କେନ୍ଦୁଝର,୨୧ା୧(ସ୍ବ.ପ୍ର.): ନିଜ ସହକର୍ମୀଙ୍କ ସହ ଗତ ୩୧ ତାରିଖ ରାତିରେ ଜିରୋ ନାଇଟ୍ ସେଲିବ୍ରେଶନ କରିଥିବା ଡାକ୍ତର ଶୁଭଶ୍ରୀ କରଙ୍କ ମୃତଦେହ ନୂଆବର୍ଷ ଦିନ ନିଜ ବାସଭବନରୁ ବନ୍ଦ୍ କୋଠରିରୁ ଉଦ୍ଧାର କରାଯାଇଥିଲା। ତାଙ୍କର ମୃତ୍ୟୁକୁ ନେଇ ସନ୍ଦେହ ସୃଷ୍ଟି ହୋଇଥିବାବେଳେ ତାଙ୍କର ପୁରୁଷ ବନ୍ଧୁ ଡାକ୍ତର ଦିବ୍ୟରଞ୍ଜନ ମାଝିଙ୍କ ବିରୋଧରେ ପରିବାର ଲୋକ ହତ୍ୟା ଷଡ଼ଯନ୍ତ୍ର ଅଭିଯୋଗ ଆଣିଛନ୍ତି। ଏ ନେଇ ଶୁଭଶ୍ରୀଙ୍କ ବାପା ମନୋରଞ୍ଜନ ଶନିବାର ରାତିରେ ଯୋଡ଼ା ଥାନାରେ ଆଉ ଏକ ଅଭିଯୋଗ କରି ତାଙ୍କ ହତ୍ୟା କରାଯାଇଥିବା ଅଭିଯୋଗ ଆଣିଛନ୍ତି। ଅଭିଯୋଗର ତଦନ୍ତ ହେବ ବୋଲି ଏସ୍ପି ମିତ୍ରଭାନୁ ମହାପାତ୍ର କହିଥିବା ବେଳେ ଏହି ହତ୍ୟା ଷଡ଼ଯନ୍ତ୍ରରେ ଡାକ୍ତର ମାଝିଙ୍କ ସମେତ ଅନ୍ୟ ୩ ଜଣ ଡାକ୍ତର ହତ୍ୟା ସଂପୃକ୍ତ ଥିବା ସନ୍ଦେହ କରି ତାଙ୍କ ବାପା କହିଛନ୍ତି। ଫଳରେ ଶୁଭଶ୍ରୀଙ୍କ ମୃତ୍ୟୁ ଘଟଣା ଭିନ୍ନ ମୋଡ଼ ନେଇଛି। ମଦ ସହିତ କିଛି ନିଶା ବଟିକା ମିଶିଥିବା ତାଙ୍କ ବାପା ଅଭିଯୋଗ କରିଛନ୍ତି। ଯଦିଓ ଡାକ୍ତର ଦିବ୍ୟରଞ୍ଜନ ଓ ଅନ୍ୟମାନେ ଅନୁପସ୍ଥିତ ଥିଲେ ତଥାପି ସେମାନେ ଷଡ଼ଯନ୍ତ୍ର କରି ଥାଇପାରନ୍ତି ବୋଲି ସେ ଅଭିଯୋଗ ଆଣିଛନ୍ତି।
ପ୍ରକାଶ ଯେ, ଡାକ୍ତର ଶୁଭଶ୍ରୀ କେନ୍ଦୁଝର ଜିଲା ଯୋଡ଼ାସ୍ଥିତ ସହରାଞ୍ଚଳ ସ୍ବାସ୍ଥ୍ୟକେନ୍ଦ୍ରରେ ମେଡିକାଲ ଅଫିସର ଭାବେ କାମ କରୁଥିଲେ। ମୃତ୍ୟୁର ୧୦ ଦିନ ପୂର୍ବରୁ ଅର୍ଥାତ୍ ଗତ ଡିସେମ୍ବର ୨୦ରେ ଶୁଭଶ୍ରୀ ଯୋଡ଼ା ଥାନାରେ ଦିବ୍ୟରଞ୍ଜନଙ୍କ ନାମରେ ଏତଲା ଦେଇଥିଲେ। ବିବାହ ପ୍ରତିଶ୍ରୁତି ଦେଇ ଶାରୀରିକ ସମ୍ପର୍କ ରଖିଥିବା ଡାକ୍ତର ଦିବ୍ୟରଞ୍ଜନ ପରେ ବିବାହ ପାଇଁ ମନା କରିଦେବାରୁ ନ୍ୟାୟ ପାଇଁ ଥାନାର ଦ୍ୱାରସ୍ଥ ହୋଇଥିଲେ ଶୁଭଶ୍ରୀ। ଉଭୟଙ୍କ ମଧ୍ୟରେ କିଛି ବର୍ଷ ହେଲା ପ୍ରେମ ସମ୍ପର୍କ ଥିଲା। ବିବାହ ପ୍ରତିଶ୍ରୁତି ଦେଇ ଦିବ୍ୟରଞ୍ଜନ ଶାରୀରିକ ସମ୍ପର୍କ ରଖିବା ପରେ ବାହା ହେବାକୁ ମନା କରୁଛନ୍ତି ବୋଲି ବଡ଼ବିଲ ଜେଏମ୍ଏଫ୍ସି କୋର୍ଟରେ ଶୁଭଶ୍ରୀ ୧୬୪ ସିଆରପିସିରେ ବୟାନ ରେକର୍ଡ ହୋଇଥିଲା। ଏପରିକି ବିବାହ ପାଇଁ ଶୁଭଶ୍ରୀ ଜିଦ୍ ଧରିବା ପରେ ଦିବ୍ୟରଞ୍ଜନ ତାଙ୍କ ଠାରୁ ଦୂରେଇ ଯିବାକୁ ଚେଷ୍ଟା କରିଥିଲେ। ସେଠାରେ ଉଭୟଙ୍କ ମଧ୍ୟରେ ଆପୋଷ ବୁଝାମଣା ହୋଇ ସମାଧାନ ହୋଇ ମାମଲା ଆଗକୁ ବଢ଼ି ନ ଥିଲା। ଠିକ୍ ଏହାର ୧୦ ଦିନ ପରେ ତାଙ୍କ ମୃତଦେହ କ୍ୱାର୍ଟରରୁ ମିଳିବା ପରେ ଏବେ ସନ୍ଦେହ ବଢ଼ିଛି। ଆଶ୍ଚର୍ଯ୍ୟର କଥା ହେଉଛି ଦିବ୍ୟଙ୍କ ନାମରେ ଶୁଭଶ୍ରୀ ଯୋଡ଼ା ଥାନାରେ ଏତଲା ଯେଉଁଦିନ ଦେଇଥିଲେ, ସେହିଦିନ ସେ ନୂଆଗାଁ ଲୌହ ଖଣିର ଡିସ୍ପେନସାରୀରେ ମେଡିକାଲ ଅଫିସର ପଦବୀରୁ ଇସ୍ତଫା ଦେଇ ପଳାଇଛନ୍ତ। ଏଥିରେ ସେ ନିଜ ବାହାଘର ପାଇଁ ଭୁବନେଶ୍ୱର ଯିବେ ବୋଲି ଉଲ୍ଲେଖ କରିଛନ୍ତି। ଏହାପରଠାରୁ ତାଙ୍କ ଫୋନ୍ ସୁଇଚ୍ ଅଫ ରହିଥିବାବେଳେ ସେ ଏବେ କେଉଁଠି ତାହାର ସୂଚନା ନାହିଁ । ଦିବ୍ୟରଞ୍ଜନ କାମ କରୁଥିବା ନୂଆଗାଁ ଆଇରନ ଓର୍ ମାଇନ୍ସକୁ ପୋଲିସର ଏକ ଟିମ୍ ଯାଇ ତଦନ୍ତ କରୁଛନ୍ତି। ଦିବ୍ୟରଞ୍ଜନଙ୍କୁ ଧରିବା ପାଇଁ ପୋଲିସ ଜୋରସୋରରେ ଉଦ୍ୟମ ଆରମ୍ଭ କରିଛି। ଦିବ୍ୟରଞ୍ଜନ ଧରାପଡ଼ିବା ପରେ ଶୁଭଶ୍ରୀଙ୍କ ମୃତ୍ୟୁ ଉପରୁ ପରଦା ହଟିପାରେ ବୋଲି ଆଲୋଚନା ହେଉଛି। ଯୋଡ଼ା ପୋଲିସ ୧/୨୩ରେ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ କରୁଥିବା ବେଳେ ଏଭଳି ଅଭିଯୋଗ ପୋଲିସର ଚିନ୍ତା ବଢ଼ାଇଛି।
