ଦାରିଙ୍ଗବାଡ଼ିି,୧୮।୯(ଅରୁଣ ସାହୁ): କନ୍ଧମାଳ ଜିଲାପାଳ ଆଶିଷ ଈଶ୍ୱର ପାଟିଲ ସୋମବାର ଦାରିଙ୍ଗବାଡ଼ି ବ୍ଲକ ଗସ୍ତ କରି ବିଭିନ୍ନ ପ୍ରକଳ୍ପ ବୁଲି ଦେଖିଛନ୍ତି। ପୂର୍ବାହ୍ନ ୧୦ଟାରେ ଦାରିଙ୍ଗବାଡି ପହଞ୍ଚି ପ୍ରଥମେ ଇକୋ ରିଟ୍ରିଟ ସ୍ଥଳ ବୁଲି ଦେଖିଥିଲେ। ଆସନ୍ତା ଡିସେମ୍ବରରୁ ଇକୋରିଟ୍ରିଟ ଆରମ୍ଭ ହେବ। ଏନେଇ ପୁନଶ୍ଚ ମରାମତି ଏବଂ ଆବଶ୍ୟକ କାର୍ଯ୍ୟ କରିିବାକୁ ବିଡ଼ିଓ ଗଦାଧର ପାତ୍ର ଏବଂ ସହକାରୀ ର୍ନିବାହୀ ଯନ୍ତ୍ରୀ ଶିଶିର ପାତ୍ରଙ୍କ ସହ ଆଲୋଚନା କରିଥିଲେ।
ପରେ ଜିଲାପାଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ରୂପାନ୍ତରିକରଣ କାର୍ଯ୍ୟ ବୁଲି ଦେଖିବା ସହ ମୁଖ୍ୟଫାଟକ ଏବଂ ଅନ୍ୟାନ୍ୟ କାର୍ଯ୍ୟକୁ ତୋରାନ୍ବିତ କରିବାକୁ ନିର୍ଦ୍ଦେଶ ଦେଇଥିଲେ। ପରେ କଫି ବଗିଚା ଯାଇ କେଫେ ନିର୍ମାଣ କାର୍ଯ୍ୟ ସହ ଶିଶୁ ଉଦ୍ୟାନ କାର୍ଯ୍ୟ ବୁଲି ଦେଖିଥିଲେ। କାମକୁ ଚଳିତ ମାସ ମଧ୍ୟରେ ସମ୍ପୂର୍ଣ୍ଣ କରିବାକୁ ନିର୍ଦ୍ଦେଶ ଦେଇଥିଲେ।
ପଞ୍ଚାୟତ ସମିତି କାର୍ଯ୍ୟାଳୟ ସଭାଗୃହରେ ଜନ ଶୁଣାଣି କାର୍ଯ୍ୟରେ ଯୋଗଦେଇ ଜିଲାପାଳ ୫୬ଟି ଅଭିଯୋଗ ଶୁଣିଥିଲେ। ସେଥିରେ ୩୭ଟି ସାମୁହିକ, ୧୯ଟି ବ୍ୟକ୍ତିଗତ ଅଭିଯୋଗ ରହିଥିଲା। ସେଥିରେ ଜମି ବିବାଦ, ପାନୀୟ ଜଳ, ରାସ୍ତାଘାଟ ସମସ୍ୟା, ବ୍ରାହ୍ମଣୀଗାଁର ଜଣେ ସଫଳ ଚାଷୀ ମାରିୟାନ ଉଠାଣସିଂଙ୍କ ଉଦ୍ୟାନକୁ କେହି ଦୁର୍ବୁତ୍ତ ନିଆଁ ଲଗାଇ ପୋଡିଦେଇଥିବା ଅଭିଯୋଗ ହୋଇଥିଲା।
ହାତୀମୁଣ୍ଡା ପଞ୍ଚାୟତ କସପାଙ୍କାଠାରୁ ଋଷିମାଳ ପାହାଡ଼ ପର୍ଯ୍ୟନ୍ତ ୧୭ କି.ମି. ରାସ୍ତା ୧୭ କୋଟି ଯଙ୍କା ବିନିମୟରେ ସମ୍ପ୍ରସାରଣ କାର୍ଯ୍ୟ ଚାଲିଛି। ତେବେ ନିର୍ମାଣ କାର୍ଯ୍ୟ ନିମ୍ନମାନର କରାଯାଉଥିବା ଅଭିଯୋଗ ହୋଇଥିଲା। ଏପରି କି ଦାୟିତ୍ୱରେ ଥିବା ଅଧିକାରୀ କାର୍ଯ୍ୟ ତଦାରଖ କରୁ ନ ଥିବା ସ୍ଥାନୀୟ ଲୋକେ ଜିଲାପାଳଙ୍କୁ ଜଣାଇଥିଲେ।
ଏହି ଅବସରରେ ୨ଜଣ ରୋଗୀଙ୍କୁ ଅଧିକ ଚିକିତ୍ସା ପାଇଁ ମୁଖ୍ୟମନ୍ତ୍ରୀ ରିଲିଫ ପାଣ୍ଠିରୁ ୧୦ ହଜାର ଟଙ୍କା ଲେଖାଏଁ ଅନୁଦାନ ପ୍ରଦାନ କରାଯାଇଥିଲା। ଅଭିଯୋଗ ଶୁଣାଣି ବେଳେ କନ୍ଧମାଳ ଏସ୍ପି ଶୁଭେନ୍ଦୁ ପାତ୍ର, ବାଲିଗୁଡ଼ା ଆଇଟିଡିଏ ପିଏ କୃପାସିନ୍ଧୁ ବେହେରା, ଡିଆର୍ଡିଏ ପ୍ରକଳ୍ପ ନିର୍ଦ୍ଦେଶକ ରାଜେନ୍ଦ୍ର କୁମାର ରଣଜିତ, ବିଡ଼ିଓ ଗଦାଧର ପାତ୍ର, ତହସିଲଦାର ଶରତ ଶବର, ସିଡିଏମ୍ଓ ମନୋଜ ଉପାଧ୍ୟାୟଙ୍କ ସମେତ ଜିଲା ଅଧିକାରୀ ଉପସ୍ଥିତ ଥିଲେ। ଦାରିଙ୍ଗବାଡି ଆଇଆଇସି ଆନନ୍ଦ ଚନ୍ଦ୍ର ପାତ୍ର, ସବ୍-ଇନ୍ସପେକ୍ଟର ଜିତେନ୍ଦ୍ର ବେହେରା, ଏଏସ୍ଆଇ ଶ୍ରୀନିବାସ ରାଓ ପ୍ରମୁଖ ଆଇନଶୃଙ୍ଖଳାର ତଦାରଖ କରିଥିଲେ।
