ଜଟଣୀ, ୨୬।୮(ଡି.ଏନ୍.ଏ):ରାଜ୍ୟରେ ଖୋର୍ଦ୍ଧା ଜିଲା ଜଟଣୀ ଗଣେଶ ପୂଜାର ଏକ ସ୍ବତନ୍ତ୍ର ପରିଚୟ ରହିଛି। ପୂଜା ସମୟରେ ମନୋରଞ୍ଜନ ଏବଂ କିଣା ବିକା ପାଇଁ ବିଭିନ୍ନ ସ୍ଥାନରେ ବ୍ୟବସାୟୀ ସଂଘ ଏବଂ ସାମାଜିକ ଅନୁଷ୍ଠାନ ପକ୍ଷରୁ ମିନାବଜାର ପଡିଥାଏ। ତେବେ ମିନାବଜାରର ଲାଭ କ୍ଷତିକୁ ନେଇ ବିବାଦ ସୃଷ୍ଟି ହେବାରୁ ଏହାକୁ ବନ୍ଦ ପାଇଁ ହାଇକୋର୍ଟରେ ମାମଲା ରୁଜୁ ହୋଇଛି। ସ୍ଥାନୀୟ ଶରତ ପାଇକରାୟ ଷ୍ଟାଡିୟମରେ ମିନାବଜାର ଆୟୋଜନ କରି ଆସୁଥିବା କଳିଙ୍ଗ ଯୁବ ପରିଷଦ ବିଭିନ୍ନ ଫୋରମରେ ମିନାବଜାର କରିବା ଅନୁମତି ପାଇଁ ଚେଷ୍ଟା ଜାରି ରଖିଥିବାବେଳେ ଏହା ଏବେ ରାଜନୈତିକ ଏବଂ ପ୍ରଶାସନିକ ଜାଲରେ ଛନ୍ଦି ହୋଇଯାଇଛି। ଏପରିକି ଷ୍ଟାଡ଼ିୟମରେ ମିନାବଜାର ହେବା ନେଇ ଅନିଶ୍ଚିତତା ଦେଖାଦେଇଥିବାରୁ ସ୍ଥାନୀୟ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ପାଇକରାୟ ଷ୍ଟାଡିୟମ ବଜାରଠାରୁ ଦୂର ଏବଂ ଖୋଲା ସ୍ଥାନରେ ରହିଥିବାରୁ ପୂଜା ସମୟରେ ସେଠାରେ ଲାଗିଥିବା ମିନାବଜାରରେ ହଜାର ହଜାର ଦର୍ଶକଙ୍କ ଭିଡ଼ ପ୍ରତିଦିନ ସକାଳୁ ସା ପର୍ଯ୍ୟନ୍ତ ଲାଗିଥାଏ। ଫଳରେ ବ୍ୟବସାୟୀଙ୍କଠାରୁ ଆରମ୍ଭ କରି ଆୟୋଜକ କମିଟି ବେଶ୍ ଲାଭବାନ୍ ହୋଇଥାନ୍ତି। ତେବେ ନିଜ ସଦସ୍ୟଙ୍କ ମଧ୍ୟରେ ଲାଭ କ୍ଷତି ହିସାବ ମତ ଭେଦରୁ ଜନୈକ ସଦସ୍ୟ ଉକ୍ତ ଷ୍ଟାଡିୟମ ପରିସରରେ ମିନାବଜାର ବନ୍ଦ ନିମନ୍ତେ କୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ଅପରପକ୍ଷରେ ହାଇକୋର୍ଟରେ ମାମଲା ପହଞ୍ଚତ୍ଥିବାବେଳେ ଗତ ଗୁଣ୍ଡିଚା ଦିନ ଉଭୟ ସପକ୍ଷ, ବିପକ୍ଷ ଏବଂ ଜଟଣୀ ବ୍ଲକ ଅଧ୍ୟକ୍ଷା ଜୟନ୍ତୀ ଛୋଟରାୟ ଏବଂ ପୌର କାଉନସିଲର ଏକାଠି ହୋଇ ଷ୍ଟାଡିୟମରେ ଚଳିତ ଗଣେଶ ମହୋତ୍ସବ ପାଇଁ ନଡ଼ିଆ ଶୁଭ ଦେଇଥିଲେ। ହେଲେ ପରବର୍ତ୍ତୀ ସମୟରେ ମତ ମତାନ୍ତର ଯୋଗୁ ଏବେ ମାମଲା ହାଇକୋର୍ଟରେ ପହଞ୍ଚତ୍ଛି।
ସୂଚନାଥାଉ କି, ଜଟଣୀ ଗଣେଶ ପୂଜା ସମୟରେ ବିଭିନ୍ନ ପୂଜା କମିଟି ଏବଂ ସାମାଜିକ ଅନୁଷ୍ଠାନ ଭଲ ରୋଜଗାର ଏବଂ ଦର୍ଶକଙ୍କ ମନୋରଞ୍ଜନ ପାଇଁ ସୀତାରାମ ଛକ ଚର୍ଚ୍ଚ ପଡ଼ିଆ, ମ୍ୟୁନିସିପାଲିଟି ପଡ଼ିଆ, ସୁଜାତା ଆନନ୍ଦ ଘର ନିକଟ ଗୋଡ଼ାଧର୍ମସାଗର ପଡ଼ିଆ, କୁଦିଆରୀ ବଜାର, ଥାନା ଛକ ଏବଂ ମାଛ ମାର୍କେଟ ପ୍ରମୁଖ ସ୍ଥାନରେ ଛୋଟ ବଡ଼ ୫ ରୁ ୬ଗୋଟି ସ୍ଥାନରେ ମିନାବଜାର ଲାଗୁଥିଲା। କାଳକ୍ରମେ ଜନବସତି ବୃଦ୍ଧି ସହିତ ବିଭିନ୍ନ କାରଣରୁ କିଛି ସ୍ଥାନରେ ମିନାବଜାର ବନ୍ଦ ହୋଇଯାଇଛି। ଜଟଣୀ ଗଣେଶ ପୂଜାର ସ୍ବତନ୍ତ୍ରତା ରହିଥିବାରୁ ପୂଜା ସମୟରେ ସହରରେ ବିଭିନ୍ନତା ମଧ୍ୟରେ ଏକତା ସଦୃଶ ଗଣେଶ ପୂଜା ସମୟରେ ସମସ୍ତେ ଏକତ୍ରିତ ହୋଇଥାନ୍ତି। ପୂଜାରେ ନୂତନ ଉଦ୍ଦିପନା ଭରିବା ଉଦ୍ଦେଶ୍ୟରେ ଜଟଣୀ ମହାବିଦ୍ୟାଳୟ ନିକଟ ଶରତ ପାଇକରାୟ ଖେଳ ପଡ଼ିଆ ପରିସରରେ ୨୦୧୩ରେ କଳିଙ୍ଗ ଯୁବ ପରିଷଦର କେତେକ ସଦସ୍ୟ ଜଟଣୀ ଗଣେଶ ମହୋତ୍ସବ ଆରମ୍ଭ କରିଥିଲେ। ଦର୍ଶକ ଓ ଶ୍ରଦ୍ଧାଳୁଙ୍କ ମନୋରଞ୍ଜନ ଉଦ୍ଦେଶ୍ୟରେ ଖେଳ ପଡ଼ିଆ ପରିସରରେ ୧୫ ଦିନ ବ୍ୟାପି ମିନାବଜାର, ଯାତ୍ରା ଓଡ଼ିଶାର କଳା ଏବଂ ସଂସ୍କୃତିକୁ ନେଇ ପ୍ରତିଦିନ ସାରେ ରାଜ୍ୟ ଏବଂ ରାଜ୍ୟ ବାହାର କଳାକାରଙ୍କ ଦ୍ୱାରା ବିଭିନ୍ନ କାର୍ଯ୍ୟକ୍ରମ ଆୟୋଜିତ ହୋଇଥାଏ। ଶରତ ପାଇକରାୟ ଷ୍ଟାଡିୟମ ସହରରୁ କମ୍ ଦୂରତାରେ ଥିବାରୁ ଯାନ ବାହନ ଗମନା ଗମନ ସୁବିଧା କାରଣରୁ ଉକ୍ତ ମିନାବଜାର ପଡିଆକୁ ଦର୍ଶକ ଯିବା ପାଇଁ ଅଧିକ ପସନ୍ଦ କରିଥାନ୍ତି। ତେବେ ଗତ ୨ବର୍ଷ ଧରି କରୋନା ମହାମାରୀ ଯୋଗୁ ଗଣେଶ ପୂଜା ଏବଂ ମିନାବଜାର ବନ୍ଦ ରହିଥିଲା। ଏବର୍ଷ କରୋନା ପ୍ରକୋପ ନ ଥିବାରୁ ଗଣେଶ ପୂଜାକୁ ଧୁମଧାମରେ ପାଳନ କରାଯିବାକୁ ନିଷ୍ପତ୍ତି ହୋଇଛି। ଏଭଳି ସ୍ଥିତିରେ ଶରତ ପାଇକରାୟ ଷ୍ଟାଡିୟମରେ ମିନାବଜାର କରିବା ପାଇଁ ସ୍ଥାନୀୟ ଅଞ୍ଚଳବାସୀ ଏବଂ ବ୍ୟବସାୟ ପ୍ରତିଷ୍ଠାନ ପକ୍ଷରୁ ଦାବି ହୋଇଆସୁଥିବାବେଳେ ଏଯାବତ୍ ଏନେଇ କୌଣସି ନିଷ୍ପତ୍ତି ହୋଇ ନ ପାରିବା ଅନିଶ୍ଚିତତା ସୃଷ୍ଟି କରିଛି।
