କର୍ଲାମୁଣ୍ଡା,୨୮।୯(ପ୍ରଦୀପ କୁମାର ସାହୁ): ଦିବ୍ୟାଙ୍ଗ ଜନ ଅଧିକାର ଆଇନ, ୨୦୧୬ ପ୍ରଣୟନର ଦଶ ବର୍ଷ ପୂର୍ତ୍ତି ହୋଇଥିଲେ ମଧ୍ୟ ଗ୍ରାମସଭାଗୁଡ଼ିକରେ ଦିବ୍ୟାଙ୍ଗଜନଙ୍କ ଅଧିକାର ଓ ସରକାରୀ ସୁବିଧା ସମ୍ପର୍କରେ ଆବଶ୍ୟକ ସଚେତନତା ସୃଷ୍ଟି ହେଉ ନ ଥିବା ଅଭିଯୋଗ ହୋଇଆସୁଛି। ଏଥିଯୋଗୁ ଅନେକ ଦିବ୍ୟାଙ୍ଗ ଜନ ସେମାନଙ୍କ ଅଧିକାର ଓ ସରକାରୀ ସୁବିଧାରୁ ବଞ୍ଚିତ ହେଉଥିବା ମଧ୍ୟ ଅଭିଯୋଗ ରହିଛି।
ଏହି ପରିପ୍ରେକ୍ଷୀରେ ଆସନ୍ତା ଅକ୍ଟୋବର ୨ ତାରିଖ ଗାନ୍ଧୀ ଜୟନ୍ତୀ ଅବସରରେ ପ୍ରତ୍ୟେକ ଗ୍ରାମପଞ୍ଚାୟତରେ ହେବାକୁ ଥିବା ଗ୍ରାମସଭାରେ ଦିବ୍ୟାଙ୍ଗ ଜନ ଅଧିକାର ଆଇନ, ୨୦୧୬କୁ ସ୍ବତନ୍ତ୍ର ଏଜେଣ୍ଡା ଭାବେ ସାମିଲ କରିବାକୁ ଦାବି କରିଛନ୍ତି କର୍ଲାମୁଣ୍ଡା ଜୋନ-୨ ଜିଲା ପରିଷଦ ସଭ୍ୟ ସୁରେଶ ଚୌଧୁରୀ।
ଏନେଇ ସେ କଳାହାଣ୍ଡି ଜିଲାପାଳଙ୍କ ନିକଟରେ ଦାବି ଜଣାଇବା ସହ ଜିଲ୍ଲାର ସମସ୍ତ ବିଡିଓ ଓ ସରପଞ୍ଚଙ୍କୁ ଆବଶ୍ୟକ ନିର୍ଦ୍ଦେଶ ଦେବାକୁ ଅନୁରୋଧ କରିଛନ୍ତି।
ଗ୍ରାମସଭାରେ ଦିବ୍ୟାଙ୍ଗ ଜନଙ୍କ ସମାନତା, ମର୍ଯ୍ୟାଦା, ଭେଦଭାବରୁ ମୁକ୍ତି, ସୁଗମ୍ୟତା, ସମାବେଶୀ ଶିକ୍ଷା, ନିଯୁକ୍ତି, ସାମାଜିକ ସୁରକ୍ଷା ଓ ସ୍ବାସ୍ଥ୍ୟସେବା ଭଳି ଅଧିକାର ସମ୍ପର୍କରେ ଆଲୋଚନା କରାଗଲେ ଗ୍ରାମାଞ୍ଚଳର ଦିବ୍ୟାଙ୍ଗଜନ ଓ ସେମାନଙ୍କ ପରିବାର ଉପକୃତ ହୋଇପାରିବେ ବୋଲି ଶ୍ରୀ ଚୌଧୁରୀ କହିଛନ୍ତି।
ଏଥିସହ ଗ୍ରାମପଞ୍ଚାୟତ ସ୍ତରରେ ନିଷ୍ପତ୍ତି ଗ୍ରହଣ ପ୍ରକ୍ରିୟାରେ ଦିବ୍ୟାଙ୍ଗ ଜନଙ୍କ ଅଂଶଗ୍ରହଣ ସୁନିଶ୍ଚିତ କରିବା ସହ ସେମାନଙ୍କ ପାଇଁ ଉପଲବ୍ଧ ଆଇନଗତ ସୁରକ୍ଷା ଓ ବିଭିନ୍ନ ସରକାରୀ ସୁବିଧା ସମ୍ପର୍କରେ ଗ୍ରାମସଭାରେ ସଚେତନତା ସୃଷ୍ଟି କରିବାକୁ ମଧ୍ୟ ସେ ଦାବି କରିଛନ୍ତି।