ଭୁବନେଶ୍ୱର,୧୯।୧୧ (ଅଭୟ ଦାଶ): ଗତ କିଛି ସପ୍ତାହ ହେଲା ଅନ୍ତଃରାଷ୍ଟ୍ରୀୟ ବଜାରରେ ମାନ୍ଦାବସ୍ଥା ସାଙ୍ଗକୁ ରାଜନୈତିକ ଓ ଯୁଦ୍ଧ ଭଳି ସମସ୍ୟା ଲାଗି ରହିଛି। ଏହାର ପ୍ରଭାବ ଘରୋଇ ଅଳଙ୍କାର ବଜାରର ରପ୍ତାନି ଉପରେ ପଡ଼ିଛି। ଫଳରେ ଚଳିତ ବର୍ଷ ଅକ୍ଟୋବର ମାସରେ ଦେଶର ସାମଗ୍ରିକ ରତ୍ନ ଏବଂ ଅଳଙ୍କାର ରପ୍ତାନି ୧୧.୪୯% ହ୍ରାସ ପାଇ ୨୨,୮୭୩.୧୯ କୋଟି (୨,୭୪୮.୦୧ ମିଲିୟନ ଡଲାର) ରେ ପହଞ୍ଚତ୍ଛି ବୋଲି ରତ୍ନ ଏବଂ ଅଳଙ୍କାର ରପ୍ତାନି ପ୍ରୋତ୍ସାହନ ପରିଷଦ ( ଜେମ୍ସ ଆଣ୍ଡ ଜୁଏଲେରି ଏକ୍ସପର୍ଟ ପ୍ରମୋଶନ କାଉନସିଲ ବା ଜିଜେଇପିସି) ପକ୍ଷରୁ ବିସ୍ତୃତ ଭାବେ ଆଲୋକପାତ କରାଯାଇଛି। ସେହିଭଳି ଜିଜେଇପିସିର ସୂଚନା ଅନୁଯାୟୀ ୨୦୨୩ ଅକ୍ଟୋବରରେ ଭାରତର ସାମଗ୍ରିକ ରତ୍ନ ଏବଂ ଅଳଙ୍କାର ରପ୍ତାନି ୧୧.୪୯% ହ୍ରାସ ହୋଇ ୨୨,୮୭୩.୧୯ କୋଟିରେ ପହଞ୍ଚତ୍ଛି। ଏପରିକି ୨୦୨୨ ଅକ୍ଟୋବରରେ ମୋଟ ରପ୍ତାନି ୨୫,୮୪୩.୮୪ କୋଟି (୩,୧୩୪.୮୫ ମିଲିୟନ ଡଲାର) ଥିଲା। ସେହିଭଳି ୨୦୨୩ ସେପ୍ଟେମ୍ବରରେ କଟ୍ ଆଣ୍ଡ ପଲିସିଡ୍ ଡାଇମଣ୍ଡ (ସିପିଡି) ରପ୍ତାନିରେ ମଧ୍ୟ ୩୨.୭୦% ହ୍ରାସ ହୋଇ ୧୦,୪୯୫.୦୬ କୋଟି (୧,୨୬୦.୯୧ ମିଲିୟନ ଡଲାର)ରେ ରହିଥିଲା ବେଳେ ୨୦୨୨ ସେପ୍ଟେମ୍ବରର କାରବାର ତୁଳନାରେ ୧୫,୫୯୪.୪୯ କୋଟି (୧,୮୯୧.୨ ମିଲିୟନ ଡଲାର) ହ୍ରାସ ପାଇଛି। ଅପରପକ୍ଷରେ ଚଳିତ ବର୍ଷ ଅକ୍ଟୋବରରେ ପଲିସ୍ ହୋଇଥିବା ଲାବ୍ ଗ୍ରାଉଣ୍ଡ ହୀରା (ଏଲ୍ଜିଡି)ର ମୋଟ ରପ୍ତାନି ୨୩.୦୧% ହ୍ରାସ ହୋଇ ୧,୧୩୫.୧୬ କୋଟି (୧୩୬.୩୮ ମିଲିୟନ ଡଲାର)ରେ ପହଞ୍ଚତ୍ଛି। ବିଶେଷକରି ୨୦୨୨ ଅକ୍ଟୋବରରେ ଏହାର ପରିମାଣ ୧,୪୭୪.୩୮ କୋଟି (୧୭୮.୭୩ ନିୟୁତ) ଥିଲା।
ଏ ସମ୍ପର୍କରେ ଜେଜିଇପିସିର ଅଧ୍ୟକ୍ଷ ଭିପୁଲ ଶାହା କହିଥିଲେ, ଚଳିତ ବର୍ଷ ଅକ୍ଟୋବରରେ ଦେଶର ସାମଗ୍ରିକ ରତ୍ନ ଏବଂ ଅଳଙ୍କାର ରପ୍ତାନି ହ୍ରାସ ପାଇଥିଲାବେଳେ ଆମେରିକା ଭଳି ପ୍ରମୁଖ ଅଳଙ୍କାର ବଜାରରେ ଚାହିଦା ହ୍ରାସ ଏବଂ ହୀରା ଯୋଗାଣରେ ସୀମିତତା ରହିଥିଲା। ଏପରିକି ଅଳଙ୍କାର ରପ୍ତାନି ପରିବହନର ମୋଟ ଅଂଶ ୫୦% ରହିଥାଏ ବୋଲି ସେ ମତପ୍ରକାଶ କରିଛନ୍ତି। ସେହିଭଳି ଚଳିତ ବର୍ଷର ଖ୍ରୀଷ୍ଟମାସ ସମୟରେ ଅଳଙ୍କାର ରପ୍ତାନି ବଜାରଗୁଡିକ ଉଠିବ ବୋଲି ଆମେ ଆଶା କରୁଛୁ। ସେହିପରି ସୁନା ଅଳଙ୍କାରର ମୋଟ ରପ୍ତାନି ୨୦୨୩ ଅକ୍ଟୋବରରେ ୩୩.୪୮% ବୃଦ୍ଧି ହୋଇ ୮,୬୧୯.୩୮କୋଟି (୧,୦୩୫.୫୪ ମିଲିୟନ ଡଲାର) ହୋଇଥିବାବେଳେ ଗତ ବର୍ଷ ଅକ୍ଟୋବରରେ ଏହାର ପରିମାଣ ୬,୪୫୭.୪୮କୋଟି (୭୮୪.୧୧ ମିଲିୟନ)ରୁ ଅଧିକ ହୋଇଥିଲା।
