ଭୋପାଳ,୨୯ା୧୧: ମଧ୍ୟପ୍ରଦେଶ ଏବଂ ଛତିଶଗଡ଼ରେ ମିଳୁଥିବା ଚିକେନ୍ର ଏକ ବିଶେଷ ପ୍ରଜାତିର ନାଁ କଡ଼କନାଥ। ବର୍ତ୍ତମାନ ବଜାରରେ ଏହାର ଚାହିଦା ବୃଦ୍ଧି ପାଇଛି। ମଧ୍ୟପ୍ରଦେଶର ଆଦିବାସୀ ବାହୁଲ ଜାବୁଆ ଜିଲାରେ ମିଳୁଥିବା ଏହା ଏକ ନିଆରା କଳା ରଙ୍ଗର କୁକୁଡ଼ା।
ସରକାରୀ ଅଧିକାରୀଙ୍କ କହିବାନୁସାରେ, କରୋନା ସଂକ୍ରମଣ ବୃଦ୍ଧି ହେତୁ ଆଜିକାଲି ଏହି କଳା କୁକୁଡ଼ାର ଚାହିଦା ବୃଦ୍ଧି ପାଇଛି। କରୋନା ଯୋଗୁ ଚିକେନ୍ ଖାଇବା କମାଇ ଦେଇଥିଲେ ଲୋକେ। ବର୍ତ୍ତମାନ ଅନଲକ୍ ଲାଗୁ ହେବା ପରଠାରୁ ଏହାର ଚାହିଦା କ୍ରମାଗତ ଭାବେ ବୃଦ୍ଧି ପାଇବାରେ ଲାଗିଛି।
ବିଶେଷ କଥା ହେଉଛି, ଏହି କୁକୁଡ଼ା ଦେଖିବାକୁ କଳା ମାତ୍ର ଏହାର ମାଂସ ରୋଗ ପ୍ରତିରୋଧକ ଶକ୍ତି ବଢ଼ାଇଥାଏ ବୋଲି ବିବେଚନା କରାଯାଏ। ଖାଲି ଏତିକି ନୁହେଁ, କମ୍ ଚର୍ବି ଏବଂ ଅଧିକ ପ୍ରୋଟିନ୍ ଯୋଗୁ ଏହାର ମାଂସ ହାର୍ଟ୍, ଶ୍ୱାସକ୍ରିୟା ଏବଂ ରକ୍ତହୀନ ରୋଗରେ ପୀଡ଼ିତ ଲୋକଙ୍କ ପାଇଁ ମଧ୍ୟ ଖୁବ୍ ଲାଭଦାୟକ।
ମଧ୍ୟପ୍ରଦେଶ ସରକାରଙ୍କ ଏକ ବିବୃତ୍ତିରେ କୁହାଯାଇଛି, ଚାହିଦାକୁ ଦୃଷ୍ଟିରେ ରଖି କୁକୁଡ଼ା ଚାଷ ମାଲିକଙ୍କ ଆୟ ବୃଦ୍ଧି ନିଶ୍ଚିତ କରିବାକୁ ରାଜ୍ୟ ସରକାର ଏହାର ଉତ୍ପାଦନ ତଥା ବିକ୍ରୟ ବୃଦ୍ଧି ପାଇଁ ଯୋଜନା ପ୍ରସ୍ତୁତ କରିଛନ୍ତି। ଏହି ପ୍ରଜାତିର କୁକୁଡ଼ା ଉତ୍ପାଦନ ବୃଦ୍ଧି ପାଇଁ ସମବାୟ ଚାଷକୁ ପ୍ରୋତ୍ସାହିତ କରାଯାଉଛି। ଜାବୁଆ, ଆଲିରାଜପୁର, ବାରଓ୍ବାନି ଏବଂ ଧର ଜିଲାର ପଞ୍ଜୀକୃତ କୁକୁଡ଼ା ଫାର୍ମଗୁଡ଼ିକରେ ମୋଟ ୩୦୦ ସଦସ୍ୟ ଅଛନ୍ତି। ଯେଉଁମାନେ ଏହି କୁକୁଡ଼ା ପାଳନ କରନ୍ତି।
ଜାବୁଆର କୃଷି ବିଜ୍ଞାନ କେନ୍ଦ୍ରର ମୁଖ୍ୟ ଟୋମର କହିଛନ୍ତି, ଦେଶର ବିଭିନ୍ନ ସ୍ଥାନରୁ କୁକୁଡ଼ା ମାଲିକମାନେ କଡ଼କନାଥ କୁକୁଡ଼ା କିଣିବାକୁ ଆସୁଛନ୍ତି। ତେବେ କରୋନା ଭୂତାଣୁ ସହ ଏହି କୁକୁଡ଼ା ମାଂସ ଲଢ଼ିଥାଏ ବୋଲି ଖାଉଥିବା ଲୋକେ କହୁଛନ୍ତି। ମାତ୍ର ବୈଜ୍ଞାନିକମାନେ ଏହାର ଏପର୍ଯ୍ୟନ୍ତ ଅଧ୍ୟୟନ କରିନାହାନ୍ତି। କିନ୍ତୁ ଏହି ପ୍ରଜାତିର କୁକୁଡ଼ାଙ୍କଠାରେ ଅଧିକ ପ୍ରୋଟିନ ଥାଏ ଏବଂ ଅନ୍ୟ କୁକୁଡ଼ାମାନଙ୍କ ତୁଳନାରେ ଚର୍ବି ଏବଂ କୋଲେଷ୍ଟରଲ ପରିମାଣ କମ୍ ରହିଥାଏ ଏହା ନିଶ୍ଚିତ। ଦିଲୀରେ ଏହି ପ୍ରଜାତିର କୁକୁଡ଼ା ମୂଲ୍ୟ ପ୍ରାୟ ୮୫୦ ଟଙ୍କା ରହିଛି।
