ଢେଙ୍କାନାଳ ଅଫିସ, ୧୩।୮: କମ୍ପାନୀ ନାଁ ବଦଳିଛି। ବଦଳିଛନ୍ତି କମ୍ପାନୀ କର୍ତ୍ତୃପକ୍ଷ ଏବଂ ପରିଚାଳନା କମିଟି। ତେବେ ଏହି ବଦଳିବା ପ୍ରକ୍ରିୟା ମଧ୍ୟରେ ପୁରାତନ କର୍ମଚାରୀଙ୍କ ଭାଗ୍ୟ ଠେଲି ହୋଇଯାଇଛି ଅନ୍ଧକାର ମଧ୍ୟକୁ। କାରଖାନା ପାଇଁ ଜମି ହରାଇ ନିଯୁକ୍ତି ପାଇଥିବା କ୍ଷତିଗ୍ରସ୍ତଙ୍କୁ ଥଇଥାନ କରିବାରେ କୁନ୍ଥୁକୁନ୍ଥୁ ହେଉଛି ‘ରିମ୍ଝିମ୍’ କମ୍ପାନୀ। ୪ଥର ବୈଠକ ସତ୍ତ୍ୱେ ଏ ଦିଗରେ ସକାରାତ୍ମକ ପଦକ୍ଷେପ ଗ୍ରହଣ କରାଯାଉ ନ ଥିବାରୁ ଜମିହରାଙ୍କ ମଧ୍ୟରେ ଅସନ୍ତୋଷ ତୀବ୍ର ହେବାରେ ଲାଗିଛି।
ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକ କୁରୁଣ୍ଟିରେ ପ୍ରତିଷ୍ଠିତ ବିଆରଜି କମ୍ପାନୀ ବିକ୍ରି ହୋଇଯାଇଛି। ସେଠାରେ ଏବେ ପ୍ରତିଷ୍ଠିତ ହୋଇଛି ରିମ୍ଝିମ୍ ଇସ୍ପାତ କମ୍ପାନୀ। ବିଆର୍ଜି କାରଖାନା ପ୍ରତିଷ୍ଠା ସମୟରେ ଅଞ୍ଚଳର ୧୭୫ ଜମିହରାଙ୍କୁ ନିଯୁକ୍ତି ଦିଆଯାଇଥିଲା। ତେବେ ବିଆର୍ଜିକୁ କିଣିଥିବା ରିମ୍ଝିମ୍ କମ୍ପାନୀ ସମ୍ପୃକ୍ତ କ୍ଷତିଗ୍ରସ୍ତ ପ୍ରଜାଙ୍କୁ ନିଯୁକ୍ତି ଦେବାରେ ପ୍ରତାରଣା କରୁଥିବା ଅଭିଯୋଗ ହୋଇଛି। ପ୍ରଶାସନ, ଆଞ୍ଚଳିକ କ୍ଷତିଗ୍ରସ୍ତ ପ୍ରଜାସଂଘ, କ୍ଷତିଗ୍ରସ୍ତ ପ୍ରଜା, ପୋଲିସ ଉପସ୍ଥିତିରେ ୪ଥର ବୈଠକ କରାଯାଇ ପର୍ଯ୍ୟାୟକ୍ରମେ ସମ୍ପୃକ୍ତ ଜମିହରାଙ୍କୁ ନିଯୁକ୍ତି ଦିଆଯିବ ବୋଲି ପ୍ରତିଶ୍ରୁତି ଦିଆଯାଇଥିଲା। ଗତ ଜୁନ୍ ୨୧ରେ ଅନୁଷ୍ଠିତ ବୈଠକରେ ଅବସର ସମୟରେ ଉପନୀତ କର୍ମଚାରୀଙ୍କୁ କମ୍ପାନୀ ନିୟମ ଅନୁଯାୟୀ ସେମାନଙ୍କ ପ୍ରାପ୍ୟ ପ୍ରଦାନ କରାଯିବ, ଅନ୍ୟମାନଙ୍କୁ ଯୋଗ୍ୟତା ଭିତ୍ତିରେ ନିଯୁକ୍ତି ଦେବାକୁ ନିଷ୍ପତ୍ତି ହୋଇଥିଲା। କିନ୍ତୁ ବୈଠକର ଅଢ଼େଇ ମାସ ପରେ ବି କମ୍ପାନୀ କର୍ତ୍ତୃପକ୍ଷ କୌଣସି ପଦକ୍ଷେପ ଗ୍ରହଣ କଲେନାହିଁ। ଏହାକୁ ନେଇ ଅସନ୍ତୋଷ ତେଜିବାରୁ ଶୁକ୍ରବାର ଢେଙ୍କାନାଳ ଉପଜିଲାପାଳ ସ୍ନିଗ୍ଧାରାଣୀ ଧଳଙ୍କ ଅଧ୍ୟକ୍ଷତାରେ ବୈଠକ ଅନୁ୍ଷ୍ଠିତ ହୋଇଛି। ହିନ୍ଦୋଳ ବିଧାୟିକା ସୀମାରାଣୀ ନାୟକ, ଆଞ୍ଚଳିକ କ୍ଷତିଗ୍ରସ୍ତ ପ୍ରଜାସଂଘ ସଭାପତି ଗଙ୍ଗାଧର ସାମଲ, ସମ୍ପାଦକ ବିଜୟ ଧଳ, ବିନୋଦ ସାହୁ, କ୍ଷତିଗ୍ରସ୍ତ ପ୍ରଜାଙ୍କ ପକ୍ଷରୁ ରାଜୀବ ଗୋପାଳ ସ୍ବାଇଁ, ଚିତ୍ତରଞ୍ଜନ ନାଥ, କମ୍ପାନୀର ମାନବ ସମ୍ବଳ ମୁଖ୍ୟ ଏମ୍.ପି. ସିଂ, କନ୍ସଲଟାଣ୍ଟ ଅଶୋକ ପଟ୍ଟନାୟକ ପ୍ରମୁଖ ଉପସ୍ଥିତ ଥିଲେ। ଆସନ୍ତା ୨୩ ଓ ୨୪ ତାରିଖରେ ଢେଙ୍କାନାଳ ଉପଜିଲାପାଳଙ୍କ କାର୍ଯ୍ୟାଳୟ ସମ୍ମିଳନୀ କକ୍ଷରେ ଅନୁଷ୍ଠିତ ବୈଠକରେ ନିଯୁକ୍ତି ସମ୍ପର୍କରେ ଚୂଡ଼ାନ୍ତ ନିଷ୍ପତ୍ତି ଗ୍ରହଣ କରାଯିବ ବୋଲି ସ୍ଥିର କରାଯାଇଛି।
ବିଧାୟିକା ନାୟକ କହିଲେ, ବିଆର୍ଜି କମ୍ପାନୀରେ କାର୍ଯ୍ୟ କରୁଥିବା ୧୭୫ କ୍ଷତିଗ୍ରସ୍ତ ପ୍ରଜାଙ୍କୁ ରିମଝିମ୍ କମ୍ପାନୀ ନିଯୁକ୍ତି ଦେଉନାହିଁ। ଏହାକୁ ନେଇ ଅସନ୍ତୋଷ ବଢୁଛି। ଆଞ୍ଚଳିକ କ୍ଷତିଗ୍ରସ୍ତ ପ୍ରଜାସଂଘ ସଭାପତି ସାମଲ କହିଲେ, ୪ଥର ବୈଠକ ସତ୍ତ୍ୱେ ରିମଝିମ୍ କମ୍ପାନୀ ଥଇଥାନ ଓ ନିଯୁକ୍ତି ସମ୍ପର୍କରେ ନିଷ୍ପତ୍ତି ନେଉନାହିଁ। ନିର୍ଦ୍ଧାରିତ ବୈଠକରେ ୧୭୫ କ୍ଷତିଗ୍ରସ୍ତଙ୍କ ନିଯୁକ୍ତି ପାଇଁ ୨ଟି ପର୍ଯ୍ୟାୟରେ ସାକ୍ଷାତ୍କାର ଏବଂ ଯାଞ୍ଚ କରାଯିବ। ଏଥିରେ ହିନ୍ଦୋଳ ବିଧାୟିକା, ଉପଜିଲାପାଳ, ଆଞ୍ଚଳିକ କ୍ଷତିଗ୍ରସ୍ତ ପ୍ରଜାସଂଘ, ପାରିପାର୍ଶ୍ୱିକ ଉନ୍ନୟନ କମିଟି, କୁସୁପଙ୍ଗା ପଞ୍ଚାୟତର କର୍ମକର୍ତ୍ତା, କମ୍ପାନୀ କର୍ତ୍ତୃପକ୍ଷ ଉପସ୍ଥିତ ରହିବେ। କ୍ଷତିଗ୍ରସ୍ତ କର୍ମଚାରୀଙ୍କୁ ନିଯୁକ୍ତିପତ୍ର ପ୍ରଦାନ କରାଯିବ। ସେପ୍ଟେମ୍ବର ୧ ସୁଦ୍ଧା ସମ୍ପୃକ୍ତ କର୍ମଚାରୀ କାର୍ଯ୍ୟରେ ଯୋଗଦେବେ। ସେବା ନିବୃତ୍ତ ବୟସରେ ଉପନୀତ କର୍ମଚାରୀଙ୍କୁ ୨୧ ତାରିଖ ବୈଠକରେ ଆଲୋଚନା ଅନୁଯାୟୀ କମ୍ପାନୀ ପକ୍ଷରୁ ଏକକାଳୀନ ଥଇଥାନ କରାଯିବ ବୋଲି କ୍ଷତିଗ୍ରସ୍ତ ପ୍ରଜାଙ୍କ ମଧ୍ୟରୁ ରାଜୀବ ଗୋପାଳ ସ୍ବାଇଁ ସୂଚନା ଦେଇଛନ୍ତି । ବୈଠକରେ ସଦର ଏସ୍ଡିପିଓ ବିକାଶ ବେଉରା, ଜିଲା ଶ୍ରମ ଅଧିକାରୀ ସତ୍ୟନାରାୟଣ ଆଚାର୍ଯ୍ୟ ପ୍ରମୁଖ ଉପସ୍ଥିତ ଥିଲେ।
