ଇସଲାମାବାଦ,୯।୭: ପାକିସ୍ତାନର ରାଜନୀତିରେ ପୁଣି ଥରେ ହଇଚଇ ସୃଷ୍ଟି ହୋଇଛି। ଦେଶର ସେନା ଏବଂ ରାଜନୈତିକ ମହଲରେ ଆଲୋଚନା ହେଉଛି ଯେ ଫିଲ୍ଡ ମାର୍ଶାଲ ଅସୀମ ମୁନିର ଏକ ବଡ଼ ଖେଳ ଖେଳିବାକୁ ପ୍ରସ୍ତୁତ ହେଉଛନ୍ତି।
ରାଷ୍ଟ୍ରପତି ଆସିଫ ଅଲି ଜର୍ଦ୍ଦାରୀଙ୍କୁ ହଟାଇ ଫିଲ୍ଡ ମାର୍ଶାଲ ଅସୀମ ମୁନିର କ୍ଷମତା ହାତକୁ ନେଇପାରନ୍ତି ବୋଲି କଳ୍ପନାଜଳ୍ପନା ଜୋର ଧରିଛି। କିନ୍ତୁ ପାକିସ୍ତାନ କ’ଣ ଆଉ ଏକ ସାମରିକ ବିଦ୍ରୋହର ଦ୍ୱାରଦେଶରେ ଅଛି ବୋଲି ଏବେ ପ୍ରଶ୍ନ ଉଠୁଛି।
ଗତ କିଛି ସପ୍ତାହ ମଧ୍ୟରେ ଏପରି ଅନେକ ଘଟଣା ଘଟିଛି, ଯାହା ଏହି ଗୁଜବକୁ ଆହୁରି ବଢାଇ ଦେଇଛି। ଦେଶର ବାତାବରଣରେ ଉତ୍ତେଜନା ଏବଂ ରାଜନୈତିକ ବୟାନବାଜି ଏହି ଆଲୋଚନାକୁ ଆହୁରି ତୀବ୍ର କରିଛି। ଏହି ରାଜନୈତିକ ଝଡ଼ ପଛରେ ସତ୍ୟ କ’ଣ? ଭାରତର ପଡ଼ୋଶୀ ଦେଶ ପୁଣି ଥରେ କ୍ଷମତାର ଏକ ନୂତନ ଯୁଗରେ ପାଦ ଦେବାକୁ ଯାଉଛି କି?
ପାକିସ୍ତାନ ସରକାର ମେ’ ମାସରେ ଏକ ଆଶ୍ଚର୍ଯ୍ୟଜନକ ନିଷ୍ପତ୍ତି ନେଇଥିଲା। ଜେନେରାଲ ଅସୀମ ମୁନିରଙ୍କୁ ଫିଲ୍ଡ ମାର୍ଶାଲ ପଦବୀ ଦିଆଯାଇଥିଲା। ପାକିସ୍ତାନର ଇତିହାସରେ ଏହା ଦ୍ୱିତୀୟ ଥର, ଯେତେବେଳେ ଜଣେ ସାମରିକ ଅଧିକାରୀ ଏହି ପଦବୀ ପାଇଛନ୍ତି। ପୂର୍ବରୁ, ଜେନେରାଲ ଆୟୁବ ଖାନ ୧୯୫୯ରେ ନିଜକୁ ଫିଲ୍ଡ ମାର୍ଶାଲ କରିଥିଲେ। ସେହି ସମୟରେ ପାକିସ୍ତାନ ସେନା ଦ୍ୱାରା ଶାସିତ ହେଉଥିଲା।
ମୁନିରଙ୍କ ପଦୋନ୍ନତି ଉପରେ ପ୍ରଶ୍ନ ଉଠିଥିଲା। ଭାରତର ‘ଅପରେଶନ ସିନ୍ଦୂର’ ପରେ ଏହି ଘୋଷଣା ହୋଇଥିଲା। ଜୁନ ମାସରେ ଜେନେରାଲ ମୁନିର ଆମେରିକା ଗସ୍ତ କରିଥିଲେ ଏବଂ ସେଠାରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଭେଟିଥିଲେ। ଏହି ବୈଠକ ଅନନ୍ୟ ଥିଲା, କାରଣ ପ୍ରଥମ ଥର ପାଇଁ ଜଣେ ପାକିସ୍ତାନୀ ଅଧିକାରୀଙ୍କୁ ହ୍ବାଇଟ ହାଉସକୁ ନିମନ୍ତ୍ରଣ କରାଯାଇଥିଲା।
ଏହି ବୈଠକ ରାଜନୈତିକ ମହଲରେ ହଇଚଇ ସୃଷ୍ଟି କରିଥିଲା। ଅନେକ ବିଶେଷଜ୍ଞ ବିଶ୍ୱାସ କରନ୍ତି ଯେ ଏହି ବୈଠକ ମୁନିରଙ୍କ ବର୍ଦ୍ଧିତ ଶକ୍ତି ଏବଂ ରାଜନୈତିକ ମହତ୍ତ୍ୱାକାଂକ୍ଷାର ପ୍ରମାଣ। ଏହା ପରେ, ମୁନିର ଏକ ବିଦ୍ରୋହ କରିପାରନ୍ତି ବୋଲି କଳ୍ପନାଜଳ୍ପନା ଅଧିକ ତୀବ୍ର ହୋଇଗଲା।
ପାକିସ୍ତାନୀ ସାମ୍ବାଦିକ ଏଜାଜ ସଇଦ କହିଛନ୍ତି, ‘ରାଷ୍ଟ୍ରପତି ଜରଦାରୀଙ୍କୁ ହଟାଇବା ପାଇଁ ପ୍ରୟାସ ତୀବ୍ର ହେଉଛି। ଅନେକ ଲୋକ ଚାହାଁନ୍ତି ଯେ ଜରଦାରୀ ନିଜେ ଇସ୍ତଫା ଦିଅନ୍ତୁ। ଏଥିପାଇଁ ରାଜନୈତିକ ହେରଫେର ଆରମ୍ଭ ହୋଇଛି।’
ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ମଧ୍ୟ ଏପରି ଖବର ଭାଇରାଲ ହେଉଛି। ଜଣେ ୟୁଜର ଲେଖିଛନ୍ତି, ‘ସୂତ୍ର କହୁଛି ଯେ ମୁନିର ଜରଦାରୀଙ୍କ ବିରୁଦ୍ଧରେ ‘ନୀରବ ବିଦ୍ରୋହ’ ଯୋଜନା କରୁଛନ୍ତି। ଜରଦାରୀ ତାଇୱାନରେ ଚାଇନାକୁ ସମର୍ଥନ କରନ୍ତି, ଯେତେବେଳେ ମୁନିରଙ୍କର ଆମେରିକା ସହିତ ଏକ ଗୁପ୍ତ ଚୁକ୍ତି ଅଛି। ତାଙ୍କର ଲକ୍ଷ୍ୟ ହେଉଛି CPECକୁ ଶେଷ କରିବା, ଯାହା ବି ହେଉ।’
ପାକିସ୍ତାନ ରାଜନୀତିରେ ଏହି ଅସ୍ଥିରତା ନୂଆ ନୁହେଁ। ଦେଶର ଅତୀତ ଅନେକ ବିଦ୍ରୋହ ଏବଂ ରାଜନୈତିକ ପରିବର୍ତ୍ତନରେ ପରିପୂର୍ଣ୍ଣ। କିନ୍ତୁ ବର୍ତ୍ତମାନର ପରିସ୍ଥିତିରେ ଜେନେରାଲ ମୁନିରଙ୍କ ପଦୋନ୍ନତି, ତାଙ୍କର ଆମେରିକା ଗସ୍ତ ଏବଂ ବିଲାୱଲଙ୍କ ବୟାନ ରାଜନୈତିକ ପରିବେଶକୁ ଆହୁରି ଉଷ୍ମ କରିଛି।
