ଗୁଆହାଟୀ, ୪।୯ : ଆସାମରେ ଆତଙ୍କବାଦୀଙ୍କୁ ଦମନ କରିବା ପାଇଁ ନିରନ୍ତର କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ଏପରିସ୍ଥଳେ ଆସାମ ପୋଲିସର ମହାନିର୍ଦ୍ଦେଶକ(ଡିଜିପି) ଭାସ୍କର ଜ୍ୟୋତି ମହନ୍ତ ରବିବାର ରାଜ୍ୟର ବିଭିନ୍ନ ଇସଲାମ ସଂଗଠନକୁ ଭେଟି ଆତଙ୍କବାଦୀଙ୍କୁ ଧରିବା ଲାଗି ସେମାନଙ୍କ ସହାୟତା ଲୋଡିଛନ୍ତି। ସେ ଅଲ-କାଏଦା ଏବଂ ଏବିଟି ପରି ଆତଙ୍କବାଦୀ ମଡ୍ୟୁଲର ପର୍ଦ୍ଦାଫାଶ କରିବା ଲାଗି ସହଯୋଗ କରିବାକୁ କହିଛନ୍ତି।
ଡିଜିପି କହିଛନ୍ତି ଯେ ଆମେ ସାରା ରାଜ୍ୟରେ ଇସଲାମ ସଂଗଠନକୁ ଭେଟି ସେମାନଙ୍କ ସାହାଯ୍ୟ ଲୋଡିଛୁ। ସେମାନଙ୍କ ସହଯୋଗ ବିନା ଆମେ ରାଜ୍ୟରେ ଅଲ-କାଏଦା ଏବଂ ଏବିଟି ମଡ୍ୟୁଲକୁ ବଷ୍ଟ କରିପାରିବୁ ନାହିଁ। ସେମାନଙ୍କର ସମର୍ଥନ ଏବଂ ସହଯୋଗ ବୃଦ୍ଧି କରିବାକୁ ଆମେ ସେମାନଙ୍କୁ ଅନୁରୋଧ କରିଛୁ ଏବଂ ସେମାନେ ସେମାନଙ୍କର ସମର୍ଥନ ବିଷୟରେ ଆମକୁ ନିଶ୍ଚିତ କରିଛନ୍ତି। ସେ ସୂଚନା ଦେଇଛନ୍ତି ଯେ ଆମକୁ ଇନପୁଟ୍ ମିଳିଛି ଯେ କେତେକ ଆତଙ୍କବାଦୀ ଧାର୍ମିକ ଶିକ୍ଷକଙ୍କ ନାମରେ ରାଜ୍ୟରେ ପ୍ରବେଶ କରିଛନ୍ତି। ସେମାନେ ଚୁପ ଚାପ ସେମାନଙ୍କ ରାଜ୍ୟ ବିରୋଧୀ ଷଡ଼ଯନ୍ତ୍ର ଜାରି ରଖିଛନ୍ତି।
ଆସାମର ଡିଜିପି କହିଛନ୍ତି ଯେ ରାଜ୍ୟରେ ହଜାର ହଜାର ବେସରକାରୀ ମଦ୍ରାସା ଅଛି। ସମସ୍ତେ ନିଜ ନିଜ ବିଶ୍ୱାସ ଅନୁଯାୟୀ ବିଭିନ୍ନ ନିୟମ ଉପରେ କାମ କରନ୍ତି । ଆମେ ସମସ୍ତଙ୍କୁ ଅନଲାଇନରେ ସେମାନଙ୍କର ନିୟମ ଅପଲୋଡ କରିବାକୁ କହିଛୁ। ଏଥିପାଇଁ ଆମେ ସେମାନଙ୍କୁ କିଛି ସମୟ ଦେଇଛୁ ।
ଆସାମ ଡିଜିପି କହିଛନ୍ତି ଯେ ବୁଧବାର ରାତିରେ ଅଲ-କାଏଦା ଭାରତୀୟ ଉପମହାଦେଶ (ଏକ୍ୟୁଆଇଏସ) ଏବଂ ଅନସରୁଲ୍ଲା ବଙ୍ଗଳା ଦଳ (ଏବିଟି) ସହ ଜଡିତ ଅଜମଲ ହୁସେନ ନାମକ ଜଣେ ବ୍ୟକ୍ତିଙ୍କୁ ରାଜ୍ୟ ରାଜଧାନୀ ଗୁଆହାଟୀରୁ ଗିରଫ କରାଯିବା ପରେ ଏସମ୍ପର୍କରେ ଅଧିକ ତଥ୍ୟ ଜଣାପଡ଼ିଛି। ଏହାକୁ ନେଇ ଆସାମର କର୍ତ୍ତୃପକ୍ଷ ତିନିଟି ଭିନ୍ନ ଭିନ୍ନ ଜିଲାର ତିନୋଟି ମଦ୍ରାସାକୁ ଭାଙ୍ଗି ଦେଇଥିଲେ। ଏସବୁ ଆତଙ୍କବାଦୀ କାର୍ଯ୍ୟକଳାପରେ ବ୍ୟବହୃତ ହେଉଥିବା ସମ୍ପର୍କରେ ଅଭିଯୋଗ ହୋଇଥିଲା। ପ୍ରମାଣ ମିଳିବା ପରେ ସରକାରଙ୍କ ପକ୍ଷରୁ ଏଭଳି ପଦକ୍ଷେପ ଗ୍ରହଣ କରାଯାଇଥିଲା।
