ମୁମ୍ବାଇ,୯ା୩: ୟୁନିଫାଏଡ୍ ପେମେଣ୍ଟ ଇଣ୍ଟରଫେସ୍ (ୟୁପିଆଇ) ପ୍ରଚଳନର ପ୍ରାୟ ୬ ବର୍ଷ ପରେ ଏବେ ସାଧାରଣ ଫିଚର ଫୋନ୍ରେ ମଧ୍ୟ ଡିଜିଟାଲ ପେମେଣ୍ଟ ଅର୍ଥାତ୍ ଟଙ୍କା ଦେଣନେଣ କରିହେବ। ଏନେଇ ନୂଆ ଡିଜିଟାଲ ଫିଚର ‘ୟୁପିଆଇ ୧୨୩ପେ’ ଉପଲବ୍ଧ ହୋଇଛି, ଯଦ୍ଦ୍ବାରା ଦେଶର ୪୦ କୋଟିରୁ ଊର୍ଦ୍ଧ୍ୱ ଫିଚର ଫୋନ୍ ବ୍ୟବହାରକାରୀ ୟୁପିଆଇ ପେମେଣ୍ଟ ସୁବିଧା ପାଇପାରିବେ ବୋଲି ଆର୍ବିଆଇ ଗଭର୍ନର ଶକ୍ତିକାନ୍ତ ଦାସ ମଙ୍ଗଳବାର କହିଛନ୍ତି।
ଆର୍ବିଆଇ ଅଧୀନ ନ୍ୟାଶନାଲ ପେମେଣ୍ଟ କର୍ପୋରେଶନ ଅଫ୍ ଇଣ୍ଡିଆ (ଏନ୍ପିସିଆଇ) ଦ୍ୱାରା ୟୁପିଆଇ ପରିଚାଳିତ। ତେବେ ୟୁପିଆଇକୁ ଅଧିକ ଲୋକପ୍ରିୟ କରିବା ପାଇଁ ଏନ୍ପିସିଆଇ ଦ୍ୱାରା ଅନ୍ଷ୍ଟ୍ରକଚର୍ଡ ସପ୍ଲିମେଣ୍ଟାରି ସର୍ଭିସ୍ ଡାଟା (ୟୁଏସ୍ଏସ୍ଡି) ଭିତ୍ତିକ ସେବା ‘ୟୁପିଆଇ ୧୨୩ପେ’ ଆରମ୍ଭ ହୋଇଛି। ଏହା ମାଧ୍ୟମରେ ଲୋକେ ନିଜ ଫିଚର ଫୋନ୍ରେ ଡିଜିଟାଲ ପେମେଣ୍ଟ ସେବା ପାଇପାରିବେ। ଆର୍ବିଆଇ ଗଭର୍ନର ଦାସ ‘ୟୁପିଆଇ ୧୨୩ପେ’ ସମେତ ଏଥିନିମନ୍ତେ ୨୪ ଘଣ୍ଟିଆ ହେଲ୍ପଲାଇନ ସେବା ‘ଡିଜିସାଥୀ’ର ମଧ୍ୟ ଶୁଭାରମ୍ଭ କରିଛନ୍ତି। ଫିଚର ଫୋନଧାରୀମାନେ କୌଣସି ଆପତ୍ତି ଅଭିଯୋଗ ଏବଂ ଅନୁସନ୍ଧାନ ପାଇଁ ‘ଡିଜିସାଥୀ’ ସହ ଫୋନ୍କଲ୍ (୧୪୪୩୧ ଓ ୧୮୦୦ ୮୯୧ ୩୩୩୩) ଏବଂ ଓ୍ବେବ୍ସାଇଟ୍ (www.Digisaathi.Info) ଜରିଆରେ ଯୋଗାଯୋଗ କରିପାରିବେ।
ଆର୍ବିଆଇ ଗଭର୍ନର ଦାସ କହିଛନ୍ତି ଯେ, ୟୁପିଆଇ ଅଧୀନରେ କାରବାର ବଢ଼ିଚାଲିଛି। ଆର୍ଥିକ ବର୍ଷ ୨୦୨୨ରେ ଅଦ୍ୟାବଧି ୟୁପିଆଇ କାରବାର ୭୬ ଲକ୍ଷ କୋଟି ଟଙ୍କା ଛୁଇଁଛି, ଯାହାକି ଆର୍ଥିକ ବର୍ଷ ୨୦୨୧ରେ ୪୧ ଲକ୍ଷ କୋଟି ଟଙ୍କା ହୋଇଥିଲା। କେବଳ ଗତ ଫେବୃୟାରୀରେ ୪୫୩ କୋଟି ଡିଜିଟାଲ ଟ୍ରାଞ୍ଜାକଶନ ମାଧ୍ୟମରେ ୮.୨୬ ଲକ୍ଷ କୋଟି ଟଙ୍କାର କାରବାର ହୋଇଥିଲା। ୧୦୦ ଲକ୍ଷ କୋଟି ଟଙ୍କାର ୟୁପିଆଇ କାରବାର ଆଉ ବେଶି ଦିନ ଦୂର ନୁହେଁ ବୋଲି ଦାସ କହିଛନ୍ତି।
