ନାଉଗଁା,୨୩ା୧୧(ସ୍ବ.ପ୍ର): ନାଉଗଁା ତହସିଲ ଅନ୍ତର୍ଗତ ଜାମୁଗଁାସ୍ଥିତ ଉପସ୍ବାସ୍ଥ୍ୟକେନ୍ଦ୍ର ଭଙ୍ଗା ଓ ଏହାର ନିକଟରେ ଥିବା ଗଛା କଟାକୁ ବନ୍ଦ କରିବା ଦାବିରେ ମଙ୍ଗଳବାର ଗ୍ରାମବାସୀଙ୍କ ପକ୍ଷରୁ ପ୍ରତିବାଦ କରାଯାଇଛି। ଏ ନେଇ ତହସିଲ ପ୍ରଶାସନ ପକ୍ଷରୁ ଗଛ କଟାକୁ ସ୍ଥଗିତ ରଖାଯାଇଛି। ଏ ସମ୍ପର୍କରେ ୨ ଦିନ ପରେ ଗ୍ରାମବାସୀଙ୍କ ସହ ଆଲୋଚନା ହେବ ବୋଲି ନିଷ୍ପତ୍ତି ହୋଇଛି।
ଜାମୁଗଁା ଉପସ୍ବାସ୍ଥ୍ୟକେନ୍ଦ୍ରର ଗୃହ ଭାଙ୍ଗିରୁଜି ଯାଇଛି। ଏହାର ନୂତନ ଗୃହ ନିର୍ମାଣ ପାଇଁ ଜିଲା ଗ୍ରାମ ଉନ୍ନୟନ ବିଭାଗ ପକ୍ଷରୁ ଏ ନେଇ ଟେଣ୍ଡର କରାଯାଇଛି। ଏବେ ନୂତନ ଗୃହ ନିର୍ମାଣ ପାଇଁ ବିଭାଗ ପକ୍ଷରୁ ପ୍ରକ୍ରିୟା ଆରମ୍ଭ ହୋଇଛି। ଏହି ସ୍ବାସ୍ଥ୍ୟକେନ୍ଦ୍ରର ଗୃହ ଭଙ୍ଗାଯାଇ ସେଠାରେ ନୂତନ କେନ୍ଦ୍ର କରିବାକୁ ଯୋଜନା କରାଯାଇଛି। ଏ ନେଇ ପ୍ରଶାସନ ପକ୍ଷରୁ ମଙ୍ଗଳବାର ଉକ୍ତ କେନ୍ଦ୍ର ଓ ନିକଟରେ ଥିବା ୨ ବଡ଼ ଚାକୁଣ୍ଡା ଗଛକୁ କଟାଯିବା ପାଇଁ ଉଦ୍ୟମ କରାଯାଇଥିଲା। ଏହାକୁ ଗ୍ରାମବାସୀ ବିରୋଧ କରିଛନ୍ତି।
ଗ୍ରାମବାସୀ ଅନୁପ ମହାନ୍ତିଙ୍କ ସୂଚନା ମୁତାବକ, ପୂର୍ବରୁ ଏହି ଉପସ୍ବାସ୍ଥ୍ୟ କେନ୍ଦ୍ରର ମରାମତି ପାଇଁ ଗ୍ରାମ ଉନ୍ନୟନ ବିଭାଗ ପକ୍ଷରୁ ୨୦୧୯-୨୦ ଆର୍ଥିକ ବର୍ଷରେ ୧ ଲକ୍ଷ ୫୦ ହଜାର ଟଙ୍କା ଓ ୨୦୨୦-୨୧ ଆର୍ଥିକ ବର୍ଷରେ ପଞ୍ଚାୟତ ପକ୍ଷରୁ ୨ଲକ୍ଷରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ କରାଯାଇଥିଲା। ୨ ବର୍ଷରେ ମରାମତି ନାମରେ ୩ ଲକ୍ଷରୁ ଉର୍ଦ୍ଧ୍ୱ ଟଙ୍କା ଖର୍ଚ୍ଚ କରାଯାଇଥିବା ବେଳେ ବର୍ତ୍ତମାନ ଏହି କେନ୍ଦ୍ରକୁ କାହିଁକି ଭଙ୍ଗାଯାଉଛି। ସେହିପରି ସରକାରୀ ସ୍ଥାନରେ ଥିବା ଗଛକୁ ବିନା କାରଣରେ ପ୍ରଶାସନ ପକ୍ଷରୁ କଟାଯିବାକୁ ଉଦ୍ୟମ କରାଯାଉଛି। ନୂତନ ଉପସ୍ବାସ୍ଥ୍ୟ କେନ୍ଦ୍ର ନିର୍ମାଣ ପାଇଁ ପୂର୍ବରୁ ସ୍ଥାନୀୟ ସରପଞ୍ଚ ଓ ରାଜସ୍ବ ନିରୀକ୍ଷକ ଅନ୍ୟ ଏକ ସ୍ଥାନ ଚିହ୍ନଟ କରିଥିଲେ। ମାତ୍ର ଏବେ ପୂରୁଣା ସ୍ବାସ୍ଥ୍ୟକେନ୍ଦ୍ର ଗୃହ ଭାଙ୍ଗି ସେଠାରେ ନୂତନ କରିବାକୁ ଉଦ୍ୟମ କରାଯାଉଥିବାରୁ ବିରୋଧ କରାଯାଉଛି ବୋଲି ଗ୍ରାମର ଅନୁୁପ ମହାନ୍ତି, ଦୀଲିପ ପାଢୀ, ଜୀବନ ଜ୍ୟୋତି ପରିଡା,ରିତୁରାଜ ମହାନ୍ତି ପ୍ରମୁଖ କହିଛନ୍ତି। ଖବରପାଇ ଘଟଣାସ୍ଥଳରେ ତହସିଲଦାର ଜେ.କଳ୍ପନା ଓ ଥାନାଧିକାରୀ ଅନିରୁଦ୍ଧ ନାୟକ ପହଞ୍ଚତ୍ ଗ୍ରାମବାସୀ ବୁଝାଶୁଝା କରିଛନ୍ତି।
