ଉଦଳା, ୧୫ା୭(ଡି.ଏନ.ଏ.)-କଳା ସଂସ୍କୃତିକୁ ବଞ୍ଚାଇ ରଖିବା ସହିତ ଲୋକଙ୍କୁ ସଚେତନ କରିବା ଉଦ୍ଦେଶ୍ୟରେ ଆରମ୍ଭ ହୋଇଛି ଏକ ନିଆରା ପ୍ରୟାସ ା ସବୁଜ ସୁନ୍ଦର ଉଦଳା ଏବେ କଳା ସଂସ୍କୃତିର ଝଲକରେ ଝଲସି ଉଠିଛି ା ଯେଉଁ ରାସ୍ତା କଡ଼ ପାଚେରି ଦିନେ ଅଲୋଡ଼ା ହୋଇ ପଡ଼ିରହିଥିଲା ତାହା ଆଜି କଥା କହୁଛି ା ଏହି ସହର ଏବେ ନୂଆ ରୂପ ନେଇଛି। ନୂଆବୋହୂ ପରି ସଜେଇ ହୋଇଛି। କେଉଁଠି ବିଶ୍ୱ ପ୍ରସିଦ୍ଧ ପୁରୀ ରଥଯାତ୍ରାର ଚିତ୍ର ତ ଆଉ କେଉଁଠି ଲୁପ୍ତ ପ୍ରାୟ କୌଳିକ ବୃତ୍ତିର ଚିତ୍ର, ପୁଣି ଆଉ କେଉଁଠି ଆଦିବାସୀ ପରମ୍ପରା, ନୃତ୍ୟ ବାଦ୍ୟର ଚିତ୍ର। ଏହାର ବିନ୍ଧାଣୀ ସାଜିଛନ୍ତି ଉପଖଣ୍ଡ କାରିଗର ପଞ୍ଚାୟତର ସଦସ୍ୟମାନେ। କରୋନା ମହାମାରୀ ଲକ୍ଡାଉନ ସମୟରେ ପ୍ରଥମେ ନିଜ ଖର୍ଚ୍ଚରେ ଅଞ୍ଚଳର ବିଭିନ୍ନ କାନ୍ଥବାଡ଼ରେ କରୋନା ସଚେତନତା ନେଇ ଚିତ୍ର ଆଙ୍କି ଚର୍ଚ୍ଚାକୁ ଆସିଥିଲେ ସେମାନେ। ପୁଣି ଏବେ ସମଗ୍ର ସହରକୁ ସଜାଉଛନ୍ତି। ସକାଳ ହେଲେ ହାତରେ ରଙ୍ଗତୂଳୀ ଧରି ବିଭିନ୍ନ ପାଚେରିରେ ଆଙ୍କୁଛନ୍ତି ମୟୂରଭଞ୍ଜ କଳା, ସଂସ୍କୃତି ଏବଂ ପରମ୍ପରାର ଚିତ୍ର ା ଫଳରେ ନିର୍ଜୀବ ସିମେଣ୍ଟ ପାଚେରି ଏବେ କଳା ସଂସ୍କୃତିର କଥା କହୁଛି। ଉଦଳା ଥାନା ଛକଠାରୁ ଆରମ୍ଭ କରି ଏନଏସି ଅଧୀନସ୍ଥ ବିଭିନ୍ନ ୱାର୍ଡର କାନ୍ଥରେ ଚାଲିଛି ପେଣ୍ଟିଂ। କାରିଗର ପଞ୍ଚାୟତର ସଦସ୍ୟ ଜିତେନ୍ଦ୍ର ହେମ୍ବ୍ରମ୍, ସଞ୍ଜୀବ କୁମାର ବେହେରା, ଭଗବାନ ମହାପାତ୍ର କୁହନ୍ତି ବିଭିନ୍ନ ଖବରକାଗଜ କିମ୍ବା ଟେଲିଭିଜନ ଜରିଆରେ ହଜିଯାଉଥିବା କଳା ସଂସ୍କୃତି, ପରମ୍ପରାର ଝଲକ ଦେଖିବା ପରେ ଲୋକେ ତାହାକୁ ଭୁଲିଯାଉଛନ୍ତି ା ହେଲେ ଏହି କାନ୍ଥରେ ଅଙ୍କାଯାଇଥିବା ଚିତ୍ର ଗୋଟିଏ ସାଧାରଣ ମଣିଷକୁ ଦୁଇ ମିନିଟ୍ ଛିଡ଼ା କରିବାକୁ ବାଧ୍ୟ କରିବ। ଏହାସହିତ ଏହି ଚିତ୍ର ଜରିଆରେ ଲୋକେ କିଛି ସନ୍ଦେଶ ପାଇବେ ଏବଂ ସବୁବେଳେ ଏହି ଚିତ୍ର ଦେଖିବା ଫଳରେ ଲୋକେ ଆଉ ଦାଦନ ଖଟିବାକୁ ବାହାରକୁ ନ ଯାଇ ହଜିଯିବାକୁ ବସିଥିବା ନିଜର କୂଳବେଉସା କରି ପରିବାର ପ୍ରତିପୋଷଣ କରିପାରିବେ ବୋଲି ମତ ରଖିଛନ୍ତି କାରିଗର ପଞ୍ଚାୟତର ସଦସ୍ୟମାନେ ା ଏହି ଚିତ୍ରକଳା ମାଧ୍ୟମରେ କରୋନା ସଚେତନତା ବାର୍ତ୍ତା ସବୁଠାରୁ ନିଆରା, ଯେପରିକି ମାସ୍କ ପିନ୍ଧିବା, ଦୋକାନ ବଜାରରେ ସାମାଜିକ ଦୂରତା ଅବଲମ୍ବନ କରିବା, ପରିବେଶ ପରିଷ୍କାର ପରିଚ୍ଛନ୍ନ ରଖିବା ଭଳି ବିଭିନ୍ନ ବାର୍ତ୍ତା ସମସ୍ତଙ୍କୁ ଆକର୍ଷିତ କରିଛି। ତେବେ ସରକାରଙ୍କ ତରଫରୁ ଅଧିକ ସହଯୋଗ ମିଳିଲେ ସମଗ୍ର ଉଦଳାକୁ ଏକ ନୂଆ ରୂପ ଦିଆଯିବ ବୋଲି କାରିଗର ପଞ୍ଚାୟତର ସଦସ୍ୟମାନେ କହିଛନ୍ତି।
