୧୯୭୯ ମସିହାରେ ବଲାଙ୍ଗୀରରେ ଯୁବୋଦ୍ୟୋଗୀ ବ୍ରିଜେଶ ମେହେରଙ୍କ ଜନ୍ମ। ବ୍ୟବସାୟ କ୍ଷେତ୍ରରେ ଏକାଗ୍ରତା ଓ କଠିନ ପରିଶ୍ରମ ଉପରେ ଗୁରୁତ୍ୱ ଦେଉଥିବା ବ୍ରିଜେଶ ମିନରବା ଜୁଏଲର୍ସରୁ ତାଙ୍କର ବ୍ୟବସାୟିକ ଜୀବନ ଆରମ୍ଭ କରିଥିଲେ । ପରେ ମିନରବା ଅଟୋମୋବାଇଲ୍ସ ନାଁରେ ଡିଲରଶିପ୍ ନେଇ ଜଣେ ପ୍ରତିଷ୍ଠିତ ବ୍ୟବସାୟୀ ପାଲଟିଛନ୍ତି। ଏକ ବହୁରାଷ୍ଟ୍ରୀୟ କମ୍ପାନୀ(ଏମ୍ଏନ୍ସି)ରେ କାର୍ଯ୍ୟ କରି ଫେରିବା ପରେ ନିଜ ଜନ୍ମମାଟି ରେ ସେ କିପରି ବ୍ୟବସାୟ କ୍ଷେତ୍ରରେ ପାଦ ଦେଇଥିଲେ ଏବଂ ସଫଳତା ସାଉଁଟିଥିଲେ ସେନେଇ ବ୍ରିଜେଶଙ୍କ ସହ ଧରିତ୍ରୀର ସ୍ବତନ୍ତ୍ର ଆଲୋଚନା…
ପ୍ର- ବ୍ୟବସାୟିକ ଯାତ୍ରା ସମ୍ପର୍କରେ ସଂକ୍ଷେପରେ କହିବେ?
ଉ- ୨୦୦୪ରେ ବାଙ୍ଗାଲୋରରେ ଏମ୍ବିଏ ସାରିବା ପରେ ଏକ ଏମ୍ଏନ୍ସିରେ ୨ବର୍ଷ କାମ କରିଥିଲି। ୨୦୦୬ରେ ଜନ୍ମମାଟି ବଲାଙ୍ଗୀର ଫେରି ମିନରବା ଜୁଏଲର୍ସ ନାମରେ ରିଟେଲ ଜୁଏଲେରି ବ୍ୟବସାୟ ଆରମ୍ଭ କରିଲି। ୨୦୧୨ରେ ପଶ୍ଚିମ ଓଡ଼ିଶାରେ ମହିନ୍ଦ୍ରା ଡିଲରଶିପ୍ର ସୁଯୋଗ ପାଇଲି। ୨୦୧୩ରେ ମିନରବା ଅଟୋମୋବାଇଲ୍ସ ପ୍ରାଇଭେଟ୍ ଲିମିଟେଡ୍ ନାମରେ ମହିନ୍ଦ୍ରା ଡିଲରଶିପ୍ ଆରମ୍ଭ କରିଥିଲି।
ପ୍ର- ଓଡ଼ିଶାରେ କାର୍ ବଜାର ସ୍ଥିତି କିପରି ରହିଛି?
ଉ- କୋଭିଡ୍ ସମୟରେ ଇଣ୍ଡଷ୍ଟ୍ରି କ୍ଷତିଗ୍ରସ୍ତ ହୋଇଥିଲା। ମାତ୍ର ଲୋକମାନେ ପ୍ରାଇଭେଟ୍ ଟ୍ରାନ୍ସପୋର୍ଟକୁ ଗୁରୁତ୍ୱ ଦେଉଥିବାରୁ ପରବର୍ତ୍ତୀ ମୁହୂର୍ତ୍ତରେ ଏହାର ଚାହିଦା ଖୁବ୍ ବଢ଼ିଛି। ବଜାରରେ ନୂଆ ନୂଆ ମଡେଲ ଉପଲବ୍ଧ ହେଉଛି। ବିଶେଷକରି ଏସ୍ୟୁଭି କ୍ଷେତ୍ରରେ ଗ୍ରାହକଙ୍କ ଆଗ୍ରହ ବଢ଼ିଛି। ସାରା ଦେଶରେ କାର ବିକ୍ରି କ୍ଷେତ୍ରରେ ଓଡ଼ିଶା ଖୁବ୍ ଆଗରେ ରହିଛି। ଗତ ୩ରୁ ୪ ବର୍ଷ ମଧ୍ୟରେ ସଡ଼କ ଏବଂ ଉନ୍ନତ ଭିତ୍ତିଭୂମି କାରଣରୁ ଯାନ ବିକ୍ରି ତ୍ୱରାନ୍ବିତ ହୋଇଛି।
ପ୍ର- ଏହି ଶିଳ୍ପରେ କେଉଁ ସବୁ ସମସ୍ୟା ଦେଇ ଗତି କରିବାକୁ ପଡ଼େ? ଗ୍ରାହକ ସନ୍ତୁଷ୍ଟୀକରଣ କେତେ ଗୁରୁତ୍ୱ ବହନ କରେ?
ଉତ୍ତର: ବର୍ତ୍ତମାନ ପର୍ଯ୍ୟନ୍ତ ସେପରି କୌଣସି ବଡ଼ ଆହ୍ବାନ ଆସିନାହିଁ। ମାତ୍ର ଭାବୁଛି ସୁଧହାରରେ କ୍ରମାଗତ ବୃଦ୍ଧି ଅଟୋମୋବାଇଲ୍ ବିକ୍ରିକୁ ଟିକେ ହତାଶ କରିଛି। ଏଥିସହ ଓଡ଼ିଶାରେ ନୂତନ ସରକାର ଗଠନ ହୋଇଥିବାବେଳେ ଗତ ୯ ମାସ ମଧ୍ୟରେ ଆନୁଷ୍ଠାନିକ ତଥା ସରକାରୀ ବିକ୍ରିକୁ ମନ୍ଥର କରିଦେଇଛି। ସ୍ଥିରତା ଏବଂ ତୀବ୍ର ନୀତି ନିର୍ଦ୍ଧାରଣ କରି ସ୍ଥିତି ନିୟନ୍ତ୍ରଣକୁ ଅଣାଯାଇପାରିବ। ସେହିପରି ପ୍ରତିଯୋଗିତାମୂଳକ ଭାବେ ଏହି ଶିଳ୍ପ ଅଗ୍ରଗତି କରୁଥିବାବେଳେ ଗ୍ରାହକ ସନ୍ତୁଷ୍ଟୀକରଣ ସବୁଠାରୁ ଗୁରୁତ୍ୱପୂର୍ଣ୍ଣ। ଯଦି ଜଣେ ଗ୍ରାହକଙ୍କୁ ସନ୍ତୁଷ୍ଟ କରିବାରେ ବିଫଳ ହେଉଛି ତେବେ ଗ୍ରାହକ ତାଙ୍କ ନିକଟକୁ ଫେରିବେ ବୋଲି ଆଶା ନ କରିବା ଭଲ।
ପ୍ର- ସଷ୍ଟେନବଲ୍ ମୋବିଲିଟି କ୍ଷେତ୍ରରେ ବୈଦ୍ୟୁତିକ ଯାନର କ’ଣ ଭୂମିକା ରହିବ?
ଉ- ବୈଦ୍ୟୁତିକ ଯାନ ଏପର୍ଯ୍ୟନ୍ତ ଏହାର ପ୍ରାରମ୍ଭିକ ପର୍ଯ୍ୟାୟରେ ଅଛି। ଚାର୍ଜିଂ ଭିତ୍ତିଭୂମି ଭଳି ଆହ୍ବାନ ରହିଛି। ମାତ୍ର ଜୀବାଶ୍ମ ଇନ୍ଧନ ପାଇଁ ଏହା ନିଶ୍ଚିତ ଭାବରେ ଏକ ଉତ୍ତମ ବିକଳ୍ପ। କମ୍ପାନୀଗୁଡ଼ିକ ବର୍ତ୍ତମାନ ନୂତନ ମଡେଲ ମଧ୍ୟ ଆଣୁଛନ୍ତି, ଯାହା ବୈଦ୍ୟୁତିକ ଯାନ ବିକ୍ରିରେ ସାହାଯ୍ୟ କରିବ।
ପ୍ର- ଆପଣ ଯୁବୋଦ୍ୟୋଗୀଙ୍କୁ କ’ଣ ପରାମର୍ଶ ଦେବେ?
ଉ- ଅଭିଜ୍ଞତାକୁ ଆଧାରକରି ଯୁବୋଦ୍ୟୋଗୀଙ୍କୁ ଗୋଟିଏ ପରାମର୍ଶ ଦେବାକୁ ଚାହିଁବି, ପ୍ରଥମତଃ ଆପଣଙ୍କ କର୍ମଚାରୀଙ୍କୁ ଖୁସି ଏବଂ ସନ୍ତୁଷ୍ଟ ରଖିବା ପାଇଁ ଆପଣ ଯାହା କରିପାରିବେ ତାହା କରନ୍ତୁ ଏବଂ ଏହାର ପ୍ରତିବଦଳରେ ସେମାନେ ଆପଣଙ୍କ ଗ୍ରାହକଙ୍କ ଯତ୍ନ ନେବେ। ଦ୍ୱିତୀୟରେ ଆଜିକାଲି ଅଟୋମୋବାଇଲ ଡିଲରଶିିପ୍ର ବହୁତ ଚାହିଦା ରହିଛି। ଏହି କ୍ଷେତ୍ରରେ ଉତ୍ସର୍ଗୀକୃତ ମନୋଭାବ ଓ କଠିନ ପରିଶ୍ରମ ସଫଳତା ଆଣିଦେବ।
-ସାକ୍ଷାତ୍କାର: ଅନୁରାଧା ମହାରଣା, ଭୁବନେଶ୍ୱର
