ମାଲକାନଗିରି, ୨୨ା୮ (ଡି.ଏନ୍.ଏ.): ମାଲକାନଗିରି ଜିଲା ଡେପୁଟି କଲେକ୍ଟର ସ୍ତ୍ରୀଙ୍କ ନାମରେ ରାଶନ କାର୍ଡ କରି ଜମି ଖଜଣା ବାବଦକୁ ଅର୍ଥ କମ୍ ଦେଇ ପଟ୍ଟା ହାତେଇବା ଘଟଣା ଶନିବାର ଜଣାପଡ଼ିବା ପରେ ଉକ୍ତ କାର୍ଡକୁ ରବିବାର ରଦ୍ଦ କରାଯାଇଛି। ସେ କିପରି କାର୍ଡ ପାଇଲେ ଏବଂ ଏଥିରେ କେଉଁମାନେ ସମ୍ପୃକ୍ତ ତା’ର ତଦନ୍ତ କରାଯାଇ ସମସ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଲାଗି ରାଜ୍ୟ ସରକାରଙ୍କୁ ଅବଗତ କରାଯିବ ବୋଲି ମାଲକାନଗିରି ବ୍ଲକ ଯୋଗାଣ ଅଧିକାରୀ ହୃଷୀକେଶ ନାୟକ କହିଛନ୍ତି।
ଖବରରୁ ଜଣାପଡିଛି, ମାଲକାନଗିରି ଜିଲାପାଳଙ୍କ କାର୍ଯ୍ୟାଳୟରେ ଡେପୁଟି କଲେକ୍ଟର ଭାବେ କାର୍ଯ୍ୟ କରୁଥିବା ଲଳିତ ମଣ୍ଡଳଙ୍କ ସ୍ତ୍ରୀଙ୍କ ନାମରେ ରାଶନ କାର୍ଡ ପ୍ରସ୍ତୁତ କରାଯାଇ ପୌର ପରିଷଦ ଲାଣ୍ଡ ରାଇଟ ଜମି ପ୍ରମାଣ ପତ୍ର ପାଇଁ ୧୦,୮୦୦ ଟଙ୍କା ଖଜଣା ଆକାରରେ ଦେଇ ଜମି ପ୍ରମାଣପତ୍ର ପାଇଥିଲେ। ତେବେ ସରକାରଙ୍କ ନିୟମ ଅନୁଯାୟୀ ଗରିବ ଲୋକେ ରାଶନ କାର୍ଡ ପାଇବା କଥା। ରାଶନ କାର୍ଡଧାରୀ ୧୦,୮୦୦ ଟଙ୍କା ଜମି ପ୍ରମାଣପତ୍ର ପାଇଁ ଦେବାର ନିୟମ ଥିବା ବେଳେ ସ୍ବଚ୍ଛଳ ଲୋକଙ୍କୁ ଏହି ପ୍ରମାଣପତ୍ର ପାଇଁ ପ୍ରାୟ ୬୫,୦୦୦ ଟଙ୍କା ଖଜଣା ଆକାରରେ ଦେବାକୁ ପଡିବ ବୋଲି ନିୟମ ରହିଛି। ଏହି ଅଧିକ ଖଜଣାରୁ ବର୍ତ୍ତିବା ପାଇଁ ମଣ୍ଡଳଙ୍କ ସ୍ତ୍ରୀ ବିନୋତାରାନୀ ମଣ୍ଡଳଙ୍କ ନାମରେ ଥିବା ରାଶନ କାର୍ଡକୁ ବ୍ୟବହାର କରାଯାଇଛି। ମାଲକାନଗିରି ସହରରେ ବିଭିନ୍ନ ବସ୍ତିରେ ମୂଳନିବାସୀ ଭାବେ ବର୍ଷ ବର୍ଷ ଧରି ଅନେକ ବ୍ୟକ୍ତି ସରକାରୀ ଜମିରେ ବସବାସ କରୁଛନ୍ତି। ସେମାନଙ୍କ ମଧ୍ୟରୁ ଅନେକଙ୍କୁ ଏପର୍ଯ୍ୟନ୍ତ ରାଶନ କାର୍ଡ କିମ୍ବା ଘରଡିହ ପଟ୍ଟା ମିଳି ନ ଥିବା ବେଳେ ଜଣେ ଉଚ୍ଚପଦସ୍ଥ ସରକାରୀ ଅଧିକାରୀ କିପରି ନିଜ ସ୍ତ୍ରୀଙ୍କ ନାମରେ ରାଶନ କାର୍ଡ କରି ସରକାରୀ ସୁବିଧା ନେଲେ ସେ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଅନ୍ୟପକ୍ଷରେ ଆଇନଜୀବୀ ତଥା ନାଗରିକ ସୁରକ୍ଷା ମଞ୍ଚ ସଦସ୍ୟ ରାମ ପଟ୍ଟନାୟକ ଏହାର ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି।
