ଅମରପାଲି,୭।୧୦(ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ତହସିଲ ଅନ୍ତର୍ଗତ ଜଟେସିଂହା ପଞ୍ଚାୟତର କୁଡ଼ାପଡ଼ା ଗ୍ରାମରେ ବ୍ୟାପକ ଭାବେ ସରକାରୀ ଜମି ଜବରଦଖଲ ହୋଇଥିବା ଅଭିଯୋଗ ହୋଇଛି । ଏଥିଯୋଗୁ ଯିବାଆସିବା ତଥା ରାସ୍ତାଘାଟ ଆଦି ବିଭିନ୍ନ କ୍ଷେତ୍ରରେ ଗ୍ରାମବାସୀ ବହୁ ଅସୁବିଧାର ସମ୍ମୁଖିନ ହେଉଛନ୍ତି । ଏଥିପାଇଁ ଗ୍ରାମବାସୀ ଏକ ବୈଠକ କରି ସ୍ବତଃପ୍ରବୃତ୍ତ ଭାବରେ ନିଜେ ନିଜେ ଜବରଦଖଲ କରିଥିବା ସରକାରୀ ଜମି ଛାଡ଼ିଦେବାକୁ ନିଷ୍ପତ୍ତି ନେଇଛନ୍ତି । ଗ୍ରାମବାସୀ ସରକାରୀ ଜମି ଚିହ୍ନଟ ଓ ଉଚ୍ଛେଦ ପାଇଁ ଦାବି କରି ସୋମବାର ସ୍ଥାନୀୟ ତହସିଲ କାର୍ଯ୍ୟାଳୟକୁ ଆସି ତହସିଲଦାରଙ୍କ ଠାରେ ଫେରାଦ ଦେଇଥିବା ଜଣାପଡ଼ିଛି। ଗ୍ରାମବାସୀ ଯଥାଶୀଘ୍ର ଗ୍ରାମର ସମସ୍ତ ଗୋଚର, ଅନାବାଦୀ ଆଦି ସରକାରୀ ଜମିଗୁଡ଼ିକୁ ଚିହ୍ନଟ ଓ ଉଚ୍ଛେଦ କରାଯିବାକୁ ଦାବି କରିଥିଲେ । ତହସିଲଦାରଙ୍କ ଅନୁପସ୍ଥିତିରେ ଅତିରିକ୍ତ ତହସିଲଦାର ସ୍ବାଗତ ପଣ୍ଡା ଦାବିପତ୍ର ଗ୍ରହଣ କରିଥିଲେ ଓ ତହସିଲଦାରଙ୍କ ସହ ଆଲୋଚନା କରି ଶୀଘ୍ର ଏ ଦିଗରେ ପଦକ୍ଷେପ ଗ୍ରହଣ ପାଇଁ ପ୍ରତିଶ୍ରୁତି ଦେଇଥିବା ଗ୍ରାମବାସୀ ପ୍ରକାଶ କରିଛନ୍ତି । ଗ୍ରାମର ସଞ୍ଜୀବ କୁମାର ବିଶାଳ, କଳାକାହ୍ନୁ ବିଶାଳ, ବିଦେଶୀ ବିଶାଳ, ଜ୍ୟୋତିଲାଲ ବିଶାଳ, ବସନ୍ତ ପଧାନ,ଝରିଆ ସାହୁ ପ୍ରମୁଖଙ୍କ ସମେତ ଶତାଧିକ ବ୍ୟକ୍ତି ଦାବିପତ୍ର ଦେବାକୁ ଆସିଥିଲେ।
Dharitri – Odisha’s No.1 Trusted Odia Daily
