ନୂଆଦିଲ୍ଲୀ,୭।୧୦: ଦିଲ୍ଲୀରେ ହୋଇଥିବା ଅବକାରୀ ନୀତି ଦୁର୍ନୀତି ସହ ଜଡିତ ମନି ଲଣ୍ଡରିଂ ମାମଲାରେ ଏନଫୋର୍ସମେଣ୍ଟ ନିର୍ଦ୍ଦେଶାଳୟ(ଇଡି) ଟିମ୍ ସର୍ଚ୍ଚ ଅପରେସନ କରୁଛନ୍ତି। ଇଡି ଦଳ ଦିଲ୍ଲୀ, ପଞ୍ଜାବ ଏବଂ ହାଇଦ୍ରାବାଦ ସମେତ ୩୫ଟି ସ୍ଥାନରେ ଚଢାଉ କରୁଛି।
ଦିଲ୍ଲୀର ଆମ ଆଦମୀ ପାର୍ଟି ସରକାର ୨୦୨୧-୨୨ର ଏକ୍ସାଇଜ ନୀତି ଅନୁଯାୟୀ ଏହି ଦୁର୍ନୀତି କରିଥିବା ଅଭିଯୋଗ ହୋଇଛି। ଏହି ପ୍ରସଙ୍ଗରେ ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କ ବିରୋଧରେ ଏକ ଏଫଆଇଆର ମଧ୍ୟ ପଞ୍ଜୀକୃତ ହୋଇଛି। ଉଭୟ ସିବିଆଇ ଏବଂ ଇଡି ସିସୋଡିଆଙ୍କ ବିରୋଧରେ ମାମଲା ରୁଜୁ କରିଛନ୍ତି।
ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଟୁଇଟ୍ କରି ଇଡି ଚଢାଉ ଉପରେ ପ୍ରଶ୍ନ କରିଛନ୍ତି। ମୁଖ୍ୟମନ୍ତ୍ରୀ କେଜ୍ରିୱାଲ ଲେଖିଛନ୍ତି, ୫୦୦ରୁ ଅଧିକ ଚଢ଼ାଉ, ୩ ମାସ ହେବ ୩୦୦ରୁ ଅଧିକ ସିବିଆଇ ଏବଂ ଇଡି ଅଧିକାରୀ ୨୪ ଘଣ୍ଟା କାର୍ଯ୍ୟ କରୁଛନ୍ତି – ମନୀଷ ସିସୋଡିଆଙ୍କ ବିରୋଧରେ ପ୍ରମାଣ ଖୋଜିବା ପାଇଁ। କିଛି ପାଇପାରୁ ନାହିଁ କାରଣ କିଛି କରାଯାଇ ନାହିଁ। ସେମାନଙ୍କର ଖରାପ ରାଜନୀତି ପାଇଁ ଏତେ ସଂଖ୍ୟକ ଅଧିକାରୀଙ୍କ ସମୟ ନଷ୍ଟ ହେଉଛି। ଏପରି ଦେଶ କିପରି ଅଗ୍ରଗତି କରିବ।
ସେପ୍ଟେମ୍ବର ୧୬ରେ, ଇଡି ୬ଟି ରାଜ୍ୟରେ ୪୦ଟି ସ୍ଥାନ ଉପରେ ଚଢାଉ କରିଥିଲା। ଏହାପୂର୍ବରୁ ସେପ୍ଟେମ୍ବର ୬ରେ ଇଡି ଅନେକ ରାଜ୍ୟର ସ୍ଥାନ ଉପରେ ଚଢାଉ କରିଥିଲା।
