ଆର.ଉଦୟଗିରି,୧।୫: ଗତ କିଛି ଦିନ ହେଲା ରାଜ୍ୟରେ ପ୍ରଚଣ୍ଡ ଗୀଷ୍ମପ୍ରବାହ ଜାରି ରହିଛି। ପ୍ରବଳ ଖରାକୁ ଦୃଷ୍ଟିରେ ରଖି ସରକାର ଲୋକଙ୍କୁ ଛାଇରେ ରହିବାକୁ କହିବା ସହ ଆବଶ୍ୟକ ନ ହେଲେ ଘରୁ ନ ବାହାରିବାକୁ ପରାମର୍ଶ ଦେଇଛନ୍ତି। ହେଲେ ଏଭଳି ଡହ ଡହ ଖରାରେ ଲାଇନ ଲଗାଇ କେତେକ ଲୋକ ଚାଉଳ ଓ ଭତ୍ତା ନେଉଥିବାର ଦୃଶ୍ୟ ସାମ୍ନାକୁ ଆସିଛି। ଏହି ଦୃଶ୍ୟ ଗଜପତି ଜିଲାରୁ ଆସିଥିବା ଜଣାପଡ଼ିଛି। ସୂଚନାଯୋଗ୍ୟ, ଗଜପତି ଜିଲା ମୋହନା ବ୍ଲକ ଅନ୍ତର୍ଗତ ଦମାଦୁଆ ପଞ୍ଚାୟତ ଅତି ଦୁର୍ଗମ ଆଦିବାସୀ ଅଧ୍ୟ୍ୟୁଷିତ ଅଞ୍ଚଳ। ରବିବାର ପ୍ରଚଣ୍ଡ ଖରାରେ ଲୋକଙ୍କୁ ଚାଉଳ ଓ ଭତ୍ତା ବଣ୍ଟନ କରାଯାଉଥିବା ବେଳେ ସେମାନଙ୍କ ସୁବିଧା ବା ଛାଇ ପାଇଁ କୌଣସି ବ୍ୟବସ୍ଥା କରାଯାଇନାହିଁ। କେତେକ ଲୋକ ଖରାରେ ଠିଆ ହୋଇଥିବା ବେଳେ ଆଉ କେତେକ ଗଛ ମୂଳରେ ବସିଛନ୍ତି ତ ଆଉ କିଏ ଅଟୋରେ ଅପେକ୍ଷା କରୁଥିବା ଦେଖିବାକୁ ମିଳିଛି। ଏନେଇ ପଞ୍ଚାୟତରେ ପିଇଓଙ୍କୁ ଜଣାଇଲେ ସୁଦ୍ଧା କୌଣସି ସୁଫଳ ମିଳୁ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ଯଦି ଏଭଳି ଖରାରେ କୌଣସି ବ୍ୟକ୍ତିଙ୍କୁ କିଛି ଅସୁବିଧା ହୁଏ ତେବେ ତା’ ପାଇଁ କିଏ ଦାୟୀ ରହିବ ବୋଲି ବୁଦ୍ଧିଜୀବୀ କହିଛନ୍ତି।
