ନୂଆଦିଲ୍ଲୀ,୨୩।୪: ଆଇପିଏଲ୍ ଆରମ୍ଭ ହେବା ସମୟରେ ଏହା କେବଳ ଟଙ୍କା କମାଇବାର ଏକ ରୋମାଞ୍ଚକ ଲିଗ୍ ଥିଲା। ହେଲେ ବିଗତ କିଛି ବର୍ଷ ମଧ୍ୟରେ ବଦଳିଛି ଏହାର ପରିଭାଷା। କାରଣ ଏଠାରେ ଅନେକ ଖେଳାଳିଙ୍କ କ୍ୟାରିୟର ନିର୍ମାଣ ହେଉଛି। ଟୁର୍ନାମେଣ୍ଟ ଖେଳାଳିଙ୍କୁ ଭିନ୍ନ ପରିଚୟ ଦେଉଛି। ସେଭଳି ଭାବେ ଗୁରୁବାର ମୁମ୍ବାଇର ଓ୍ବାଙ୍ଖଡେ ଷ୍ଟାଡିୟମରେ ଜଣେ ବ୍ୟାଟ୍ସମ୍ୟାନ୍ ଉଲ୍ଲେଖନୀୟ ବ୍ୟାଟିଂ କରି ବାହାବା ସାଉଁଟିଛନ୍ତି। ଗତବର୍ଷ ଏହି ଟୁର୍ନାମେଣ୍ଟ ଯୋଗୁ ହିଁ ସେ ଚର୍ଚ୍ଚାକୁ ଆସିଥିଲେ। ଆମେ କଥା ହେଉଛୁ ଦେବଦତ୍ତ ପଡ଼ିକାଲଙ୍କ କଥା। ରାଜସ୍ଥାନ ରୟାଲ୍ସ ବିପକ୍ଷ ମ୍ୟାଚ୍ରେ ଦେବଦତ୍ତ ସ୍ମରଣୀୟ ଇଂନିସ ଖେଳି ଚଳିତ ଆଇପିଏଲ୍ରେ ନିଜର ଅଭିଯାନ ଆରମ୍ଭ କରିଛନ୍ତି।
ରାଜସ୍ଥାନ ଟିମ୍ ୨୦ ଓଭରରେ ୯ ଉଇକେଟ ହରାଇ ୧୭୭ରନ୍ କରିଥିଲା। ଜବାବରେ ବିରାଟ କୋହଲିଙ୍କ ଦଳ କୌଣସି ଉଇକେଟ ନ ହରାଇ ୧୬.୩ ଓଭରରେ ୧୮୧ରନ୍ ସଂଗ୍ରହ କରିନେଇଛି। ୨୧ ବଲ୍ ବାକିଥାଇ ୧୦ ଉଇକେଟରେ ବିଜୟ ସହ ଆର୍ସିବି ପଏଣ୍ଟ ଟେବୁଲର ଶୀର୍ଷକୁ ପୁଣି ଫେରିଛି। ଏହି ବିଜୟରେ ଦୁଇ ଓପନର୍ସ କୋହଲି-ପଡ଼ିକାଲଙ୍କ ଯୋଗଦାନ ଥିଲା। ସେ ନିଜର କ୍ୟାରିୟରର ପ୍ରଥମ ଶତକ ମାରିଥିଲେ।
ଗତ ସିଜିନରେ ପଡିକାଲ ବାଙ୍ଗାଲୋର ଟିମ୍ରେ କର୍ନାଟକରୁ ଖେଳୁଥିବା ଏକମାତ୍ର ଖେଳାଳି ଥିଲେ। ଏହି ୨୦ ବର୍ଷୀୟ ବ୍ୟାଟ୍ସମ୍ୟାନ୍ ୨୦୦୦ ଜୁଲାଇ ୭ରେ ଜନ୍ମଗ୍ରହଣ କରିଥିଲେ। ବାମହାତୀ ବ୍ୟାଟ୍ସମ୍ୟାନ୍ ପଡ଼ିକାଲ ପ୍ରଥମରୁ କ୍ରିକେଟ ପ୍ରତି ଆକର୍ଷିତ ଥିଲେ। ତାଙ୍କୁ ୧୧ ବର୍ଷ ହୋଇଥିବା ବେଳେ ପରିବାରଲୋକେ ବାଙ୍ଗାଲୋର ଚାଲିଯାଇଥିଲେ। ସେଠାରେ ସେ ପ୍ରଥମେ କ୍ରିକେଟ ଏକାଡେମୀ ଖୋଜିଥିଲେ। ସେତେବେଳ ସମୟରୁ ସେ ଅଧିନାୟକ ବିରାଟଙ୍କ ବଡ଼ ପ୍ରଶଂସକ ଥିଲେ।
୨୦୧୯ ଆଇପିଏଲ୍ ନିଲାମରେ ବାଙ୍ଗାଲୋର ଏହି ଯୁବ ବ୍ୟାଟ୍ସମ୍ୟାନ୍ଙ୍କୁ ୨୦ ଲକ୍ଷ ଟଙ୍କାରେ କିଣିଥିଲା। ହେଲେ ଏହି ସିଜିନ୍ରେ ତାଙ୍କୁ ଖେଳିବାକୁ ସୁଯୋଗ ମିଳି ନ ଥିଲା। ପରେ ଦେବଦତ୍ତ ପୁଣି ଥରେ ଘରୋଇ କ୍ରିକେଟରେ ଭଲ ପ୍ରଦର୍ଶନ କରିଥିଲେ। ଫଳରେ ତାଙ୍କୁ ବାଙ୍ଗାଲୋର ଟିମ୍ ଅପରିବର୍ତ୍ତିତ ରଖିଥିଲା। ୨୦୨୦ରେ ସେ ଆଇପିଏଲ୍ର ୧୫ ମ୍ୟାଚ୍ ଖେଳିଥିଲେ। ସେଥିରେ ସେ ୪୭୩ ରନ୍ କରିଥିଲେ। ଏଥିରେ ୫ ଅର୍ଦ୍ଧଶତକ ଥିଲା।
ଚଳିତ ଆଇପିଏଲ୍ ଆରମ୍ଭ ହେବାର ଠିକ୍ ପୂର୍ବରୁ ପଡ଼ିକାଲ କରୋନା ସଂକ୍ରମିତ ହୋଇଥିଲେ। ସେ ପୁନର୍ବାର ଫିଟ୍ ହେବା ପରେ ଗୁରୁବାର ସିଜିନ୍ର ପ୍ରଥମ ମ୍ୟାଚ୍ ଖେଳି ଶତକ ମାରିଥିଲେ। ମ୍ୟାଚ୍ ବିଜୟୀ ଇନିଂସ ପାଇଁ ସେ ମ୍ୟାନ୍ ଅଫ୍ ଦ ମ୍ୟାଚ୍ ବିବେଚିତ ହୋଇଥିଲେ।
