ଅମରପାଲି,୨୫।୧୧(ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ଉପଖଣ୍ଡ ଅନ୍ତର୍ଗତ କୋଟସମଲେଇ ପଞ୍ଚାୟତର ସୁନାପାଲିରେ କିଡନୀ ରୋଗର ଗତ ଗୁରୁବାର ଜଣେ ଆଦିବାସୀ ଯୁବକ ଭରତ ଭୋଇ (୩୧)ଙ୍କ ମୃତ୍ୟୁ ହୋଇଥିଲ। ବୀରମହାରାଜପୁର ଉପଖଣ୍ଡର ଉପାନ୍ତ କୋଟସମଲେଇ ପଞ୍ଚାୟତର ଏହି ବ୍ୟକ୍ତିଙ୍କ ସମେତ ବହଳପଦର ଓ ଦୁର୍ଜନତୈଲାର ସମୁଦାୟ ୪ ଜଣ ବ୍ୟକ୍ତିଙ୍କ ସପ୍ତାହେ ମଧ୍ୟରେ କିଡନୀ ରୋଗରେ ମୃତ୍ୟୁ ହୋଇଥିଲା। ଏନେଇ ଧରିତ୍ରୀରେ ଶନିବାର ଏକ ଖବର ପ୍ରକାଶ ପାଇଥିଲା। ତେବେ ସ୍ବାସ୍ଥ୍ୟ ବିଭାଗ କିଡନୀ ରୋଗର ମୃତ୍ୟୁବରଣ କରିଥିବା ବଡ଼ମାଳ, ମାଳିଦାଦର ଓ କୁହିଦାଦର ଗ୍ରାମକୁ ଯାଇ ମୃତ୍ୟୁର କାରଣ ତଦନ୍ତ କରିବା ସହିତ ଲୋକଙ୍କୁ ସଚେତନ କରିଥିଲେ। ମାତ୍ର କୋଟସମଲାଇ ପଞ୍ଚାୟତର ସୁନାପାଲି ଗ୍ରାମକୁ ସ୍ବାସ୍ଥ୍ୟ ବିଭାଗ ପହଞ୍ଚି ନ ଥିଲା। ଫଳରେ ଏହାକୁ ନେଇ ମଧ୍ୟ ଏକ ଖବର ରବିବାର ପ୍ରକାଶ ପାଇଥିଲା। ଏହି ଖବର ପ୍ରକାଶନ ପରେ ସ୍ବାସ୍ଥ୍ୟ ବିଭାଗ ତରଫରୁ ଏକ ଟିମ ସୋମବାର ସୁନାପାଲିରେ ପହଞ୍ଚି ସ୍ଥିତି ନିରୀକ୍ଷଣ କରିବା ସହ ରକ୍ତ ନମୁନା , ପାନୀୟ ଜଳ ନମୁନା ସଂଗ୍ରହ କରିଛନ୍ତି। କୋଟସମଲାଇ ସ୍ବାସ୍ଥ୍ୟକେନ୍ଦ୍ର ର ଡ଼ା. ଆଦିତ୍ୟ ଶ୍ରୀତମ ରାଉତଙ୍କ ସମେତ ଫର୍ମାସିଷ୍ଟ ଶ୍ରାବଣ କୁମାର ନନ୍ଦ,ମହିଳା ସ୍ବାସ୍ଥ୍ୟକର୍ମୀ ରତ୍ନାକର ମହନ୍ତ, ଏଲଟି ସବାନା ଆରଜୁ, ଏଏନଏମ ଜ୍ୟୋର୍ତିମୟୀ ପ୍ରଧାନ ଓ ଆଶା କର୍ମୀ ଶୁକ୍ରୀତା ବୁଡେକ ପ୍ରମୁଖ ସୁନାପାଲି ଗ୍ରାମକୁ ଯାଇ କିଡନୀରେ ମୃତକଙ୍କ ଘରକୁ ଯାଇ ମୃତ୍ୟୁର କାରଣ ତଦନ୍ତ କରିଛନ୍ତି। ଏହାପରେ ଗ୍ରାମରେ ଲୋକଙ୍କୁ ସଚେତନ କରିଛନ୍ତି। ଏହା ସହିତ ଗ୍ରାମର ୪୬ ଜଣ ବ୍ୟକ୍ତିଙ୍କଠୁ ରକ୍ତ ନମୁନା ସଂଗ୍ରହ କରିଛନ୍ତି। ବହୁଳ ବ୍ୟବହାର ହେଉଥିବା ପ୍ରାୟ ୫ ଟି ସ୍ଥାନରୁ ପାନୀୟ ଜଳ ନମୁନା ମଧ୍ୟ ସଂଗ୍ରହ କରି ପରୀକ୍ଷା ପାଇଁ ପଠାଇଛନ୍ତି। ସୂଚନା ଯୋଗ୍ୟ ଏହି ଗ୍ରାମକୁ ପ୍ରାୟ ବିଭିନ୍ନ ସମୟ ରେ ପ୍ରାୟ ୧୭ ଜଣଙ୍କ କିଡନୀ ଜନିତ ମୃତ୍ୟୁ ହୋଇଥିବା ଗ୍ରାମବାସୀ ଅଭିଯୋଗ କରିଛନ୍ତି। ତେବେ ପ୍ରଶାସନ ତରଫରୁ ଏହି ଗ୍ରାମରେ କିଡନୀ ରୋଗର ପ୍ରତିକାର ପାଇଁ ସ୍ଥାୟୀ ବ୍ୟବସ୍ଥା କରିବା ସହିତ କିଡନୀ ରୋଗର ମୃତକଙ୍କୁ ସରକାରୀ ଭାବେ ଆର୍ଥିକ ସହାୟତା ପ୍ରଦାନ କରିବାକୁ ସାଧାରଣରେ ଦାବି ହେଉଛି।
