ନୂଆଦିଲ୍ଲୀ: ଯଦି ଆପଣ ଶାହାରୁଖ ଖାନ୍ଙ୍କ ଫିଲ୍ମ ‘ଡର୍’ ଦେଖିଥିବେ, ତେବେ ଆପଣଙ୍କୁ ଏହାର ଗୀତ ‘ତୁ ହାଁ କର୍ ୟା ନାଁ କର୍, ତୁ ହେ ମେରି କିରନ୍’ ମନେ ଥିବ। ସେଭଳି ବିଗ୍ ବି ଅମିତାଭ ବଚ୍ଚନଙ୍କ ଚଳଚ୍ଚିତ୍ର ‘ପିଙ୍କ’ରେ ମଧ୍ୟ ଏକ ଡାଏଲଗ୍ ‘ନୋ ମିନ୍ସ ନୋ/ନା ମାନେ ନା’ ବେଶ ଭାଇରାଲ ହୋଇଥିଲା। ଏହି ଦୁଇ କଥାକୁ ନେଇ ଉତ୍ତରପ୍ରଦେଶ ପୋଲିସ ଏକ ଟୁଇଟ୍ କରିଛି। ଏହା ଏବେ ବେଶ ଭାଇରାଲ ହେଉଛି। ମହିଳାଙ୍କ ସୁରକ୍ଷାକୁ ନେଇ କରାଯାଇଥିବା ଏହି ଭିଡିଓକୁ ଲୋକେ ବେଶ୍ ପସନ୍ଦ ମଧ୍ୟ କରୁଛନ୍ତି।
କଥାଟି ଏପରି। ଆଜିକାଲିର ସମୟରେ ମହିଳାଙ୍କ ଉପରେ ଅତ୍ୟାଚାର ବଢ଼ିବାରେ ଲାଗିଛି। ଏହାକୁ ରୋକିବାକୁ ନେଇ ୟୁପି ପୋଲିସ ନୂଆ ଉପାୟ ଆପଣାଇଛି। ତଦନୁଯାୟୀ ଲୋକଙ୍କ ନିକଟରେ ଭିନ୍ନ ବାର୍ତ୍ତା ପହଞ୍ଚାଯାଇଛି।
ୟୁପି ପୋଲିସ ଟୁଇଟ୍ କରି ଲୋକଙ୍କୁ ‘କିରଣର ନା’ର ଅର୍ଥ କ’ଣ’ ବୋଲି ପଚାରିଥିଲା। ଏଥିସହ ଶେୟାର କରାଯାଇଥିବା ଭିଡିଓରେ ଗୀତ ଏବଂ ଡାଏଲଗ୍ ପରେ ଏକ ବାର୍ତ୍ତା ରହିଛି। କିରଣଙ୍କ ନା’ର ଅର୍ଥ ନା ହୋଇଥାଏ ବୋଲି କୁହାଯାଇଛି। ଏଥିରୁ ସ୍ପଷ୍ଟ ହୋଇଛି ଯେତେବେଳେ ମହିଳାଙ୍କ ସହମତି ନ ଥାଏ, ସେତେବେଳେ ପୁରୁଷଙ୍କୁ ତାର ନା’ର ସମ୍ମାନ କରିବା ଉଚିତ। ଏହି ଭିଡିଓ ଏବେ ବେଶ୍ ଭାଇରାଲ ହେଉଛି। ଲୋକମାନେ ଏହାକୁ ଶେୟାର କରିବା ସହ ପ୍ରଶଂସା କରୁଛନ୍ତି।
ㅤㅤㅤㅤㅤ किरन की ना का मतलब ? pic.twitter.com/jA5gfcnp4t
— UP POLICE (@Uppolice) January 28, 2021
