ଭୁବନେଶ୍ୱର,୨୦।୯ (ବ୍ୟୁରୋ): ଅନ୍ଲାଇନରେ ମଦ ମଗାଇ ଜଣେ ପ୍ରତିଷ୍ଠିତ ଡାକ୍ତର ଠକେଇର ଶିକାର ହୋଇଛନ୍ତି। ସାଇବର ଠକ ଦୁଇଟି ଆକାଉଣ୍ଟରୁ ଦେଢ ଲକ୍ଷ ଟଙ୍କା ଲୁଟି ନେଇଛନ୍ତି। ଏନେଇ ଡାକ୍ତର ଜଣକ ଖଣ୍ଡଗିରି ଥାନାରେ ଅଭିଯୋଗ କରିବା ପରେ ପୋଲିସ ମାମଲା ରୁଜୁ କରି ତଦନ୍ତ କରୁଥିବା ଜଣାପଡିଛି।
ସୂଚନା ଅନୁଯାୟୀ, ଖଣ୍ଡଗିରି ଥାନା ଅଞ୍ଚଳରେ ଥିବା ଏକ ଘରୋଇ ହସ୍ପିଟାଲରେ ଡାକ୍ତର ଜଣକ ଚାକିରି କରିବା ସହ ଉକ୍ତ କ୍ୟାମ୍ପସରେ ରହୁଛନ୍ତି। ସେ ଅନ୍ଲାଇନ୍ରେ ମଦ ମଗାଇବା ପାଇଁ ଗୁଗଲ୍ରେ ସର୍ଚ୍ଚରେ ଦୋକାନ ଖୋଜୁଥିଲେ। ଏହି ସମୟରେ ସାଇବର ଠକମାନେ ଇଣ୍ଟରନେଟ୍ରେ ଛାଡ଼ିଥିବା ଏକ ଜାଲ୍ ମଦ ଦୋକାନ ନମ୍ବର ପାଇ ସେ ସେଥିରେ ଫୋନ୍ କରିଥିଲେ। କଲ୍ ରିସିଭ୍ କରିଥିବା ବ୍ୟକ୍ତିଜଣକ ତାଙ୍କଠାରୁ ଅର୍ଡର ନେବା ପରେ ଗୁଗଲ୍ ପେ’ ମାଧ୍ୟମରେ ୧୪୮୦ ଟଙ୍କା ପେମେଣ୍ଟ କରିବାକୁ କହିଥିଲେ। ସେ ପେମେଣ୍ଟ କରିଥିଲେ ମଧ୍ୟ ନିର୍ଦ୍ଧାରିତ ସମୟ ମଧ୍ୟରେ ମଦ ଘରେ ପହଞ୍ଚତ୍ ନ ଥିଲା। ଡାକ୍ତର ଉକ୍ତ ନମ୍ବରକୁ କଲ୍ କରି ପଚାରିବାରୁ ଅର୍ଡର ବାତିଲ ହୋଇଯାଇଥିବା ଉତ୍ତର ମିଳିଥିଲା। ତେବେ ଟଙ୍କା ଫେରି ପାଇବା ପାଇଁ ସେ କେତେକ ପରାମର୍ଶ ଦେବା ସହ ଡାକ୍ତରଙ୍କ ମୋବାଇଲ୍ ଫୋନ୍କୁ ଏକ କ୍ୟୁଆର କୋଡ୍ ପଠାଇଥିଲେ। ଏହାପରେ ସେ ତାହାକୁ ସ୍କାନ କରିବା ପରେ ତାଙ୍କ ଆକାଉଣ୍ଟରୁ ୧୦ ହଜାର ଟଙ୍କା କଟିଯାଇଥିଲା। ଏହାଦେଖି ଡାକ୍ତର ପୁଣି ଉକ୍ତ ନମ୍ବରକୁ ଫୋନ୍ କରି ଏ ସମ୍ପର୍କରେ ଜଣାଇବା ପରେ ଠକ ଜଣକ ଆଉ ଜଣଙ୍କ ବ୍ୟାଙ୍କ୍ ଆକାଉଣ୍ଟ ନମ୍ବର ଦିଅନ୍ତୁ, ଟଙ୍କା ଫେରି ଆସିବ ବୋଲି କହିଥିଲେ। ଏକଥା ଶୁଣି ଡାକ୍ତର ତାଙ୍କ ସାଙ୍ଗର ଆକାଉଣ୍ଟ ନମ୍ବର ଦେଇଥିଲେ। ଏହାର କିଛି ସମୟ ପରେ ଉକ୍ତ ଆକାଉଣ୍ଟରୁ ମଧ୍ୟ ୫୦ ହଜାର ଟଙ୍କା କଟିଯାଇଥିଲା। ଏହିପରି ଏକାଧିକ ଥରରେ ଡାକ୍ତର ଓ ତାଙ୍କ ସାଙ୍ଗଙ୍କ ଆକାଉଣ୍ଟରୁ ଦେଢ ଲକ୍ଷ ଟଙ୍କା ଲୁଟି ନେଇଥିଲେ ସାଇବର ଠକ। ଶେଷରେ କିଛି ଉପାୟ ନ ପାଇ ସେ ଥାନାର ଦ୍ୱାରସ୍ଥ ହୋଇଥିଲେ।
ସୂଚନାଯୋଗ୍ୟ, ନିକଟରେ ବିଜୁ ପଟ୍ଟନାୟକ ପୋଲିସ ଏକାଡେମୀର ଜଣେ ଇନ୍ସପେକ୍ଟର ଅନ୍ଲାଇନ୍ରେ ଖାଇବାକୁ ମଗାଇ ଠକେଇର ଶିକାର ହୋଇଥିଲେ। ଏହା ପୂର୍ବରୁ ବହୁ ଲୋକଙ୍କଠାରୁ ଲକ୍ଷ ଲକ୍ଷ ଟଙ୍କା ଲୁଟି ନେଇଛନ୍ତି ସାଇବର ଠକ।
