ପାତ୍ରପୁର,୧୬।୯(ଉମା ଚରଣ ନେପାକ): ପାତ୍ରପୁର ବ୍ଲକ ଗୁଣ୍ଡୁରା ଗ୍ରାମର ପ୍ରତାପ ବାଡ଼ତ୍ୟା ଓ ତାଙ୍କ ସ୍ତ୍ରୀ ପ୍ରିୟଙ୍କା ହାଇଦ୍ରାବାଦରେ ଶ୍ରମିକ ଭାବେ କାମ କରୁଥିଲେ । ତେବେ ବୁଧବାର ପ୍ରିୟଙ୍କା ବାଡ଼ତ୍ୟା(30)ଙ୍କ ମୃତ୍ୟୁ ହୋଇଛି । ଗତ ଚାରି ମାସ ତଳେ ଉଭୟ ସ୍ୱାମୀ ଓ ସ୍ତ୍ରୀ ଦୁଇ ପୁଅଙ୍କୁ ପଦାଦିଗୀରେ ଆଈଙ୍କ ନିକଟରେ ଛାଡି ହାଇଦ୍ରାବାଦ ଯାଇଥିଲେ ।
ହାଇଦ୍ରାବାଦର ନିଜାମପେଟା ରୋଡ଼ ନିକଟ ବାସପେଲିରେ ଘର ଭଡା ନେଇ ଉଭୟ ରହି ପ୍ରତାପ ମିସ୍ତ୍ରୀ କାମ କରୁଥିବା ବେଳେ ପ୍ରିୟଙ୍କା ମଧ୍ୟ ଗୋଟିଏ କମ୍ପାନୀରେ କାମ କରୁଥିଲେ । ପ୍ରିୟଙ୍କାଙ୍କ ବାପା ମଧ୍ୟ ଝିଅ ସହ ରହୁଥିବା ବେଳେ ଗତ ମାସକ ତଳେ ପ୍ରିୟଙ୍କା ନିକଟରେ ଥିବା ପ୍ରାଇଭେଟ ସ୍କୁଲରେ କାମରେ ଯୋଗ ଦେଇଥିଲେ । ଗତ ଦୁଇ ଦିନ ହେଲା ପ୍ରିୟଙ୍କାଙ୍କୁ ଜ୍ୱର ହୋଇଥିବା ବେଳେ ବୁଧବାର ସ୍କୁଲ ଛୁଟି କରି ସ୍ୱାମୀ ଓ ସ୍ତ୍ରୀ ନିକଟରେ ଥିବା ମେଡିକାଲକୁ ଯାଇଥିଲେ । ଜ୍ୱର ଅଧିକ ଥିବାରୁ ସେଠାକାର ଡାକ୍ତର ତାଙ୍କୁ ନିକଟରେ ଥିବା ମମତା ହସପିଟାଲକୁ ସ୍ଥାନାନ୍ତର କରିଥିଲେ । ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା । ଏହି ଖବର ପରେ ସ୍ଥାନୀୟ ଅଞ୍ଚଳରେ ଶୋକାକୂଳ ପରିବେଶ ସୃଷ୍ଟି ହୋଇଛି ।
