ହାଟଡିହୀ,୨୦ା୧(ଡି.ଏନ୍.ଏ.): ୨୦୨୨ ନଭେମ୍ବର ୧୪ରେ କେନ୍ଦୁଝର ଜିଲା ହାଟଡିହୀ ବ୍ଲକ ଢେଙ୍କା ହାଇସ୍କୁଲର ଶିକ୍ଷକ ଇଞ୍ଚଳ ଗ୍ରାମର ଅନିରୁଦ୍ଧ ସ୍ବାଇଁଙ୍କ ମୃତଦେହ ରକ୍ତ ଜୁଡୁବୁଡୁ ଅବସ୍ଥାରେ ମରୈଗାଁଠାରେ ଥିବା ତାଙ୍କ ଭଡ଼ାଘରୁ ଉଦ୍ଧାର ହୋଇଥିଲା। ପ୍ରକାଶ ଚନ୍ଦ୍ର ସ୍ବାଇଁଙ୍କ ଅଭିଯୋଗକୁ ଭିତ୍ତି କରି ନନ୍ଦିପଦା ଥାନା କେସ୍ ନଂ ୨୭୭/୨୨ରେ ଏକ ମାମଲା ରୁଜୁ ହୋଇଥିଲା। ଶଢ଼ା ଗ୍ରାମର ରମାମଣି ରଣା ଏବଂ ଗୋପାଳ ରଣାଙ୍କୁ ମଧ୍ୟ ସନ୍ଦେହରେ ଅଟକ ରଖାଯାଇଥିଲା। କିନ୍ତୁ ଏପରି ସମ୍ବେଦନଶୀଳ ଘଟଣାରେ ପୋଲିସ ମୁଖ୍ୟ ଅଭିଯୁକ୍ତଙ୍କୁ ଗିରଫ କରିବାରେ ବିଫଳ ହୋଇଛି l ଘଟଣାର ପ୍ରକୃତ ରହସ୍ୟକୁ ଲୁଚାଇବା ପାଇଁ ପୋଲିସ ଅନ୍ୟ ଜଣଙ୍କୁ ଗିରଫ କରିଛି l ତେଣୁ ପୋଲିସ ଦକ୍ଷତାକୁ ନେଇ ପ୍ରଶ୍ନ ଉଠାଇ ମୃତ ଶିକ୍ଷକଙ୍କ ପରିବାର ଲୋକ ଏବଂ ସ୍ଥାନୀୟ ଲୋକମାନେ ଶୁକ୍ରବାର ଥାନା ନିକଟ ଆନନ୍ଦପୁର-ଭଦ୍ରକ ୫୩ ନଂ ରାଜ୍ୟ ରାଜପଥରେ ବସି ଅନଶନ କରିଛନ୍ତି ଏବଂ ମୁଖ୍ୟ ଅଭିଯୁକ୍ତଙ୍କୁ ଗିରଫ ଦାବି ମଧ୍ୟ କରିଛନ୍ତି। ରାସ୍ତା ଅବରୋଧ ଫଳରେ ଯାତାୟାତ ବାଧାପ୍ରାପ୍ତ ହୋଇଛି।
ସୂଚନାଯୋଗ୍ୟ, ଭଡ଼ା ଘର ବାହାର ପଟୁ ତାଲା ପଡ଼ିଥିଲା ବେଳେ ମୃତ ଶିକ୍ଷକ ଅନିରୁଦ୍ଧ ଘରେ ଭିତରେ ଖଟ ଉପରେ ଅର୍ଦ୍ଧଲଗ୍ନ ଅବସ୍ଥାରେ ପଡ଼ିଥିବା ଦେଖିବାକୁ ମିଳିଥିଲା। ପରେ ପୋଲିସ ପହଞ୍ଚି ମୃତଦେହ ଜବତ କରିଥିଲା। ଶିକ୍ଷକଙ୍କ ଏକ ଲାଲ୍ ରଙ୍ଗର ସ୍କୁଟିକୁ ପୋଲିସ ଶଢ଼ା ନିକଟ କେନାଲରୁ ଜବତ କରିଥିଲା। ଦୀର୍ଘଦିନ ପରେ କଣିଆରୀ ଗ୍ରାମର ଅରୂପ ଜେନା (୨୦) ଗିରଫ କରିଥିଲା। ମୃତ ଶିକ୍ଷକଙ୍କ ଭାଇ କଳାକାର ସ୍ବାଇଁ କହିଛନ୍ତି, ନନ୍ଦିପଦା ପୋଲିସ ମୁଖ୍ୟ ଅଭିଯୁକ୍ତଙ୍କୁ ଗିରଫ କରିବାରେ ବିଫଳ ହୋଇଛ। ମୁଖ୍ୟ ଅଭିଯୁକ୍ତଙ୍କୁ ଗିରଫ ଏବଂ ନ୍ୟାୟ ପ୍ରଦାନ ପାଇଁ ଜିଲା ଆରକ୍ଷୀ ଅଧୀକ୍ଷକଙ୍କୁ ପୂର୍ବରୁ ଜଣାଇଥିଲେ ମଧ୍ୟ କୌଣସି ସୁଫଳ ମିଳିଲାନି। ଶେଷରେ ଅନଶନ ପନ୍ଥା ଗ୍ରହଣ କଲୁ ବୋଲି ଆନ୍ଦୋଳନକାରୀମାନେ କହିଛନ୍ତି। ଅନ୍ୟପକ୍ଷରେ ତଦନ୍ତ ଠିକ୍ ଭାବେ ହେଉଥିବା ପୋଲିସ କହିଛି।
