ସମ୍ବଲପୁର,୩।୬(ପ୍ରମୋଦ ବହିଦାର): ସମ୍ବଲପୁର ସଦର ରେଞ୍ଜ ଅନ୍ତର୍ଗତ ମାନେଶ୍ବରର ଝାଙ୍କରପାଲି ସେକ୍ସନ ଅଧୀନସ୍ଥ ବଦୁଆପାଲି ଗ୍ରାମରେ ବିଦ୍ଯୁତଘାତରେ ଏକ ମାଈ ହାତୀର ମୃତ୍ଯୁ ହୋଇଥିବା ଖବର ମିଳିଛି। ଧମା ଥାନା ଅନ୍ତର୍ଗତ ବଦୁଆପାଲି ଗ୍ରାମ ନିକଟସ୍ଥ ଏକ ବେସରକାରୀ ଆମ୍ବ ତୋଟା(ବଗିଚା)କୁ ପଶିବା ପାଇଁ ଉକ୍ତ ମାଈ ହାତୀ ଉଦ୍ୟମ କରୁଥିଲା। ଏହି ସମୟରେ ଏହାର ପାଚେରୀରେ ଖଞ୍ଜା ଯାଇଥିବା ବିଦ୍ୟୁତ ତାର ସଂସ୍ପର୍ଶରେ ଆସି ଯାଇଥିଲା। ବିଦ୍ୟୁତ ଆଘାତ ଏତେ ପ୍ରଖର ଥିଲା ଯେ ଘଟଣାସ୍ଥଳରେ ହିଁ ହାତୀଟିର ମୃତ୍ୟୁ ଘଟିଛି।
ଏହି ଖବର ପାଇ ବନଖଣ୍ଡ ଅଧିକାରୀ(ଡିଏଫଓ) ସୁଦର୍ଶନ ଗୋପୀନାଥ ଯାଦବ, ଆରସିସିଏଫ ଆର.କେ ସ୍ବାଇଁ, ରେଞ୍ଜର ପ୍ରଶାନ୍ତ ଓରାମ ଏବଂ ଫରେଷ୍ଟର କେଶବ ଓରାମଙ୍କ ସମେତ ବହୁ ବନ ବିଭାଗ ଅଧିକାରୀ ଓ କର୍ମଚାରୀ ଘଟଣାସ୍ଥଳରେ ପହଞ୍ଚି ଘଟଣାର ସରଜମିନ ତଦନ୍ତ କରିଛନ୍ତି।
ତେବେ ଭୁବନେଶ୍ବରରୁ ଆସିବାକୁ ଥିବା ଏକ ମିଳିତ ଟାସ୍କଫୋର୍ସ(ଜେଟିଏଫ୍) ଟିମ୍ ଘଟଣାସ୍ଥଳରେ ପହଞ୍ଚି ପାରି ନ ଥିବାରୁ, ମୃତ ହାତୀର ବ୍ୟବଚ୍ଛେଦ ହୋଇପାରି ନାହିଁ। ସେମାନେ ଆସିଲା ପରେ ଗୁରୁବାର ହାତୀର ଶବ ବ୍ୟବଚ୍ଛେଦ କରାଯିବ ବୋଲି ବନ ବିଭାଗ ଡିଏଫଓ କହିଛନ୍ତି। ବନ ବିଭାଗ ପକ୍ଷରୁ ସ୍ଥାନୀୟ ଅଞ୍ଚଳରେ ସୁରକ୍ଷା ବ୍ୟବସ୍ଥା ପ୍ରତି ଦୃଷ୍ଟି ଦିଆଯାଉଥିବା ସତ୍ତ୍ୱେ ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି ହୋଇଛି।