ବଇଣ୍ଡା,୨୯।୯(ପରିକ୍ଷିତ ସାହୁ): ଅନୁଗୋଳ ଜିଲା ଦେଇ ଯାଇଥିବା କଟକ-ସମ୍ବଲପୁର ୫୫ ନମ୍ବର ଜାତୀୟ ରାଜପଥର ୪ ଲେନ କାର୍ଯ୍ୟ ଚାଲୁ ରହିଛି। କିଶୋରନଗର ବ୍ଲକ ବାମୁରଠାରେ ଗୁରୁବାର ରାସ୍ତାର କଂକ୍ରିଟକରଣ କରାଯାଉଥିବାବେଳେ ଅତି ନିମ୍ନମାନର କାମ ହେଉଥିବା ଅଭିଯୋଗ କରିଛନ୍ତି ବାମୁର ସରପଞ୍ଚ ସଞ୍ଜୀବ ପ୍ରଧାନ। ଏ ନେଇ ସେ ଗୁରୁବାର ଜିଲାପାଳଙ୍କ ଠାରେ ଅଭିଯୋଗ କରିଛନ୍ତି।
ଅଭିଯୋଗପତ୍ରରେ ଦର୍ଶାଯାଇଛି, ରାଜପଥ ସମ୍ପ୍ରସାରଣ କାର୍ଯ୍ୟ ପାଇଁ ୨୦୧୮ରୁ ବାମୁରଠାରେ ଉଚ୍ଛେଦ କାର୍ଯ୍ୟ କରାଯାଇଥିଲା। ହେଲେ ନିର୍ମାଣ କାମରେ ଅତି ବିଳମ୍ବ ହୋଇଛି। ବିଶେଷକରି ବାମୁର ଛକଠାରେ ଫ୍ଲାଏ ଓଭର ବ୍ରିଜ୍ ନିର୍ମାଣ କରାଯାଉଥିବାବେଳେ ଡାକ ବଙ୍ଗଳା ନିକଟରେ କଂକ୍ରିଟ ରାସ୍ତା ନିର୍ମାଣ କରାଯାଉଛି। କିନ୍ତୁ ବିଳମ୍ବିତ ରାତିରେ ଠିକାସଂସ୍ଥା ପକ୍ଷରୁ ମାଟି ପକାଇ ସମତଳ କରାଯିବା ପରେ ରାତାରାତି କଂକ୍ରିଟ କରାଯାଇଛି। ଏଥିରେ ଭାଇବ୍ରେଟ ମେଶିନ ମେଶିନ ବ୍ୟବହାର କରା ନ ଯାଇ କେବଳ ଶ୍ରମିକଙ୍କ ଦ୍ୱାରା କାର୍ଯ୍ୟ କରାଯାଇଥିବାରୁ ଅତି ନିମ୍ନମାନର କାମ ହୋଇଥିବା ଅଭିଯୋଗ କରି ବାମୁର ଅଞ୍ଚଳବାସୀ ପ୍ରତିବାଦ କରିଥିଲେ। ହେଲେ କୌଣସି ସୁଫଳ ମିଳି ନ ଥିଲା। ଠିକାସଂସ୍ଥାର କର୍ମଚାରୀମାନେ ତରବରିଆ ଭାବେ ରାସ୍ତା କଂକ୍ରିଟ କରିଦେଇଥିଲେ। ବହୁ କୋଟି ଟଙ୍କା ବ୍ୟୟରେ ଏହି ରାସ୍ତା ନିର୍ମାଣ ହେଉଥିବାବେଳେ ଠିକ୍ ଭାବେ କାର୍ଯ୍ୟ କରାଯାଉ ନ ଥିବା ବାମୁର ଗ୍ରାମବାସୀ ଅଭିଯୋଗ କରିଛନ୍ତି। ସେହିପରି ରାସ୍ତା କାମ ଚାଲୁଥିବାବେଳେ ଏନ୍ଏଚ୍ଏଆଇର ଜଣେ ହେଲେ ବି ଅଧିକାରୀମାନେ ଉପସ୍ଥିତ ରହୁ ନ ଥିବାରୁ ଏପରି ନିମ୍ନମାନ କାମ ହେଉଥିବା ସରପଞ୍ଚ ଅଭିଯୋଗ କରିଛନ୍ତି। ତୁରନ୍ତ ଏଥିପ୍ରତି ଜିଲା ପ୍ରଶାସନ ଦୃଷ୍ଟି ଦେଇ ପଦକ୍ଷେପ ନେବାକୁ ଦାବି ହୋଇଛି। ଏ ନେଇ ଠିକା ସଂସ୍ଥା ପରିଚାଳକ ଜେ. ବେହେରାଙ୍କୁ ଯୋଗାଯୋଗ କରାଯାଇଥିଲେ ହେଁ ସେ ଏହି ପ୍ରସଙ୍ଗକୁ ଏଡାଇ ଦେଇଥିଲେ। ଏ ନେଇ ଆଠମଲ୍ଲିକ ଉପଜିଲାପାଳ ଜିତେନ୍ଦ୍ର ପାତ୍ର କହିଛନ୍ତି, ରାସ୍ତା କାମ ସମ୍ପର୍କରେ ତଦନ୍ତ କରାଯିବ।
