କର୍ଲାମୁଣ୍ଡା,୨୦ା୫(ଡି.ଏନ୍.ଏ.): ସରକାର ସମସ୍ତଙ୍କୁ ପିଇବା ପାଣି ଯୋଗାଇବା ନିମନ୍ତେ ବିଭନ୍ନ ସ୍ଥାନରେ ବସୁଧା ଯୋଜନାରେ ପାଣି ଟାଙ୍କି ନିର୍ମାଣ କାର୍ଯ୍ୟ ଟେଣ୍ଡର ଜରିଆରେ ବ୍ୟବସ୍ଥା କରିଥିଲେ ହେଁ, ଯୋଜନାଗୁଡ଼ିକ ଠିକ୍ ସମୟରେ ସମ୍ପୂର୍ଣ୍ଣ ହେଇ ପାରୁ ନ ଥିବାର ସାଧାରଣ ଲୋକଙ୍କ ପାଇଁ ବସୁଧା ଭଳି ଯୋଜନା ଅପହଞ୍ଚ ହୋଇ ପଡ଼ିରହୁଛି। ଏଭଳି ପରିସ୍ଥିତି କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ ସାପଲହରା ପଞ୍ଚାୟତ କଣ୍ଡରେଇ ଗାଁରେ ଚାଲିଥିବା ବସୁଧା ଯୋଜନାରେ ଦେଖିବାକୁ ମିଳିଛି। ବ୍ଲକ ସଦରଠାରୁ ୧୦ କିମି ଦୂରରେ ଅବସ୍ଥିତ ଏହି ଗାଁରେ ୪୮୦ଟି ପରିବାରର ୧୪୦୦ରୁ ଊଦ୍ଧର୍ବ ଲୋକେ ବସବାସ କରନ୍ତି। ତେବେ ପୂର୍ବରୁ ଗାଁ ଲୋକଙ୍କ ପାଇଁ ପାନୀୟ ଜଳର ସମସ୍ୟା ରହିଆସିଥିବାରୁ ସରକାରଙ୍କ ବସୁଧା ଯୋଜନା ଆରମ୍ଭ କରାଯାଇଥିଲେ ହେଁ ପ୍ରକଳ୍ପଟି ସମ୍ପୂର୍ଣ୍ଣ ହୋଇ କାର୍ଯ୍ୟକ୍ଷମ ହେବାରେ ଅହେତୁକ ବିଳମ୍ବ ଘଟୁଥିବାରୁ ସ୍ଥାନୀୟ ଲୋକଙ୍କ ପାନୀୟ ଜଳ ସମସ୍ୟା ଦୂର ହେଇପାରୁ ନ ଥିବା ଦେଖିବାକୁ ମିଳିଛି। ପ୍ରକଳ୍ପଟିକୁ ଶୀଘ୍ର ସାରିବାକୁ ସମ୍ପୃକ୍ତ ଠିକାଦାର ଓ ବିଭାଗୀୟ ଅଧିକାରୀଙ୍କୁ ଜଣାଇଥିଲେ ହେଁ କେହି ଶୁଣୁ ନ ଥିବା ପୂର୍ବତନ ସମିତିସଭ୍ୟ ନୀଳାମ୍ବର ବେହେରା ଅଭିଯୋଗ କରିଛନ୍ତି। ଏହି ଗାଁର ବିଭିନ୍ନ ପଡ଼ାକୁ ମିଶାଇ ୧୦ଟି ନଳକୂପ ରହିଥିଲେ ମଧ୍ୟ ସବୁ ନଳକୂପରୁ ବାହାରୁଥିବା ପାଣି ପିଇବା ଯୋଗ୍ୟ ହେଉ ନ ଥିବାରୁ ଲୋକେ ନାହିଁ ନ ଥିବାର ଅସୁବିଧାର ସମ୍ମୁଖୀନ ହେଉଛନ୍ତି। ଏନେଇ ବିଭାଗୀୟ ଯନ୍ତ୍ରୀ ଅନସୂୟା ଭଞ୍ଜଙ୍କୁ ପଚାରିବାରୁ ପ୍ରକଳ୍ପ ପାଇଥିବା ଠିକାଦାରଙ୍କ ଯୋଗୁ ପ୍ରକଳ୍ପଟି ସମ୍ପୂର୍ଣ୍ଣ ହେଇପାରୁ ନ ଥିବାରୁ ଠିକାଦାରଙ୍କୁ ଦୁଇଥର ଚିଠି କରିଥିବା ସୂଚନା ଦେଇଥିଲେ ଓ ପ୍ରକଳ୍ପର ବେଶି କିଛି କାମ ରହିନାହିଁ। ତଥାପି କିପରି କାର୍ଯ୍ୟଶୀଘ୍ର ସମ୍ପୂର୍ଣ୍ଣ ହେବ ସେ ଉପରେ ଚେଷ୍ଟା କରାଯିବ ବୋଲି କହିଛନ୍ତି।
