ଭେଡେନ,୧୩।୫(ହୃଷିକେଶ ଖମାରୀ)-ବରଗଡ଼ ଜିଲା ଭେଡେନ ବ୍ଲକ ଦେଶ ଭଟଲି ପଞ୍ଚାୟତ ଅନ୍ତର୍ଗତ ବିଶିପାଲି ଗ୍ରାମ ରାସ୍ତା ଉପରେ ଠିକାଦାର କଲର୍ଭଟ ନିର୍ମାଣ ଆରମ୍ଭ କରିବା ସମୟରେ ଜେସିବିରେ ମେଗା ପାନୀୟଜଳ ପ୍ରକଳ୍ପ ପାଇପ ଫାଟି ଯାଇ ଉକ୍ତ ଗ୍ରାମକୁ ଦୀର୍ଘ ୯ଦିନ ହେଲା ପାନୀୟଜଳ ଯୋଗାଣ ବନ୍ଦ ରହିଛି । ଏହାର ମରାମତି ନ କରି ସମ୍ପୃକ୍ତ ଠିକାଦାର ଚୁପ୍ ରହିଥିବାରୁ ବିଶିପାଲି ଗ୍ରାମବାସୀଙ୍କୁ ପାନୀୟଜଳ ପାଇଁ ହଟହଟା ହେବାକୁ ପଡୁଛି । ତେବେ ବୁଧବାର ଧରିତ୍ରୀରେ ପାନୀୟଜଳ ଯୋଗାଣ ନ ହେଲେ ଆନ୍ଦୋଳନ ଶୀର୍ଷକ ସଚିତ୍ର ଖବର ପ୍ରକାଶ ପାଇବା ପରେ ପ୍ରଶାସନିକ ତତ୍ପରତା ଦେଖାଇଛି ।
ବୁଧବାର ଭେଡେନ ବ୍ଲକ ଜଳ ଓ ପରିମଳ ବିଭାଗର କନିଷ୍ଠ ଯନ୍ତ୍ରୀ ଅମିତା ସ୍ୱାଇଁ ଘଟଣାକୁ ଗୁରୁତ୍ୱର ସହିତ ନେଇ ମେଗା ପାନୀୟ ଜଳ ବିଭାଗୀୟ ଅଧିକାରୀଙ୍କ ସହ ଯୋଗଯୋଗ କରିବା ପରେ ଘଟଣାସ୍ଥଳକୁ ମେଗା ପାନୀୟ ଜଳ ପ୍ରକଳ୍ପର ଏକ ଟେକନିକାଲ ଟିମ ପହଞ୍ଚି ଶ୍ରମିକମାନଙ୍କ ସହାୟତାରେ ପହଞ୍ଚି ମରାମତି କାର୍ଯ୍ୟ ଆରମ୍ଭ କରିଛନ୍ତି । ଦେଶ ଭଟଲି ସରପଞ୍ଚ ତୋଷବନ୍ତ ସାହୁ, ମେଗା ପାନୀୟ ଜଳ ପ୍ରକଳ୍ପର କନିଷ୍ଠ ଯନ୍ତ୍ରୀ ଶୁଭମ ଦାଶ, ଘଟଣାସ୍ଥଳକୁ ପହଞ୍ଚିଥିଲେ । ମେଗା ପାନୀୟ ଜଳ ପ୍ରକଳ୍ପର ଟେକନିକାଲ ଟିମର ନିର୍ମଳ ମହାନ୍ତିଙ୍କ ପ୍ରତ୍ୟକ୍ଷ ତତ୍ତ୍ଵାବଧାନରେ ଶ୍ରମିକମାନେ ମରାମତି ଆରମ୍ଭ କରିଛନ୍ତି । ଏ ବିଷୟରେ କନିଷ୍ଠ ଯନ୍ତ୍ରୀ ଅମିତା ସ୍ୱାଇଁଙ୍କୁ ପରାକ୍ଷିବାରୁ ବ୍ଲକରେ ତଦନ୍ତ କରିବାରୁ ବ୍ଲକର ଜଣେ କନିଷ୍ଠ ଯନ୍ତ୍ରୀଙ୍କ ନାମରେ କାର୍ଯ୍ୟାଦେଶ ଦିଆଯାଇଥିବା ଜଣାଯାଇ ଥିଲା । ମରାମତି ସରିବା ପରେ ବିଶିପାଲି ଗାଁକୁ ପାନୀୟ ଜଳ ଯୋଗାଣ କରାଯିବ ବୋଲି ସେ କହିଥିଲେ ।