ନୂଆଦିଲ୍ଲୀ,୧୦।୧୨: ଭାରତର ଆଲୋକର ପର୍ବ ଦୀପାବଳିକୁ ବୁଧବାର UNESCOର “ମାନବତାର ଅସ୍ପର୍ଶନୀୟ ସାଂସ୍କୃତିକ ଐତିହ୍ୟର ପ୍ରତିନିଧିତ୍ୱ ତାଲିକା”ରେ ସ୍ଥାନିତ କରାଯାଇଛି। ଏହି ଗୌରବପୂର୍ଣ୍ଣ ମାନ୍ୟତା ମିଳିବା ପରେ ସାରା ଦେଶରେ ଉତ୍ସବର ବାତାବରଣ ଦେଖିବାକୁ ମିଳିଛି।
ଦିଲ୍ଲୀର ଲାଲ୍ କିଲ୍ଲାଠାରେ ଆୟୋଜିତ UNESCOର ଏକ ଗୁରୁତ୍ୱପୂର୍ଣ୍ଣ ବୈଠକରେ ଏହି ନିଷ୍ପତ୍ତି ନିଆଯାଇଥିଲା। ଏହି ଖବର ଘୋଷଣା ହେବା ପରେ ସଭାସ୍ଥଳରେ ‘ଜୟ ହିନ୍ଦ’, ‘ବନ୍ଦେ ମାତରମ୍’, ଏବଂ ‘ଭାରତ ମାତା କି ଜୟ’ ଧ୍ୱନିରେ ଗୁଞ୍ଜରି ଉଠିଥିଲା।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦୀପାବଳିକୁ UNESCOର ତାଲିକାରେ ଯୋଡ଼ାଯିବାକୁ ସ୍ୱାଗତ କରିଛନ୍ତି ଏବଂ କହିଛନ୍ତି ଯେ ଏହା ଏହି ପର୍ବର ବିଶ୍ୱସ୍ତରୀୟ ଲୋକପ୍ରିୟତା ବଢ଼ାଇବ। ସେ ସୋସିଆଲ ମିଡ଼ିଆରେ ଲେଖିଛନ୍ତି, “ଭାରତ ଏବଂ ସାରା ବିଶ୍ୱର ଲୋକେ ଉତ୍ସାହିତ ହୋଇଛନ୍ତି।”
କେନ୍ଦ୍ର ସଂସ୍କୃତି ମନ୍ତ୍ରୀ ଗଜେନ୍ଦ୍ର ସିଂ ଶେଖାୱତ ଘୋଷଣା ପରେ ଭାରତ ତରଫରୁ ବକ୍ତବ୍ୟ ରଖିଥିଲେ। ଦୀପାବଳି ହେଉଛି ଭାରତର ୧୬ତମ ଉପାଦାନ ଯାହା UNESCOର ଏହି ପ୍ରତିଷ୍ଠିତ ତାଲିକାରେ ଅନ୍ତର୍ଭୁକ୍ତ ହୋଇଛି।
ପୂର୍ବରୁ ଅନ୍ୟାନ୍ୟ ୧୫ଟି ଉପାଦାନ ମଧ୍ୟରେ କୁମ୍ଭମେଳା, କୋଲକାତାର ଦୁର୍ଗାପୂଜା, ଗୁଜୁରାଟର ଗରବା ନୃତ୍ୟ, ଯୋଗ, ବୈଦିକ ମନ୍ତ୍ର ଜପର ପରମ୍ପରା ଏବଂ ରାମଲୀଳା ସାମିଲ୍ ଅଛି।
ସଂସ୍କୃତି ମନ୍ତ୍ରୀ ଶେଖାୱତ ଏହି ଅବସରରେ କହିଥିଲେ ଯେ ଏହି ମାନ୍ୟତା ପ୍ରତ୍ୟେକ ଭାରତୀୟଙ୍କ ପାଇଁ ଭାବନାତ୍ମକ, ଏବଂ ଏହା ଶାନ୍ତି ତଥା ମଙ୍ଗଳର ବିଜୟକୁ ସମ୍ମାନିତ କରେ। ସେ ଆହୁରି କହିଥିଲେ ଯେ UNESCOର ଏହି ଟ୍ୟାଗ୍ ମିଳିବା ପରେ ଏହାକୁ ଏକ ଜୀବନ୍ତ ଐତିହ୍ୟ ଭାବରେ ବଞ୍ଚାଇ ରଖିବାର ଦାୟିତ୍ୱ ମଧ୍ୟ ଆସିଛି।
