ଓ୍ବାଶିଂଟନ,୩ା୫ : ଭାରତରେ ଧର୍ମୀୟ ସ୍ବାଧୀନତାର ଗୁରୁତର ଉଲ୍ଲଂଘନ ହେଉଛି। ଏଥିପାଇଁ ଦାୟୀ ସରକାରୀ ଅଧିକାରୀ ଓ ସଂସ୍ଥାଗୁଡ଼ିକୁ ଚିହ୍ନଟ କରି ସେମାନଙ୍କ ସମ୍ପତ୍ତି ବାଜ୍ୟାପ୍ତ କରିବା ପାଇଁ ଆମେରିକାର ଫେଡେରାଲ କମିଶନ ଜୋ ବାଇଡେନ୍ ପ୍ରଶାସନକୁ ଆହ୍ବାନ ଦେଇଛି। ଭାରତ-ଆମେରିକା ଦ୍ୱିପାକ୍ଷିକ ଆଲୋଚନା ବେଳେ ଧର୍ମୀୟ ସ୍ବାଧୀନତା ପ୍ରସଙ୍ଗ ଉଠାଇବାକୁ ଆମେରିକାର ଅନ୍ତର୍ଜାତୀୟ ଧର୍ମୀୟ ସ୍ବାଧୀନତା କମିଶନ (ୟୁଏସ୍ସିଆଇଆର୍ଏଫ୍) କଂଗ୍ରେସକୁ ସୁପାରିସ କରିଛି। ଏଥିସହିତ ଏହା ଉପରେ ଶୁଣାଣି କରିବାକୁ କମିଶନ କହିଛି।
ଭାରତ ସମେତ ଅନ୍ୟ କେତେକ ରାଷ୍ଟ୍ରକୁ ଧର୍ମୀୟ ସ୍ବାଧୀନତା ମାନ୍ୟତାରେ ‘ନିର୍ଦ୍ଦିଷ୍ଟ ଚିନ୍ତାଜନକ ଦେଶ’ ଭାବେ ଦର୍ଶାଇବା ଲାଗି ୟୁଏସ୍ସିଆଇଆର୍ଏଫ୍ ଏହାର ବାର୍ଷିକ ରିପୋର୍ଟରେ ଆମେରିକା ପରରାଷ୍ଟ୍ର ବିଭାଗକୁ କହିଛି। ୨୦୨୦ରୁ ଉକ୍ତ କମିଶନ ପରରାଷ୍ଟ୍ର ବିଭାଗକୁ ଏଭଳି ସୁପାରିସ କରିଆସୁଥିବାବେଳେ ତାହାକୁ ଗ୍ରହଣ କରାଯାଇ ନାହିଁ। ଏହାକୁ କାର୍ଯ୍ୟକାରୀ କରିବା ପରରାଷ୍ଟ୍ର ବିଭାଗ ପାଇଁ ବାଧ୍ୟତାମୂଳକ ନୁହେଁ।
ୟୁଏସ୍ସିଆଇଆର୍ଏଫ୍ ରିପୋର୍ଟ ଅନୁଯାୟୀ ୨୦୨୨ରେ ଭାରତରେ ଧର୍ମୀୟ ସ୍ବାଧୀନତା ସ୍ଥିତି ଅଧିକ ଖରାପ ହୋଇଛି। ବର୍ଷ ସାରା ଭାରତ ସରକାର ଜାତୀୟ, ରାଜ୍ୟ ଓ ସ୍ଥାନୀୟ ସ୍ତରରେ ଧର୍ମୀୟ ଭେଦଭାବ ନୀତିକୁ ପ୍ରସାର କରାଇବା ସହ କାର୍ଯ୍ୟକାରୀ କରିଛନ୍ତି। ଉକ୍ତ ନୀତି ମଧ୍ୟରେ ରହିଛି ଧର୍ମାନ୍ତରୀକରଣକୁ ଟାର୍ଗେଟ କରି ଆଇନ, ଆନ୍ତଃ ଧର୍ମବିଶ୍ୱାସ ସମ୍ପର୍କ, ହିଜାବ ପିନ୍ଧିବା, ଗୋହତ୍ୟା। ଏହା ଦ୍ୱାରା ମୁସଲମାନ, ଖ୍ରୀଷ୍ଟିଆନ, ଶିଖ୍, ଦଳିତ ଏବଂ ଆଦିବାସୀମାନେ ପ୍ରଭାବିତ ହୋଇଛନ୍ତି। ଏହା ବିରୋଧରେ ଉଠୁଥିବା ସ୍ବରକୁ କେନ୍ଦ୍ର ସରକାର ଚାପି ଦେଉଛନ୍ତି। ପ୍ରତିବାଦ କରୁଥିବା ସଂଖ୍ୟାଲଘୁ ଓ ଅନ୍ୟମାନଙ୍କ ଉପରେ ସରକାର ନଜର ରଖିବା ସହ ସେମାନଙ୍କୁ ହଇରାଣ କରୁଛନ୍ତି। ସେମାନଙ୍କ ସମ୍ପତ୍ତି ଭଙ୍ଗାରୁଜା କରାଯିବା ସହ ବେଆଇନ କାର୍ଯ୍ୟକଳାପ ପ୍ରତିକାର ଆଇନ (ୟୁଏପିଏ)ରେ ସେମାନଙ୍କୁ ଅଟକ ରଖାଯାଉଛି। ସେହିପରି ବିଦେଶ ଅନୁଦାନ ନିୟାମକ ଆଇନ (ଏଫ୍ସିଆର୍ଏ)ରେ ବେସରକାରୀ ସଂସ୍ଥା(ଏନ୍ଜିଓ)ଗୁଡ଼ିକୁ ଟାର୍ଗେଟ କରାଯାଉଥିବା ୟୁଏସ୍ସିଆଇଆର୍ଏଫ୍ ଅଭିଯୋଗ କରିଛି।
