କେନ୍ଦ୍ରାପଡ଼ା ଅଫିସ, ୨୫ା୧: ମଙ୍ଗଳବାର ପ୍ରାର୍ଥିପତ୍ର ପ୍ରତ୍ୟାହାର ପାଇଁ ଶେଷ ଦିନ। ତେବେ ଅସନ୍ତୁଷ୍ଟ ପ୍ରାର୍ଥୀଙ୍କ ମଧ୍ୟରୁ କାହାର ଫୋନ ସୁଇଚ ଅଫ ତ ଆଉ କିଏ ଗଁା ଛାଡି ବାହାରକୁ ପଳାଇ ଯାଇଛନ୍ତି। ସୋମବାର ରାତି ସୁଦ୍ଧା ଅସନ୍ତୁଷ୍ଟଙ୍କୁ ନିଜ ସପକ୍ଷରେ ନ ଆଣି ପାରିଲେ ଦଳୀୟ ସମର୍ଥିତ ପ୍ରାର୍ଥୀଙ୍କ ପାଇଁ ସମସ୍ୟା ସୃଷ୍ଟି ହେବ। ଏଥିପାଇଁ କେନ୍ଦ୍ରାପଡ଼ା ଦଳୀୟ ନେତାମାନେ ରାତି ଉଜାଗର ରହି ଅସନ୍ତୁଷ୍ଟ ପ୍ରାର୍ଥୀଙ୍କୁ ମନେଇବାକୁ ଚେଷ୍ଟା କରୁଛନ୍ତି। ଅସନ୍ତୁଷ୍ଟ ପ୍ରାର୍ଥୀଙ୍କ ମଧ୍ୟରୁ ପ୍ରାୟ ୧୫ ପ୍ରତିଶତ ସରପଞ୍ଚ ପଦବୀ ପାଇଁ ଆଶାୟୀ ରହିଛନ୍ତି। ଏହା ଦଳ ବଦଳ ନେତା ଓ କର୍ମୀମାନଙ୍କ ପାଇଁ ଅଡୁଆ ହୋଇଛି। ଅସନ୍ତୁଷ୍ଟଙ୍କ ସମସ୍ୟା ସମାଧାନ ହୋଇ ନ ପାରିଲେ ଭୋଟ ଗଣିତ ଏପଟ ସେପଟ ସମ୍ଭାବନା ଥିବା ରାଜନୈତିକ ବିଶ୍ଳେଷକମାନେ ମତ ଦେଇଛନ୍ତି।
ରାଜନୈତିକ ବିଶ୍ଳେଷକ ବାନାମ୍ବର ସାହୁ, ପ୍ରଶାନ୍ତ କୁମାର ନାୟକ, ରାଧାକାନ୍ତ ମହାନ୍ତି ପ୍ରମୁଖ ଦର୍ଶାଇଛନ୍ତି, ଚଳିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ପୂର୍ବବର୍ଷଠାରୁ ସର୍ବାଧିକ ନାମାଙ୍କନପତ୍ର ଦାଖଲ ହୋଇଛି। ଏଥିମଧ୍ୟରୁ ଜିଲାର ୨୪୯ ପଞ୍ଚାୟତ ପାଇଁ ସମିତିସଭ୍ୟ ପ୍ରାର୍ଥୀ ୯୯୪ ଥିବା ବେଳେ ସରପଞ୍ଚ ପଦବୀ ପାଇଁ ସର୍ବାଧିକ ୧୨୮୫ ଜଣ ପ୍ରାର୍ଥତ୍ପତ୍ର ଯାଞ୍ଚ ପରେ ରହିଛି। ଏମାନଙ୍କ ମଧ୍ୟରୁ ପ୍ରାୟ ୧୫ ପ୍ରତିଶତ ଦଳୀୟ ଅସନ୍ତୁଷ୍ଟ ନାମାଙ୍କନ ପତ୍ର ଦାଖଲ କରିଛନ୍ତି। ସେମାନଙ୍କ ବିଜୟ ସମ୍ଭାବନା ଅଧିକ ଥିବା ପ୍ରାର୍ଥୀ ରହିଛନ୍ତି। ଅସନ୍ତୁଷ୍ଟଙ୍କ ମଧ୍ୟରେ କଂଗ୍ରେସ ଓ ଭାଜପା ଅପେକ୍ଷା ବିଜେଡିର ଅଧିକ ଅଛନ୍ତି। ନାମାଙ୍କନ ପତ୍ର ଦାଖଲ ପରେ ବିଜୟ ସମ୍ଭାବନା ଥିବା ଏହି ପ୍ରାର୍ଥୀଙ୍କୁ ବିପକ୍ଷ ଦଳର ନେତାମାନେ ନିଜ ସପକ୍ଷକୁ ନେବାକୁ ଚେଷ୍ଟା ଜାରି ରଖିଛନ୍ତି। ଏଥିପାଇଁ ଦଳୀୟ ନେତାମାନେ ଅସନ୍ତୁଷ୍ଟଙ୍କୁ ନିଜ ପାଖକୁ ଫେରାଇ ଆଣି ପ୍ରାର୍ଥତ୍ପତ୍ର ପ୍ରତ୍ୟାହାର ପାଇଁ ଉଦ୍ୟମ ଜାରି ରଖିଛନ୍ତି। ତେବେ ଅସନ୍ତୁଷ୍ଟ ପ୍ରାର୍ଥୀଙ୍କ ସହିତ ଯୋଗାଯୋଗ ହୋଇ ପାରୁ ନ ଥିବାରୁ ନେତାମାନେ ସମସ୍ୟାରେ ପଡିଛନ୍ତି। ଅପରପକ୍ଷରେ ନିର୍ବାଚନ ବିଜ୍ଞପ୍ତିର ବହୁ ପୂର୍ବରୁ ଦଳ ବଦଳ କେନ୍ଦ୍ରାପଡ଼ା ଜିଲାରେ ନିତିଦିନିଆ ହୋଇଥିଲା। ଦଳ ବଦଳ କରିଥିବା ବହୁଚର୍ଚ୍ଚିତ ନେତାଙ୍କୁ ରାଜ୍ୟର ପ୍ରମୁଖ ୩ ରାଜନୈତିକ ଦଳ ପକ୍ଷରୁ ଟିକେଟ ସହ ସମର୍ଥନ ଯୋଗାଇ ଦିଆଯାଇଛି। ତେବେ ଦଳବଦଳକାରୀ ନେତାଙ୍କୁ ନିର୍ବାଚନରେ ପ୍ରାର୍ଥୀ ଭାବେ ଦେଖିବାରୁ ଦଳୀୟ ପୂର୍ବ ନେତା ଓ କର୍ମୀମାନେ ଏବେ ଅସନ୍ତୋଷ ପ୍ରକାଶ କରିଛନ୍ତି। ଏପରି ସ୍ଥିତି ରହିଲେ ନିର୍ବାଚନୀ ଗଣିତ ସବୁ ଓଲଟପାଲଟ ହେବାର ସମ୍ଭାବନା ଅଧିକ ବୋଲି ବିଶ୍ଳେଷକମାନେ ପ୍ରକାଶ କରିଛନ୍ତି। ଅପରପକ୍ଷରେ ଜିଲା ଯୁବ ବିଜେଡି ସଭାପତି ରାଜେଶ ଦାସ, ଜିଲା ଭାଜପା ଯୁବମୋର୍ଚ୍ଚା ସଭାପତି ବିନ୍ଦୁସାଗର ଦାସ ଓ ଜିଲା କଂଗ୍ରେସ ଯୁବ ସଭାପତି ସତ୍ୟପ୍ରିୟ ସାମଲ ପ୍ରମୁଖ କହିଛନ୍ତି, ଚଳିତ ନିର୍ବାଚନର ଦଳୀୟ ସମର୍ଥିତ ପ୍ରାର୍ଥୀଙ୍କ ପ୍ରତି କର୍ମୀଙ୍କ ଆସ୍ଥା ରହିଛି। ୨ରୁ ୩ଟି ପଞ୍ଚାୟତରେ ଅସନ୍ତୁଷ୍ଟ ସମସ୍ୟା ରହିଛି। ତେବେ ଏହାକୁ ଛାଡି ଦେଲେ ସବୁଠାରେ ଦଳୀୟ ସମର୍ଥିତ ପ୍ରାର୍ଥୀଙ୍କ ଜିତିବା ଆଶା ଉଜ୍ଜ୍ୱଳ ଅଛି।
