କେସିଙ୍ଗା,୧୬।୧୨(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକ ଜାତୀୟ ରାଜପଥର ଆମ୍ବେଦକର ଛକଠାରୁ କଲେଜ ରୋଡ଼ ଦେଇ ଡୁମେର ମୁଣ୍ଡା ସାହୁ ପଡା ଏବଂ ରୁପ୍ରା ଗ୍ରାମ ଦେଇ ଜୁରାଡ଼ବ୍ରା ଜାତୀୟ ରାଜପଥ ୫୯କୁ ସଂଯୋଗ ହୋଇଥିବା ରାସ୍ତାର ଅଂଶ ହେଉଛି ସାହୁପଡାର ଶୋଚନୀୟ ରାସ୍ତା। ସାହୁ ପଡା ଓ କେନ୍ଦୁଲିପ ଦୁଇ ଜାଗାରେ ଥିବା ସାଢେ ଛ ଶହ ମିଟର ରାସ୍ତାଟି ଆଜକୁ ବର୍ଷ ବର୍ଷ ବିତି ଯାଉଥିଲା ପିଚୁ ରାସ୍ତା ହୋଇ ନ ଥିଲା। ଏହି ରାସ୍ତାରେ ଅଧିକାଂଶ ବର୍ଷା ଋତୁରେ କାଦୁଅ ହୋଇ ଯାନବାହନ, କଲେଜ ଛାତ୍ରୀଛାତ୍ର, ବୁଢାବୁଢ଼ୀ ଗମନାଗମନ ବେଳେ କାଦୁଅରେ ପଡିଯାଇ ଖଣ୍ଡିଆ ଖାବରା ହେଉଥିଲେ। ଅଞ୍ଚଳବାସୀ ବହୁ ବାର ଜିଲାପାଳ ଜନଶୁଣାଣି ଶିବିର, ବିଭାଗୀୟ ପି.ଡବ୍ଲୁ, ଡ଼ିର ଏସି, ଏସ.ଡ଼ି.ଓରେ ପିଚୁ ରାସ୍ତା ନିର୍ମାଣ ପାଇଁ ଲିଖିତ ଅଭିଯୋଗ କରିଥିଲେ।
ଆଜିକୁ ପ୍ରାୟ ୫୦ ବର୍ଷ ବିତିଯାଇଥିଲା । ଜମି ବିବାଦକୁ ନେଇ ଅନେକ ସମସ୍ୟା ଦେଖା ଯାଇଥିଲା। କିନ୍ତୁ ଲୋକଙ୍କ ସମସ୍ୟାକୁ ଦୃଷ୍ଟିରେ ରଖି ବର୍ତ୍ତମାନର କଳାହାଣ୍ଡି ଜିଲାପାଳ ପାୱାର ସଚିନ ପ୍ରକାଶ ଏବଂ ପି.ଡବ୍ଲୁ.ଡ଼ି.ବିଭାଗ ଓ ସାହୁ ପଡାର ଜମି ମାଲିକଙ୍କ ସହ ବୁଝାମଣା ପରେ ଜିଲାପାଳ ସାଢେ ଛ ଶହ ମିଟର ରାସ୍ତା ନିର୍ମାଣ ପାଇଁ ୪୫ ଲକ୍ଷ ମଞ୍ଜୁର କରି ପି.ଡବ୍ଲୁ.ଡ଼ି ବିଭାଗକୁ ପିଚୁ ରାସ୍ତା ନିର୍ମାଣର ଦାୟିତ୍ୱ ଦେଇଥିଲେ। ଉକ୍ତ ବିଭାଗର ଉଚ୍ଚ ଅଧିକାରୀ ଏସି ଏବଂ କନିଷ୍ଠ ଯନ୍ତ୍ରୀଙ୍କ ନେତୃତ୍ୱରେ ଟେଣ୍ଡର ଡାକି କେସିଙ୍ଗାର ଜଣେ ଠିକାଦାରଙ୍କୁ ଏହି ରାସ୍ତା ନିର୍ମାଣ ପାଇଁ ଦାୟିତ୍ୱ ଦିଆଗଲା। ଗୋଟିଏ ସପ୍ତାହ ମଧ୍ୟରେ ରାସ୍ତା ଉପରେ ପଥର ଗୁଣ୍ଡ ଚିପିସ ପକାଇ ରାସ୍ତାକୁ ସମତୁଲ କରିଥିଲେ। ଗତ ଦୁଇ ଦିନ ମଧ୍ୟରେ ପିଚୁ ପକାଇ ରାସ୍ତାଟି ନିର୍ମାଣ କରିଥିଲେ। ବର୍ତ୍ତମାନ ନିର୍ଭୟରେ ଲୋକମାନେ ସୁବିଧାରେ ଗମନାଗମନ କରି ପାରୁଥିବାରୁ ଅଞ୍ଚଳବାସୀ ଜିଲାପାଳଙ୍କୁ ଧନ୍ୟବାଦ ଜଣାଇ ଛନ୍ତି। ଏ ସଂକ୍ରାନ୍ତରେ ବିଭାଗୀୟ ଯନ୍ତ୍ରୀ ବିଷ୍ଣୁ ପ୍ରସାଦ କରଙ୍କୁ ପଚାରିବାରୁ ଲୋକଙ୍କ ସୁବିଧା ପାଇଁ ଗୋଟିଏ ସପ୍ତାହ ମଧ୍ୟରେ ପିଚୁ କାମ ଶେଷ କାରାଯାଇଛି।
Dharitri – Odisha’s No.1 Odia Daily
