ମଙ୍ଗୁଳି-ଜଗତପୁର, ୨୫।୪(ଡି.ଏନ୍.ଏ.): ଟାଙ୍ଗୀ-ଚୌଦ୍ୱାର ବ୍ଲକ ଅଧୀନ ବାଣୀପଦା ପଞ୍ଚାୟତର ସୀମାନ୍ତରେ ଦୀର୍ଘ ମାସ ହେବ ଚୌଦ୍ୱାରସ୍ଥିତ ଏକ ଘରୋଇ କମ୍ପାନୀରୁ ବାହାରୁଥିବା କୋଇଲା ପାଉଁଶ ପକାକୁ ବିରୋଧ କରି ଏଠାରେ ନ ପକାଇବାକୁ ଦାବି ହୋଇଛି। ଏ ନେଇ ସ୍ଥାନୀୟ ସମିତି ସଭ୍ୟ, ସରପଞ୍ଚ ଓ ଗ୍ରାମବାସୀ ସୋମବାର ଅତିରିକ୍ତ ତହସିଲଦାରଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି। ଦାବିପତ୍ରରେ ଉଲ୍ଲେଖ ଅଛି ଯେ, ସ୍ଥାନୀୟ ଘରୋଇ କମ୍ପାନୀର ବର୍ଜ୍ୟବସ୍ତୁ ଯାହାକି କୋଇଲା ପୋଡ଼ିଗଲା ପରେ ପାଉଁଶକୁ ଆମ ଗ୍ରାମର ସୀମାନ୍ତରେ ପ୍ରତିଦିନ ଡମ୍ଫରରେ ଆଣି ପକାଯାଉଛି। ଏହି ସବୁ ସ୍ଥାନକୁ ଗ୍ରାମସଭା ଦ୍ୱାରା ଶିଳ୍ପ ପ୍ରତିଷ୍ଠା ପାଇଁ ସରକାରଙ୍କ ଇଡ୍କୋକୁ ଦିଆଯାଇଥିଲା। ଏଠାରେ ଶିଳ୍ପ ହେବା ପରିବର୍ତ୍ତେ କମ୍ପାନୀର ବର୍ଜ୍ୟବସ୍ତୁ ଢାଳିବା ପାଇଁ ଅନୁମତି ଦିଆଯାଇଛି। ଏହି କୋଇଲା ପାଉଁଶ ସାମାନ୍ୟ ପବନ ହେଲେ ଉଡି ଚାଷ ଜମି, ପୋଖରୀ, ରାସ୍ତାଘାଟ ଏବଂ ଖାଦ୍ୟ ପଦାର୍ଥରେ ମିଶୁଛି। ଯାହାର ପରିଣାମ ସ୍ବରୂପ ଚାଷ ଜମିରେ ଫସଲ ହାନି ଶହ ଲୋକମାନେ ନାନାଧି ରୋଗର ଶିକାର ହେଉଛନ୍ତି। ବର୍ଷାଦିନେ ଉକ୍ତ ପାଉଁଶରୁ ବାହାରୁଥିବା ବିଷାକ୍ତ ପାଣି ଫସଲ ନଷ୍ଟ କରିବା ସହ ଛତିଶାପାଟରେ ମିଶିବା ଦ୍ୱାରା ଗୃହପାଳିତ ପଶୁ ସେହି ପାଣିକୁ ପିଇ ବିଭିନ୍ନ ରୋଗରେ ଆକ୍ରାନ୍ତ ହୋଇ ମୃତ୍ୟମୁଖେ ପଡୁଛନ୍ତି। ବିଗତ କିଛି ମାସ ତଳେ ଛତିଶା ପାଟରେ ମାଛ ମଡ଼କ ତାହାର ଜ୍ୱଳନ୍ତ ଉଦାହରଣ। ଏଣୁ ଏହାକୁ ତୁରନ୍ତ ବନ୍ଦ କରିବା ପାଇଁ ଇଡ୍କୋକୁ ନିଦ୍ଦେଶ ଦିଅନ୍ତୁ। ଏ ନେଇ ତହସିଲଦାର କହିଛନ୍ତି, ଆର୍ଆଇଙ୍କୁ ସ୍ପଟକୁ ଯାଇ ତଦନ୍ତ କରି ୭ଦିନ ମଧ୍ୟରେ ରିପୋର୍ଟ ପାଇଁ ନିର୍ଦ୍ଦେଶ ଦିଆଯାଇଛି। ଆର୍ଆଇ ରିପୋର୍ଟ ଆସିବା ପରେ ଯଦି ସେପରି ସତ୍ୟ ଥାଏ, ତେବେ ଇଡ୍କୋ ଅଧିକାରୀଙ୍କ ସହ ଆଲୋଚନା କରିବା ସହ ଅଭିଯୋଗର ନିଷ୍କର୍ଷ ବାହାର କରାଯିବ। ଏହି ଦାବିପତ୍ର ପ୍ରଦାନ ବେଳେ ସମିତିଭ୍ୟ ସୁରେନ୍ଦ୍ର ସାମଲ, ସରପଞ୍ଚ ଦିଲୀପ ଭୋଇ, ସୁବାସ ମହନ୍ତ, ସନାତନ ସାମଲ, ସୁବାସ ମହନ୍ତ ପ୍ରମୁଖ ଉପସ୍ଥିତ ଥିଲେ ।
