ ଥିବା କହୁଥିବାବେଳେ ମଞ୍ଚେଶ୍ୱରଠାରେ ନିର୍ମାଣ ହେଉଥିବା ହସ୍ପିଟାଲ ଏଯାଏ କାର୍ଯ୍ୟକ୍ଷମ ହୋଇପାରି ନାହିଁ। ୨୦୨୨ ମେ’ ସୁଦ୍ଧା ଏହି ହସ୍ପିଟାଲ କାର୍ଯ୍ୟକ୍ଷମ ହେବ ବୋଲି ବିଏମ୍ସି ପକ୍ଷରୁ ସୂଚନା ଦିଆଯାଇଥିଲା। ତେଣୁ ବିଏମ୍ସି କିଭଳି ନିଜ ଲକ୍ଷ୍ୟ ପୂରଣ କରି ପାରିବ ସେ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଅପରପକ୍ଷେ ପ୍ରଜନନ ଋତୁ ସମୟରେ କୁକୁରମାନେ ଅଧିକ ହିଂସ୍ର ହେଉଥିବାବେଳେ ଏବେ ଛୁଆଙ୍କ ସୁରକ୍ଷା ନେଇ ଆକ୍ରମଣାତ୍ମକ ହେଉଥିବା ପଶୁପ୍ରେମୀମାନେ ମତ ରଖିଛନ୍ତି।