ନୂଆଦିଲ୍ଲୀ: ଖୁଚୁରା ନିବେଶକଙ୍କୁ ଉତ୍ସାହିତ କରିବା ଲାଗି ଆର୍ବିଆଇ ଏକ ବଡ ପଦକ୍ଷେପ ଗ୍ରହଣ କରିଛି। ସରକାରଙ୍କ ପ୍ରତିଭୂତି କ୍ରୟ କରିବା ଦିଗରେ ଏଣିକି ଖୁଚୁରା ନିବେଶକଙ୍କୁ ପ୍ରତ୍ୟକ୍ଷ ଭାବେ ସୁଯୋଗ ମିଳିବ। ଏସିଆର ପ୍ରଥମ ଦେଶ ଭାବେ ଭାରତ ଏଭଳି ପଦକ୍ଷେପ ଗ୍ରହଣ କରିଛି। ସାରା ବିଶ୍ୱର ମାତ୍ର କିଛି ଦେଶ ଏ ସମ୍ପର୍କିତ ପଦକ୍ଷେପ ନେଇଛନ୍ତି। ସୂଚନାଯୋଗ୍ୟ, ସରକାର ଆସନ୍ତା ଆର୍ଥତ୍କ ବର୍ଷରେ ୧୨ ଲକ୍ଷ କୋଟି ଟଙ୍କା ଋଣ କରିବା ଲାଗି ଯୋଜନା ରଖିଛନ୍ତି। କେନ୍ଦ୍ରୀୟ ବ୍ୟାଙ୍କ ଏହି କାର୍ଯ୍ୟକ୍ରମକୁ ପରିଚାଳନା କରିବ।
ସିଟିଏସ୍ ଅଧିନକୁ ଆସିବ ଆଉ ୧୫ ହଜାର ବ୍ୟାଙ୍କ ଶାଖା
ସେପ୍ଟେମ୍ବର ସୁଦ୍ଧା ଆଉ ୧୮ ହଜାର ବ୍ୟାଙ୍କ ଶାଖାରେ ଟେକ୍ ଟ୍ରଙ୍କଶନ ସିଷ୍ଟମ(ସିଟିଏସ୍) ବ୍ୟବସ୍ଥା କାର୍ଯ୍ୟକାରୀ କରାଇବାକୁ ଆର୍ବିଆଇ ନିଷ୍ପତ୍ତି ନେଇଛି। ପେମେଣ୍ଟ ଏବଂ ସେଟେଲମେଣ୍ଟ ସିଷ୍ଟମକୁ ଆହୁରି ଦୃଢ କରିବା ଲାଗି କେନ୍ଦ୍ରୀୟ ବ୍ୟାଙ୍କ ଏଭଳି ପଦକ୍ଷେପ ନେଇଛି। ଏହି ଶାଖାଗୁଡିକ ଏବେ ସୁଦ୍ଧା କେନ୍ଦ୍ରୀୟ ବ୍ୟାଙ୍କର କେନ୍ଦ୍ରୀକୃତ କ୍ଲିଅରିଂ ସିଷ୍ଟମ ପରିସରବାହାରେ ରହିଥିଲା। ୨୦୧୦ ପରଠାରୁ ସିଟିଏସ୍ ସିଷ୍ଟମ ଲାଗୁ କାର୍ଯ୍ୟକାରୀ ହେଉଛି। ଏହା ଦେଶର ପ୍ରାୟ ୧.୫ ଲକ୍ଷ ବ୍ୟାଙ୍କ ଶାଖାରେ ବ୍ୟବହାର ହେଉଥିବା ବେଳେ ୩ଟି ଚେକ୍ ପ୍ରୋସେସିଂ ଗ୍ରୀଡରେ କାର୍ଯ୍ୟ କରୁଛି। ୧୨୧୯ ଅଣ ସିଟିଏସ୍ କ୍ଲିୟରିଂ ହାଉସକୁ ସିଟିଏସ୍ ପରିସରକୁ ଅଣାଯାଇଛି। ପ୍ରାୟ ୧୮ ହଜାର ଶାଖା ଏହି ଔପଚାରିକ କ୍ଲିୟରିଂ ସିଷ୍ଟମ ପରିସର ବାହାରେ ରହିଛି। ଯାହାକୁ ବ୍ୟବସ୍ଥିତ କରିବା ଲାଗି ଆର୍ବିଆଇ ପଦକ୍ଷେପ ନେଉଛି।
ଓ୍ବାନ ନେଶନ ଓ୍ବାନ ଅମ୍ବୁଡସମ୍ୟାନ
ବ୍ୟାଙ୍କିଙ୍ଗ କ୍ଷେତ୍ରରେ ଓ୍ବାନ ନେଶନ ଓ୍ବାନ ଅମ୍ବୁଡସମ୍ୟାନ ଆଣିବା ନେଇ ଆର୍ବିଆଇ ଯୋଜନା ରଖିଛି। ଗ୍ରାହକଙ୍କ ଅଭିଯୋଗ ସମାଧାନ ଯୋଜନାକୁ ଏକୀକରଣ କରିବା ଦିଗରେ ଏହା କାର୍ଯ୍ୟକ୍ରମ ହାତକୁ ନେବ। ଗ୍ରାହକ ଅଭିଯୋଗ ସମାଧାନ ବର୍ତ୍ତମାନ ୩ଟି ସ୍କିମରେ ହେଉଛି। ଏହାକୁ ଗୋଟିଏ ଅମ୍ବୁଡସମ୍ୟାନ ପରିସରକୁ ଆଣିବାକୁ ଯୋଜନା ରଖାଯାଇଛି। ବ୍ୟାଙ୍କିଙ୍ଗ, ଅଣ ବ୍ୟାଙ୍କ ବିତ୍ତ ପ୍ରତିଷ୍ଠାନ ଏବଂ ଡିଜିଟାଲ ଟ୍ରାଞ୍ଜାକଶନ କ୍ଷେତ୍ରରେ ଅଭିଯୋଗର ସମାଧାନ ଲାଗି ଭିନ୍ନ ଭିନ୍ନ ଅମ୍ବୁଡସମ୍ୟାନ ବା ଲୋକପାଳ ବ୍ୟବସ୍ଥା ରହିଛି।
ଅଭିବୃଦ୍ଧି ଉର୍ଦ୍ଧ୍ୱଗାମୀ ରହିବ
ଭାରତୀୟ ଅର୍ଥ ବ୍ୟବସ୍ଥାର ଜିଡିପି ବର୍ତ୍ତମାନ କେବଳ ଉର୍ଦ୍ଧ୍ୱଗାମୀ ରହିବ ବୋଲି ଗଭର୍ନର ଶକ୍ତିକାନ୍ତ ଦାସ କହିଛନ୍ତି। ଆସନ୍ତା ଆର୍ଥତ୍କ ବର୍ଷରେ ଜିଡିପି ୧୦.୫% ରହିବା ନେଇ ନେଇ ଆକଳନ କରାଯାଇଛି। ବଜେଟରେ ଗ୍ରହଣ କରାଯାଇଥିବା ପଦକ୍ଷେପ ଅର୍ଥ ବ୍ୟବସ୍ଥା ଲାଗି ଲାଭକାରୀ ହେବ। ଚାହିଦା, ଲୋକଙ୍କ ଆୟ, ନିଯୁକ୍ତି ଏବଂ ନିବେଶ ବଢାଇବା ଦିଗରେ ଏହା ଯୋଗଦାନ ରଖିବ ବୋଲି ଶକ୍ତିକାନ୍ତ ଆଶାବାଦୀ ରହିଛନ୍ତି।
ଟିଏଲ୍ଟିଆର୍ଓରେ ଏନ୍ବିଏଫ୍ସିଙ୍କୁ ପାଣ୍ଠି
ଟାର୍ଗେଟେଡ ଲଙ୍ଗ ଟର୍ମ ରେପୋ ଅପରେଶନ(ଟିଏଲ୍ଟିଆର୍)ରେ ବ୍ୟାଙ୍କଗୁଡିକ ଅଣ ବ୍ୟାଙ୍କ ବିତ୍ତ ପ୍ରତିଷ୍ଠାନ(ଏନ୍ବିଏଫ୍ସି)ଗୁଡିକୁ ପାଣ୍ଠି ଯୋଗାଇ ଦେବେ। ଏ ନେଇ କେନ୍ଦ୍ରୀୟ ବ୍ୟାଙ୍କ ଏକ ପାଣ୍ଠି ବ୍ୟବସ୍ଥା କରିବ। ଅନ୍ଟ୍ୟାପ୍ ଟିଏଲ୍ଟିଆର୍ଓ ସ୍କିମରେ ଏହି ବ୍ୟବସ୍ଥା କରିବାକୁ ଆର୍ବିଆଇ ପ୍ରସ୍ତାବ ରଖିଛି।
