ଢେଙ୍କାନାଳ ଅଫିସ, ୧୨।୧ – ଢେଙ୍କାନାଳ ଜିଲାରେ ୪ ପର୍ଯ୍ୟାୟରେ ଫେବୃୟାରୀ ୧୬, ୧୮, ୨୦, ୨୨ରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ଅନୁଷ୍ଠିତ ହେବ। ହିନ୍ଦୋଳ ଏବଂ ଗଁଦିଆ ବ୍ଲକରେ ୧୬, ସଦର ଏବଂ ଓଡ଼ାପଡ଼ା ବ୍ଲକରେ ୧୮, ପରଜଙ୍ଗ ଏବଂ କାମାକ୍ଷାନଗର ବ୍ଲକରେ ୨୦, କଙ୍କଡ଼ାହାଡ଼ ଏବଂ ଭୁବନ ବ୍ଲକରେ ୨୨ ତାରିଖରେ ମତଦାନ ହେବ।
ହିନ୍ଦୋଳ ବ୍ଲକର ୪ ଜିଲା ପରିଷଦ, ୩୫ ସରପଞ୍ଚ ଏବଂ ସମିତି ସଭ୍ୟ, ୪୪୬ ୱାର୍ଡସଭ୍ୟ ପଦବୀରେ ନିର୍ବାଚନ ହେବାକୁ ଥିବାବେଳେ ୧ଲକ୍ଷ ୩୨ହଜାର ୩୦୪ ଭୋଟର ମତଦାନ ସାବ୍ୟସ୍ତ କରିବେ। ଗଁଦିଆ ବ୍ଲକର ୪ ଜିଲା ପରିଷଦ, ୨୯ ସରପଞ୍ଚ ଓ ସମିତି ସଭ୍ୟ ସାଙ୍ଗକୁ ୪୨୬ ଓ୍ବାର୍ଡସଭ୍ୟ ପଦବୀ ପାଇଁ ଭୋଟ ହେବ। ୧ଲକ୍ଷ ୨୧ହଜାର ୮୫୬ ଭୋଟର ସେମାନଙ୍କ ମନପସନ୍ଦର ପ୍ରତିନିଧି ବାଛିବେ। ସେହିପରି ଓଡ଼ାପଡ଼ା ବ୍ଲକର ୩ ଜିଲା ପରିଷଦ, ୨୮ ସରପଞ୍ଚ ଓ ସମିତି ସଭ୍ୟ, ୪୧୯ ୱାର୍ଡମେମ୍ବର ପଦବୀରେ ନିର୍ବାଚନ ହେବ। ବ୍ଲକରେ ୧ଲକ୍ଷ ୧୦ହଜାର ୩୨୦ ଭୋଟର ରହିଛନ୍ତି। ସଦର ବ୍ଲକରେ ୪ ଜିଲା ପରିଷଦ, ୩୦ ସରପଞ୍ଚ ଓ ସମିତି ସଭ୍ୟ, ୩୯୯ ୱାର୍ଡମେମ୍ବର ପଦବୀ ପାଇଁ ନିର୍ବାଚନ ହେବ। ବ୍ଲକର ମତଦାତା ସଂଖ୍ୟା ୧ଲକ୍ଷ ୧୮ହଜାର ୨୬୯।
ପରଜଙ୍ଗ ବ୍ଲକରେ ୩ ଜିଲା ପରିଷଦ, ୨୯ ସରପଞ୍ଚ ଓ ସମିତି ସଭ୍ୟ, ୩୬୧ ୱାର୍ଡମେମ୍ବର ପଦବୀରେ ୧ଲକ୍ଷ ୭ହଜାର ୬୧୭ ଭୋଟର ମତଦାନ ସାବ୍ୟସ୍ତ କରିବେ। କାମାକ୍ଷାନଗର ବ୍ଲକର ୩ ଜିଲା ପରିଷଦ, ୨୨ ସରପଞ୍ଚ ଓ ସମିତି ସଭ୍ୟ, ୨୯୬ ୱାର୍ଡମେମ୍ବରଙ୍କ ଭାଗ୍ୟ ନିର୍ଦ୍ଧାରଣ କରିବେ ୯୧,୩୪୪ ଭୋଟର। କଙ୍କଡ଼ାହାଡ଼ ବ୍ଲକର ୩ ଜିଲା ପରିଷଦ, ୨୧ ସରପଞ୍ଚ ଓ ସମିତି ସଭ୍ୟ, ୨୭୬ ୱାର୍ଡମେମ୍ବର ପଦବୀରେ ଭୋଟ ହେବାକୁ ଥିବାବେଳେ ୮୩,୨୦୦ ଭୋଟର ରହିଛନ୍ତି। ସେହିପରି ଭୁବନ ବ୍ଲକରେ ୩ ଜିଲା ପରିଷଦ, ୧୮ ସରପଞ୍ଚ ଓ ସମିତି ସଭ୍ୟ, ୨୫୮ ୱାର୍ଡସଭ୍ୟ ପାଇଁ ନିର୍ବାଚନ ଅନୁଷ୍ଠିତ ହେବ। ବ୍ଲକରେ ୮୨,୭୪୭ ଭୋଟର ସେମାନଙ୍କ ବହୁମୂଲ୍ୟ ମତଦାନ ସାବ୍ୟସ୍ତ କରିବେ।
ସରପଞ୍ଚ, ସମିତି ସଭ୍ୟ, ୱାର୍ଡମେମ୍ବର ଆଶାୟୀ ପ୍ରାର୍ଥୀ ଜାନୁୟାରୀ ୧୭ରୁ ୨୧ ଯାଏ ନାମାଙ୍କନ ଦାଖଲ କରିପାରିବେ। ଏଥିଲାଗି ପୂର୍ବାହ୍ନ ୧୧ଟାରୁ ଅପରାହ୍ନ ୩ଟା ଯାଏ ସମୟ ଧାର୍ଯ୍ୟ କରାଯାଇଛି। ୨୨ରେ ଯାଞ୍ଚ ପରେ ୨୩ରେ ପ୍ରାର୍ଥୀପତ୍ର ତାଲିକା ପ୍ରକାଶିତ ହେବ। ୨୫ ତାରିଖରେ ପ୍ରାର୍ଥୀପତ୍ର ପ୍ରତ୍ୟାହାର ଲାଗି ଦିନ ଧାର୍ଯ୍ୟ କରାଯାଇଥିବାବେଳେସେହିଦିନ ଚୂଡ଼ାନ୍ତ ତାଲିକା ପ୍ରକାଶିତ ହେବ। ସେହିପରି ଜିଲା ପରିଷଦ ପାଇଁ ଜାନୁୟାରୀ ୧୭ରୁ ୨୧ ଯାଏ ପୂର୍ବାହ୍ନ ୧୧ଟାରୁ ଅପରାହ୍ନ ୩ଟା ଯାଏ ଉପଜିଲାପାଳଙ୍କ କାର୍ଯ୍ୟାଳୟରେ ପ୍ରାର୍ଥତ୍ପତ୍ର ଦାଖଲ ହେବ। ୨୨ରେ ଯାଞ୍ଚ, ୨୩ରେ ତାଲିକା ପ୍ରକାଶ, ୨୫ ତାରିଖ ପ୍ରାର୍ଥତ୍ପତ୍ର ପ୍ରତ୍ୟାହାର ଏବଂ ଅପରାହ୍ନ ୩ଟା ପରେ ଚୂଡ଼ାନ୍ତ ପ୍ରାର୍ଥୀ ତାଲିକା ପ୍ରକାଶିତ ହେବ। ନିର୍ଦ୍ଧାରିତ ଦିବସରେ ସକାଳ ୭ଟାରୁ ଅପରାହ୍ନ ୧ଟା ଯାଏ ଭୋଟଗ୍ରହଣ ହେବ ବୋଲି ଜିଲା ପଞ୍ଚାୟତ ଅଧିକାରୀ ଚନ୍ଦ୍ରଶେଖର ମହାରଣା ସୂଚନା ଦେଇଛନ୍ତି।
