ଜଗତ୍ସିଂହପୁର ଅଫିସ/ବାଲିକୁଦା/ ନାଉଗାଁ/ କୁଜଙ୍ଗ/ ବିରିଡ଼ି (ସ୍ବ.ପ୍ର./ଡି.ଏନ୍.ଏ.) ୪ା୬: ନବନିର୍ମାଣ କୃଷକ ସଙ୍ଗଠନ ଜଗତ୍ସିଂହପୁର ଶାଖା ପକ୍ଷରୁ ୧୨ ଦଫା ଦାବି ନେଇ ଜିଲାବ୍ୟାପୀ ସମସ୍ତ ତହସିଲ ସମ୍ମୁଖରେ ଆନ୍ଦୋଳନ କରାଯାଇଥିଲା। ବିଶେଷକରି ଜୱାଦ ସହାୟତା ପ୍ରଦାନ ଉପରେ ଗୁରୁତ୍ୱାରୋପ କରାଯାଇଥିଲା ୭ ଦିନ ମଧ୍ୟରେ ଏହି ସହାୟତା ରାଶି ଚାଷୀଙ୍କୁ ପ୍ରଦାନ କରାଯିବ ବୋଲି ତହସିଲଦାରମାନେ ପ୍ରତିଶ୍ରୁତି ଦେଇଛନ୍ତି। ପ୍ରତିଶ୍ରୁତି ପୂରଣ ନ ହେଲେ ଆନ୍ଦୋଳନ ତୀବ୍ର କରାଯିବ ବୋଲି ସଙ୍ଗଠନ ପକ୍ଷରୁ ଚେତାବନୀ ଦିଆଯାଇଛି।
ସଙ୍ଗଠନର ଅନ୍ୟାନ୍ୟ ଦାବିଗୁଡ଼ିକ ହେଲା, ଚାଷୀଙ୍କୁ ଉତ୍ପାଦିତ ଦ୍ରବ୍ୟର ଉପଯୁକ୍ତ ମୂଲ୍ୟ ପ୍ରଦାନ କରାଯାଉ। ସେମାନଙ୍କୁ ମାସକୁ ୫ ହଜାର ଟଙ୍କା ସୁରକ୍ଷା ଭତ୍ତା ଦିଆଯାଉ। ବୃଦ୍ଧା, ବୃଦ୍ଧ ଓ ବିକଳାଙ୍ଗମାନଙ୍କୁ ମାସିକ ୨ ହଜାର ଟଙ୍କା ଲେଖାଏ ହିସାବରେ ଭତ୍ତା ଦିଆଯାଉ। ବ୍ରିଟିଶ୍ ଅମଳରୁ ଥିବା ରିଲିଫ୍ କୋଡ୍କୁ ସଂଶୋଧନ ସାଙ୍ଗକୁ ଅଦିନିଆ ବର୍ଷା, ବାତ୍ୟା ଆଦି ବିପର୍ଯ୍ୟୟରେ କ୍ଷତିଗ୍ରସ୍ତ ଚାଷୀଙ୍କୁ ତୁରନ୍ତ ସହାୟତା ରାଶି ପ୍ରଦାନ କରାଯାଉ। କାଳିଆ ଯୋଜନାରେ ପ୍ରକୃତ ହିତାଧିକାରୀଙ୍କୁ ସାମିଲ କରାଯାଉ। ଜଳସେଚନ, ଜଳ ନିଷ୍କାସନ, ବିହନ, ସାର, କୀଟନାଶକ ଆଦି ଯୋଗାଣରେ ସ୍ବଚ୍ଛତା ଅଣାଯାଉ। ମୁଗ, ପନିପରିବା ପାଇଁ ମଣ୍ଡି ଓ ସରକାରୀ ଶୀତଳଭଣ୍ଡାର ସ୍ଥାପନ କରାଯାଉ। ଖାଦ୍ୟ ପ୍ରକ୍ରିୟାକରଣ ଶିଳ୍ପ ମାଧ୍ୟମରେ ବେକାରି ବେରୋଜଗାର ଦୂର ସାଙ୍ଗକୁ ଚାଷୀଙ୍କଠାରୁ ବଳକା ଧାନ କିଣିବା ପାଇଁ ସୁବନ୍ଦୋବସ୍ତ କରାଯାଉ। ଖରିଫ ଧାନ କିଣାରେ ଦୁର୍ନୀତି ବଢୁଛି। ଏଥିରେ ସମ୍ପୃକ୍ତ ମିଲର ଓ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉ। ଜିଲାରେ ଷଣ୍ଢ ଓ ମାଙ୍କଡ଼ ଉପଦ୍ରବ ଯୋଗୁ ଚାଷୀଙ୍କୁ କ୍ଷତି ସହିବାକୁ ପଡ଼ୁଛି। ଏହି ସମସ୍ୟାର ସମାଧାନ କରାଯିବା ଆଦି ପ୍ରସଙ୍ଗକୁ ନେଇ ନବନିର୍ମାଣ କୃଷକ ସଙ୍ଗଠନ ପକ୍ଷରୁ ଜିଲାବ୍ୟାପୀ ତହସିଲ କାର୍ଯ୍ୟାଳୟ ସମ୍ମୁଖରେ ସତ୍ୟାଗ୍ରହ କରାଯାଇଥିଲା। ବାଲିକୁଦାରେ ଗଙ୍ଗାଧର ଖଟୁଆଙ୍କ ଅଧ୍ୟକ୍ଷତାରେ ତହସିଲ କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯାଇଥିଲା। ଏଥିରେ ଦୁର୍ଗାଚରଣ ସ୍ବାଇଁ, ରଘୁନାଥ ନାୟକ, ବାବାଜି ଜେନା, ଅଶୋକ ସ୍ବାଇଁ, ବିଭୂତି ପରିଡ଼ା ପ୍ରମୁଖ ସାମିଲ ହୋଇଥିଲେ। ନାଉଗାଁ ତହସିଲ କାର୍ଯ୍ୟାଳୟ ସମ୍ମୁଖରେ ହୋଇଥିବା ଧାରଣାରେ ଅଶୋକ ସ୍ବାଇଁ, କୈଳାସ ଚନ୍ଦ୍ର ପରିଡା, ସୁଶ୍ରୀ ଶ୍ରାବଣୀ ରାୟ, ଲଲାଟେନ୍ଦୁ ପରିଡା, ବଂଶୀଧର ବେହେରା, ତ୍ରିଲୋଚନ ରାଉଳ, ରବୀନ୍ଦ୍ର ନାଥ ମହାନ୍ତି ପ୍ରମୁଖ ସାମିଲ ହୋଇଥିଲେ। କୁଜଙ୍ଗରେ ବିଭୂତି ଭୂଷଣ ଜେନାଙ୍କ ନେତୃତ୍ୱରେ ଶତାଧିକ ଚାଷୀ ବଜାର ପରିକ୍ରମା କରି ତହସିଲ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଥିଲେ। କୃଷକ ନେତା ବାବୁରାମ ଚୌଧୁରୀଙ୍କ ଅଧ୍ୟକ୍ଷତାରେ ପ୍ରତିବାଦ ସଭା କରାଯାଇଥିଲା। ଏଥିରେ କୃଷକ ନେତା ନୂତନ ତ୍ରିପାଠୀ, ନଟବର ଶେଣ, ପ୍ରହଲ୍ଲାଦ ସ୍ବାଇଁ, ହୃଷୀକେଶ ନାଥ, ବାସୁଦେବ ରାଉତ, ସୁରେନ୍ଦ୍ର ତରାଇ ପ୍ରମୁଖ ସାମିଲ ହୋଇଥିଲେ। ବିରିଡ଼ି ବ୍ଲକରେ ନବନିର୍ମାଣ କୃଷକ ସଙ୍ଗଠନ ରାଜ୍ୟ ସଂଯୋଜକ ରଶ୍ମିରଞ୍ଜନ ସ୍ବାଇଁଙ୍କ ନେତୃତ୍ୱରେ ସତ୍ୟାଗ୍ରହ କରାଯିବା ସହ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ବିଡିଓଙ୍କୁ ଦାବିପତ୍ର ପ୍ରଦାନ କରାଯାଇଥିଲା। ଏଥିରେ ଗୁଣନିଧି ସ୍ବାଇଁ, ବିଧାନ ଚନ୍ଦ୍ର ଜେନା, ରଜନିକାନ୍ତ ବେହେରା, ଡମ୍ବରୁଧର ଲେଙ୍କା, ରମଣି ରଞ୍ଜନ ବେହେରା, ନାରାୟଣ ମୁଦୁଲି ପ୍ରମୁଖ ସାମିଲ ହୋଇଥିଲେ।
