ନୂଆଦିଲ୍ଲୀ/ଗୁରୁଗ୍ରାମ,୧୦।୧୦ : ସମାଜବାଦୀ ପାର୍ଟିର ସଂସ୍ଥାପକ ତଥା ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ମୁଲାୟମ ସିଂ ଯାଦବଙ୍କ ପରଲୋକ ଘଟିଛି। ଦୀର୍ଘଦିନ ଧରି ସେ ଅସୁସ୍ଥଥିଲେ। ମୃତ୍ୟୁ ବେଳକୁ ତାଙ୍କୁ ୮୨ ବର୍ଷ ହୋଇଥିଲା। ସୋମବାର ପୂର୍ବାହ୍ନ ୮ଟା ୨୦ରେ ସେ ଚିକିତ୍ସାଧୀନ ଅବସ୍ଥାରେ ଶେଷ ନିଶ୍ୱାସ ତ୍ୟାଗ କରିଛନ୍ତି।
ଗତ ୧୦ ଦିନ ଧରି ଗୁରୁଗ୍ରାମର ମେଦାନ୍ତ ହସ୍ପିଟାଲର ଆଇସିୟୁ ଏବଂ କ୍ରିଟିକାଲ କେୟାର ୟୁନିଟ (ସିସିୟୁ)ରେ ଚିକିତ୍ସିତ ହେଉଥିଲେ।
କିଡ଼ନୀ ସମସ୍ୟା ସହିତ ତାଙ୍କର ଅନ୍ୟ ସମସ୍ୟା ମଧ୍ୟ ଥିଲା। ଏହାଯୋଗୁ ତାଙ୍କ ଶରୀରର ଏକାଧିକ ଅଙ୍ଗ ଅକାମୀ ହୋଇପଡ଼ିଥିଲା।
ସମାଜବାଦୀ ପାର୍ଟିର ଟୁଇଟର ହ୍ୟାଣ୍ଡେଲରେ ଅଖିଳେଶ ଯାଦବ ଏ ସମ୍ପର୍କରେ ସୂଚନା ପ୍ରଦାନ କରିଛନ୍ତି।
୧୯୬୭ ରେ ମୁଲାୟମ ପ୍ରଥମ ଥର ପାଇଁ ଜଣେ ବିଧାୟକ ହୋଇଥିଲେ। ସେ ଆଠ ଥର ବିଧାୟକ ଏବଂ ସାତଥର ଏମ୍ପି ଭାବେ ନିର୍ବାଚିତ ହୋଇଥିଲେ। ସେ ତିନିଥର ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଏବଂ ଦୁଇଥର କେନ୍ଦ୍ରରେ ମନ୍ତ୍ରୀ ଥିଲେ। ଦେଶର ପ୍ରତିରକ୍ଷା ମନ୍ତ୍ରୀ ଭାବରେ ମୁଲାୟମ ସିଂ ଯାଦବ ସୀମାକୁ ଯାଇ ସେନାବାହିନୀଙ୍କର ହୃଦୟ ଜିତିଥିଲେ।
୧୯୩୯ ନଭେମ୍ବର ୨୨ରେ ସେ ଇଟଓ୍ବା ଜିଲାର ସାଫାଇ ଗାଁରେ ଜନ୍ମଗ୍ରହଣ କରିଥିଲେ।
