ଦାରିଙ୍ଗବାଡ଼ି,୩୧ା୩ (ଅରୁଣ ସାହୁ)କନ୍ଧମାଳ ଜିଲା ଜି. ଉଦୟଗିରି ନିର୍ବାଚନମଣ୍ଡଳୀରେ ବିଜେଡିର ବିଧାନସଭା ପ୍ରାର୍ଥୀ ଘୋଷଣା ପରେ ଏବେ ସମସ୍ତଙ୍କ ନଜର କଂଗ୍ରେସ ଓ ଭାଜପା ଉପରେ। ପ୍ରାର୍ଥୀ ଘୋଷଣା କରିବାରେ ବିଜେଡି ଆଗୁଆ ରହିଥିବା ବେଳେ ଦଳୀୟ କର୍ମୀ ଓ ବିଜେଡି ସମର୍ଥକଙ୍କ ମଧ୍ୟରେ ନିର୍ବାଚନ ଜିତିବାର ଏକ ପ୍ରକାର ଆଶା ବୃଦ୍ଧି ପାଇଛି। ଦଳ ପୁଣି ସାଲୁଗା ପ୍ରଧାନଙ୍କୁ ପ୍ରାର୍ଥୀ କରିଥିବାରୁ ତାଙ୍କୁ ଟକ୍କର ଦେଲାଭଳି ପ୍ରାର୍ଥୀ କଂଗ୍ରେସ ଓ ଭାଜପାର ହେବା ଆବଶ୍ୟକ। ତେବେ ଯାଇ ତ୍ରିମୁଖୀ ଲଢେଇ ହେବ ବୋଲି ଆଶା କରାଯାଉଛି। ତେବେ କଂଗ୍ରେସ ଓ ଭାଜପାର ଏକାଧିକ ଆଶାୟୀ ରହିଥିବାରୁ ପ୍ରାର୍ଥୀ ଚୟନରେ ବିଳମ୍ବ ଘଟୁଥିବା କୁହାଯାଇଛି। ହେଲେ ଏହାର କୁପ୍ରଭାବ ସିଧା ସେମାନଙ୍କ କର୍ମୀଙ୍କ ଉପରେ ପଡୁଛି। କଂଗ୍ରେସ ଓ ଭାଜପା କର୍ମୀଙ୍କ ମନରେ ନିରାଶାଭାବ ଦେଖିବାକୁ ମିଳୁଛି। ଏପଟେ ବିଜେଡିର ପ୍ରାର୍ଥୀ ଘୋଷଣା ପରେ ଦଳୀୟ କର୍ମୀଙ୍କ ମଧ୍ୟରେ ଯେତିକି ଉତ୍ସାହ ଦେଖାଯାଇଛି, କର୍ମୀ ସମ୍ମିଳନୀ ସହ ବିଭିନ୍ନ କାର୍ଯ୍ୟକ୍ରମ କରାଯିବାକୁ ଦଳ ସେହିଭଳି ଅଣ୍ଟା ଭିଡ଼ିଛି। ସେପଟେ କଂଗ୍ରେସ ଓ ଭାଜପାର ଗ୍ୟାରେଣ୍ଟି ଓ ବିଭିନ୍ନ ଘୋଷଣାକୁ ନେଇ ଲୋକଙ୍କ ପାଖକୁ ଭୋଟ ମାଗିବାକୁ ଯିବାକୁ ରହିଥିବାରୁ ବିଜେଡି ମଧ୍ୟ ସରକାରଙ୍କ ବିଭିନ୍ନ ଯୋଜନା ସମ୍ପର୍କରେ ଲୋକଙ୍କୁ ଜଣାଇ ଭୋଟ ଭିକ୍ଷା କରିବ।
ପ୍ରକାଶ ଯେ, କଂଗ୍ରେସର ଗଡ଼ କୁହାଯାଉଥିବା ଜି. ଉଦୟଗିରି ନିର୍ବାଚନମଣ୍ଡଳୀର ଦାରିଙ୍ଗବାଡ଼ି ଏବେ ବିଜେଡିମୟ ହୋଇଛି। ଅଞ୍ଚଳର ୨୫ ପଞ୍ଚାୟତରେ ଅଧିକାଂଶ ଲୋକ ପ୍ରତିନିଧି ବିଜେଡି ହାତରେ। ସେହିପରି ଦୁଇଟି ଜିଲା ପରିଷଦ ଆସନରୁ ଗୋଟିଏ ବିଜେଡି ଅନ୍ୟଟି କଂଗ୍ରେସ ହାତରେ ରହିଛି। ଏହି ନିର୍ବାଚନମଣ୍ଡଳୀରେ ୪ଟି ବ୍ଲକ ତଥା ଟିକାବାଲି, ଜି.ଉଦୟଗିରି, ରାଇକିଆ ଓ ଦାରିଙ୍ଗବାଡି ରହିଛି। ତେବେ ବୃହତ୍ ବ୍ଲକ ଭାବେ ଦାରିଙ୍ଗବାଡି ଭୋଟର ଭାଗ୍ୟ ନିର୍ଦ୍ଧାରଣ କରୁଥିବା ବେଳେ ଚଳିତ ଥର କଂଗ୍ରେସ ଓ ଭାଜପାକୁ ପଛରେ ପକାଇ ଏଠାରେ ବିଜେଡି ଆଗୁଆ ରହିବ ବୋଲି ସମସ୍ତଙ୍କ ଆଶା। ସୂଚନାଯୋଗ୍ୟ, ଏହି ନିର୍ବାଚନମଣ୍ଡଳୀରେ ୨୦୦୦ରୁ ୨୦୦୪ ପର୍ଯ୍ୟନ୍ତ ବିଜେଡି ହାତରେ ରହିଥିବା ବେଳେ ୨୦୦୪ରୁ ୨୦୦୯ କଂଗ୍ରେସ, ୨୦୦୯ରୁ ୨୦୧୪ ଭାଜପା, ୨୦୧୪ରୁ ୨୦୧୯ ପୁଣି ଥରେ କଂଗ୍ରେସ, ୨୦୧୯ରୁ ୨୦୨୪ପୁଣି ବିଜେଡି ଶାସନ କରୁଛି। ତେଣୁ ପୁଣି ଦଳ ସାଲୁଗାଙ୍କୁ ପ୍ରାର୍ଥୀ କରିଥିବାରୁ ବିଜେଡି ମହଲରେ ବିଜୟର ଆଶା ସଂଚାର ହେଉଛି। ସେପଟେ କଂଗ୍ରେସ ଓ ଭାଜପା ପକ୍ଷରୁ ପ୍ରାର୍ଥୀ କିଏ ହେବ, ସେନେଇ ଉଭୟ ଦଳର ଆଶାୟୀ ପ୍ରାର୍ଥୀମାନେ ମଧ୍ୟ ଆଶାବାଦୀ ଅଛନ୍ତି।
