ଜଗତ୍ସିଂହପୁର ଅଫିସ, ୨୪ା୧:ଜଗତ୍ସିଂହପୁର ଜିଲାର ଏକ ପୁରାତନ ମହାବିଦ୍ୟାଳୟକୁ ପ୍ରବେଶ କରିବାକୁ ହେଲେ ବାଳିକାମାନଙ୍କୁ ଅତି କମ୍ରେ ସେମାନଙ୍କର ଜଣେ ପୁରୁଷ ବନ୍ଧୁ ବାଛିବାକୁ ପଡ଼ିବ। ଗତ ୨୦ ତାରିଖରୁ ସାମାଜିକ ଗଣମାଧ୍ୟମରେ ଏଭଳି ମିଥ୍ୟା ନୋଟିସ୍ ଭାଇରାଲ ହୋଇଛି। ଏହି ନୋଟିସ୍ ମହାବିଦ୍ୟାଳୟ ପକ୍ଷରୁ ଜାରି କରାଯାଇ ନାହିଁ ବୋଲି ମହାବିଦ୍ୟାଳୟ ଅଧ୍ୟକ୍ଷ କହିଛନ୍ତି। ମହାବିଦ୍ୟାଳୟକୁ ବଦନାମ କରିବା ପାଇଁ ତାଙ୍କ ଦସ୍ତଖତକୁ ଟାମ୍ପରିଂ କରାଯାଇ ଉକ୍ତ ନୋଟିସ୍କୁ ଭାଇରାଲ କରାଯାଇଥିବା ଅଧ୍ୟକ୍ଷ କହିଛନ୍ତି। ତାଙ୍କ କହିବାନୁଯାୟୀ, ମହାବିଦ୍ୟାଳୟର ଉନ୍ନତି ସାଙ୍ଗକୁ ଛାତ୍ରୀଛାତ୍ରଙ୍କ ଶୈକ୍ଷିକ ବିକାଶ ପାଇଁ ସେ ବଦ୍ଧ ପରିକର। ମାତ୍ର କୌଣସି ବ୍ୟକ୍ତି ମହାବିଦ୍ୟାଳୟର ପ୍ରତିଷ୍ଠା, ଭାବମୂର୍ତ୍ତି ଓ ତାଙ୍କ ବ୍ୟକ୍ତିତ୍ୱକୁ ନଷ୍ଟ କରିବା ପାଇଁ ଏଭଳି ହୀନ କାର୍ଯ୍ୟ କରିଛନ୍ତି। ଭାଇରାଲ ନୋଟିସ୍ ଉପରେ ସେ କହିଛନ୍ତି, ମହାବିଦ୍ୟାଳୟ ପକ୍ଷରୁ ଦିଆଯାଉଥିବା ଚିଠିର ଲେଟର ହେଡ୍ ଓ ଭାଇରାଲ ହୋଇଥିବା ଲେଟର ହେଡ୍ ଅଲଗା ରହିଛି। ଏହାଛଡ଼ା ମହାବିଦ୍ୟାଳୟ ପକ୍ଷରୁ କୌଣସି ନୋଟିସ୍ ହେଲେ ସେଥିରେ ଚିଠି ନମ୍ବର ପଡ଼ିଥାଏ। କିନ୍ତୁ ଭାଇରାଲ ନୋଟିସ୍ରେ ତାହା ନାହିଁ। କେହି ତାଙ୍କ ଦସ୍ତଖତକୁ ନୋଟିସ୍ ବୋର୍ଡ କିମ୍ବା ଅନ୍ୟ ମାଧ୍ୟମରେ ସଂଗ୍ରହ କରି ଏଭଳି ମିଥ୍ୟା ନୋଟିସ୍ ପ୍ରସ୍ତୁତ କରିଥାଇ ପାରନ୍ତି ବୋଲି ଅଧ୍ୟକ୍ଷ କହିଛନ୍ତି। ଏହା ଜାଣିଲା ପରେ ସେ ମହାବିଦ୍ୟାଳୟ ସଭାପତିଙ୍କ ସହ ଯୋଗାଯୋଗ କରିଥିଲେ। ସଭାପତିଙ୍କ ପରାମର୍ଶକ୍ରମେ ସେ ରବିବାର ଜଗତ୍ସିଂହପୁର ଥାନା ଆଇଆଇସି ଓ ଗୋଇନ୍ଦା ବିଭାଗ ସହ ମୋବାଇଲ ଯୋଗେ ଯୋଗାଯୋଗ କରିଛନ୍ତି। ମହାବିଦ୍ୟାଳୟ ଓ ତାଙ୍କୁ ବଦନାମ କରିଥିବା ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ଅଧ୍ୟକ୍ଷ ଦାବି କରିଛନ୍ତି।
ସୂଚନାଯୋଗ୍ୟ, ଉକ୍ତ ଭାଇରାଲ ନୋଟିସ୍ରେ ଉଲ୍ଲେଖ ଥିଲା କୌଣସି ବାଳିକା ତାଙ୍କ ପୁରୁଷ ବନ୍ଧୁଙ୍କ ସହ ସଦ୍ୟ ଫଟୋ ଉଠାଇଥିବା ଦରକାର। ମହାବିଦ୍ୟାଳୟ ଭିତରକୁ ପ୍ରବେଶ କରିବାକୁ ହେଲେ ଏହା ଦେଖାଇବାକୁ ପଡ଼ିବ। ପ୍ରେମ ସମ୍ପର୍କକୁ ବ୍ୟାପକ କରିବା ପାଇଁ ଏଭଳି ନିଷ୍ପତ୍ତି ନିଆଯାଇଛି। ଆସନ୍ତା ଫେବୃୟାରୀ ୧୪ ସୁଦ୍ଧା ପ୍ରତ୍ୟେକ ବାଳିକା ସେମାନଙ୍କର ପୁରୁଷ ବନ୍ଧୁଙ୍କ ସହ ଫଟୋ ପ୍ରସ୍ତୁତ କରିବା ବାଧ୍ୟତାମୂଳକ। ସାମାଜିକ ଗଣମାଧ୍ୟମରେ ଏଭଳି ଚିନ୍ତାଜନକ ନୋଟିସ୍ ଭାଇରାଲ ହେଲା ପରେ ସାରା ଜିଲାରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି।
