ଯାଜପୁର ଅଫିସ,୧୫ା୧୧: ପ୍ରଶାସନିକ ଅବହେଳା କାରଣରୁ ଓଡ଼ିଶାର ଜିଲା ଓ ବ୍ଲକଗୁଡ଼ିକର ସୀମାନ୍ତ ଅଞ୍ଚଳକୁ ବିକାଶ ପହଞ୍ଚି ପାରିନାହିଁ। ବିଶେଷକରି ଗମନାଗମନ ଭିତ୍ତିଭୂମି ଅତ୍ୟନ୍ତ ଦୁର୍ବଳ। ସୁଦୃଢ଼ ରାସ୍ତା ଓ ପୋଲ ନିର୍ମାଣ ହୋଇ ପାରି ନ ଥିବାରୁ ସରକାରଙ୍କ ଅନେକ ଲୋକହିତକର ଯୋଜନାର ସୁଫଳ ପାଇବାରୁ ସମ୍ପୃକ୍ତ ସୀମାନ୍ତବର୍ତ୍ତୀ ଅଞ୍ଚଳବାସୀ ବଞ୍ଚିତ ହେଉଛନ୍ତି। ଫଳରେ ସେମାନଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇବାରେ ଲାଗିଛି। କେତେକ ଅଞ୍ଚଳରେ ଲୋକଙ୍କ ମନରେ ସ୍ବତନ୍ତ୍ର ଜିଲା ଗଠନ କରିବାକୁ ଦାବି ମଧ୍ୟ ହେଉଛି। ଏହିକ୍ରମରେ ଯାଜପୁର ଜିଲାର ଗ୍ରାମ୍ୟ ନିର୍ମାଣ ବିଭାଗ ପକ୍ଷରୁ ବଡ଼ଚଣା, ବରୀ, ଧର୍ମଶାଳା, ସୁକିନ୍ଦା, ଦାନଗଦି, କୋରେଇ ଓ ଦଶରଥପୁର ବ୍ଲକ ଅଞ୍ଚଳରେ ୧୨ଟି ଆନ୍ତଃଜିଲା ଏବଂ ୮ଟି ଆନ୍ତଃ ବ୍ଲକ ସୀମାନ୍ତକୁ ସଂଯୋଗ କରୁ ନ ଥିବା ରାସ୍ତା ଚିହ୍ନଟ ହୋଇଛି। ଏଥିରେ ମୋଟ ୬୩ କି.ମି. ସୁଦୃଢ ରାସ୍ତା ନିର୍ମାଣ କରିବାକୁ ଆନୁମାନିକ ଭାବେ ୭୩.୭୭ କୋଟି ଟଙ୍କା ଅଟକଳ କରାଯାଇଛି। ଏହି ରାସ୍ତା ସବୁ ନିର୍ମାଣ କରାଗଲେ ସାଧାରଣ ଲୋକ ବିଶେଷ ଉପକୃତ ହେବେ।
ଯାଜପୁର ଜିଲାରେ ଯାଜପୁର ଗ୍ରାମ୍ୟ ନିର୍ମାଣ ଡିଭିଜନ-୧ ଏବଂ ଜାରକା ଗ୍ରାମ୍ୟ ନିର୍ମାଣ ଡିଭିଜନ-୨ ରହିଛି। ଯାଜପୁର ଡିଭିଜନ-୧ରେ ୯ଟି ସଂଯୋଗ ହେଉ ନ ଥିବା ଆନ୍ତଃଜିଲା ରାସ୍ତା ରହିଛି। ସେଥିମଧ୍ୟରେ କୋରେଇ ବ୍ଲକର ଗୋଦରାପାଳଠାରୁ କେନ୍ଦୁଝର ଜିଲାର ତରୁହଁା ୧ କି.ମି. ରାସ୍ତା ପାଇଁ ୫୦ ଲକ୍ଷ ଟଙ୍କା, ଓସ୍ତପାଳଠାରୁ ଖଜୁରିପଡ଼ା ୧ କି.ମି. ପାଇଁ ୫୦ ଲକ୍ଷ ଓ ଗୋଦରାପାଳଠାରୁ ପଦନା ୨ କି.ମି. ପାଇଁ ୧ କୋଟି, ମଥୁରାପୁର ବ୍ରିଜ୍ଠାରୁ କେନ୍ଦୁଝର ଜିଲା ଡିମିରିଆ ୧ କି.ମି. ରାସ୍ତାକୁ ୭୫ ଲକ୍ଷ, ପତ୍ରକଣାଠାରୁ ସାଇଁପାଳ ୩ କି.ମି. ରାସ୍ତାକୁ ୨.୨୫ କୋଟି ଓ ଗୋଦରାପାଳଠାରୁ ତରୁଆଁ ୨.୫ କି.ମି. ରାସ୍ତାକୁ ୧ କୋଟି ୮୭ ଲକ୍ଷ ୫୦ ହଜାର, ସୁକିନ୍ଦା ବ୍ଲକର ଦେଓଗଁାଠାରୁ କେନ୍ଦୁଝର ଜିଲା ଘସିପୁରା ବ୍ଲକର ବାଙ୍ଗରକୋଟା ୨.୫ କି.ମି. ପାଇଁ ୧.୨୫ କୋଟି ଟଙ୍କା, ଦଶରଥପୁର ବ୍ଲକ କଲ୍ୟାଣ(ଏନଏଚ-୨୦)ଠାରୁ ଭଦ୍ରକ ଜିଲା ଇଚ୍ଛାପୁର ପର୍ଯ୍ୟନ୍ତ ୬.୩୨ କି.ମି. ପାଇଁ ୫.୭ କୋଟି ଟଙ୍କା ଏବଂ ଆରଆଣ୍ଡବି ରାସ୍ତାଠାରୁ ଉଚ୍ଛବାଲି ୨.୪୯ କି.ମି. ରାସ୍ତା ପାଇଁ ୧ କୋଟି ୮୬ ଲକ୍ଷ ୭୫ ହଜାର ଟଙ୍କା ଅଟକଳ ହୋଇଛି। ସେହିପରି ଜାରକା ଡିଭିଜନ ପକ୍ଷରୁ ଧର୍ମଶାଳା ବ୍ଲକର ତରୁଅଙ୍ଗାଠାରୁ ଢେଙ୍କାନାଳ ଜିଲା ନେଥେକା ୧.୫ କି.ମି. ରାସ୍ତାକୁ ୭୦ ଲକ୍ଷ, ତେନ୍ତୋଲଠାରୁ ନିହଲପ୍ରସାଦ ୨.୫ କି.ମି. ରାସ୍ତା ପାଇଁ ୧.୩ କୋଟି ଓ ବଡ଼ଚଣା ବ୍ଲକ କଳକଳାଠାରୁ ଖଙ୍କିରା ୩ କି.ମି. ରାସ୍ତାକୁ ୧.୭ କୋଟି ଟଙ୍କା ବ୍ୟୟ ଅଟକଳ ହୋଇଛି। ଏହାବାଦ୍ ଜିଲା ମଧ୍ୟରେ ଗୋଟିଏ ବ୍ଲକରୁ ଅନ୍ୟବ୍ଲକ ସୀମାନ୍ତକୁ ମଧ୍ୟ ଏଯାଏ ରାସ୍ତା ସଂଯୋଗ ନହେବା ବିଡ଼ମ୍ବନା ବୋଲି କୁହାଯାଉଛି। ଏଥିରେ ଦାନଗଦି ଓ ସୁକିନ୍ଦା ବ୍ଲକର ଡୁବୁରୀଠାରୁ ପାଟପୁର ରାସ୍ତା ଓ ଡୁବୁରୀ-ମଣ୍ଡପଡା, କୋରେଇ ଓ ରସୁଲପୁର ବ୍ଲକ ଭିକିପୁରଠାରୁ ପହଙ୍ଗା ରାସ୍ତା, କୋରେଇ ଓ ଦାନଗଦି ବ୍ଲକର ଏନଏଚ-୨୧୫ଠାରୁ ଗହିରାପୁଟୁଲି ରାସ୍ତା, କୋରେଇ ଓ ସୁକିନ୍ଦା ବ୍ଲକର ଜୋକଡିଆଠାରୁ ନେଳିବାଡି, ବରୀ ବ୍ଲକର ଏରଡ଼ାଠାରୁ ବୋଦୁଅ, ଦଶରଥପୁର ବ୍ଲକର ଅରେଇ-ଗୁହାଳିଠାରୁ ବଡ଼ସିଂଘରା ଏବଂ ବଡ଼ଚଣା ବ୍ଲକର ମଙ୍ଗରାଜପୁରଠାରୁ ପୋବଳ ଗ୍ରାମକୁ ରାସ୍ତା ସଂଯୋଗ ହୋଇପାରିନାହିଁ।
