ନିମାପଡ଼ା,୧୨।୩(ଡି.ଏନ୍.ଏ.): ଚଳିତ ମାଟ୍ରିକ ପରୀକ୍ଷାରେ କପି ପାଇଁ ଡିଲ୍ ହୋଇଥିବା ଚର୍ଚ୍ଚା ହେଉଛି। ଏନେଇ ପ୍ରଧାନଶିକ୍ଷକ ଏବଂ ଜଣେ ବ୍ୟକ୍ତିଙ୍କ ମଧ୍ୟରେ ହୋଇଥିବା ଟେଲିଫୋନ ବାର୍ତ୍ତାଳାପର ଅଡିଓ ଭାଇରାଲ ହେବା ପରେ ଆଲୋଡ଼ନ ସୃଷ୍ଟି ହୋଇଛି। ଖୋଦ୍ ବିଦ୍ୟାଳୟ ଓ ଗଣଶିକ୍ଷାମନ୍ତ୍ରୀ ସମୀର ରଞ୍ଜନ ଦାଶଙ୍କ ନିର୍ବାଚନ ମଣ୍ଡଳୀର ଏକ ସ୍କୁଲରେ କପି ପାଇଁ ଏଭଳି ଡିଲ୍ ହୋଇଥିବା କୁହାଯାଉଛି। ଏହାର ତଦନ୍ତ ପାଇଁ ମନ୍ତ୍ରୀ ମାଧ୍ୟମିକ ଶିକ୍ଷା ପରିଷଦ (ବୋର୍ଡ)କୁ ନିର୍ଦ୍ଦେଶ ଦେଇଛନ୍ତି।
ପୁରୀ ଜିଲା ନିମାପଡ଼ା ବ୍ଲକର ଏକ ସ୍କୁଲରେ ଚାଲିଥିବା ମାଟ୍ରିକ ପରୀକ୍ଷାରେ କପି କରିବାକୁ ସୁଯୋଗ ଦେବା ନିମନ୍ତେ ପ୍ରଧାନଶିକ୍ଷକ ଏବଂ ଜଣେ ବ୍ୟକ୍ତିଙ୍କ ମଧ୍ୟରେ ସଲାସୁତରା ଓ ଅର୍ଥ କାରବାର ହୋଇଥିବା ଉକ୍ତ ଭାଇରାଲ ଅଡିଓରୁ ଜଣାପଡ଼ିଛି। ଏହି ସ୍କୁଲରେ ଏକ ମୁକ୍ତ ବିଦ୍ୟାଳୟର ୬୧ଜଣ ପରୀକ୍ଷାର୍ଥୀ ଶୁକ୍ରବାର ସାହିତ୍ୟ ବିଷୟରେ ପରୀକ୍ଷା ଦେଇଛନ୍ତି। ଚର୍ଚ୍ଚା ହେଉଛି ଯେ, ସ୍କୁଲ ବାହାରେ କଡ଼ା ସିକ୍ୟୁରିଟି ବ୍ୟବସ୍ଥା ଥିବାବେଳେ ଭିତରେ କେତେଜଣ ଶିକ୍ଷକ ପରୀକ୍ଷାର୍ଥୀଙ୍କୁ କପି ଯୋଗାଇଛନ୍ତି। ଏଥିପାଇଁ କୁଆଡ଼େ ଜଣେ ଜଣେ ପରୀକ୍ଷାର୍ଥୀଙ୍କଠାରୁ ୨ରୁ ୩ ହଜାର ଟଙ୍କା ଆଦାୟ ହୋଇଥିବା କୁହାଯାଉଛି।
ଏ ସମ୍ପର୍କରେ ବିଦ୍ୟାଳୟ ପ୍ରଧାନ ଶିକ୍ଷକଙ୍କୁ ପଚରାଯିବାରୁ ସେ କହିଛନ୍ତି, ଭାଇରାଲ ହୋଇଥିବା ଅଡିଓର କୌଣସି ସତ୍ୟତା ନାହିଁ। ଏହା ଏକ ଷଡ଼ଯନ୍ତ୍ର। ସ୍କୁଲ ଏବଂ ତାଙ୍କୁୁ ବଦନାମ କରିବା ପାଇଁ ଏହା ଉଦ୍ଦିଷ୍ଟ। କପି ପାଇଁ କୌଣସି ଡିଲ୍ ହୋଇନାହିଁ କି ସେ ଏନେଇ କାହା ସହିତ କଥା ହୋଇନାହାନ୍ତି। ଏନେଇ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ଦାଶ କହିଛନ୍ତି ଯେ ଉକ୍ତ ଅଡିଓ ସମ୍ପର୍କରେ ୩ ଦିନ ମଧ୍ୟରେ ରିପୋର୍ଟ ଦେବାକୁ ସେ ବୋର୍ଡ ସଭାପତିଙ୍କୁ ନିର୍ଦ୍ଦେଶ ଦେଇଛନ୍ତି। ଆସନ୍ତା ସୋମବାରରୁ ପରୀକ୍ଷା କଡ଼ାକଡ଼ି କରାଯିବ, ପରୀକ୍ଷା କେନ୍ଦ୍ରଗୁଡ଼ିକୁ ସେଣ୍ଟ୍ରାଲ ସ୍କ୍ବାଡ୍ ପଠାଯିବାକୁ ସେ ବୋର୍ଡ ସଭାପତିଙ୍କୁ କହିଛନ୍ତି। ପରୀକ୍ଷା କେନ୍ଦ୍ରଗୁଡ଼ିକରେ ସ୍ବଚ୍ଛତା ଅବଲମ୍ବନ କରାଯାଇଛି। ପରୀକ୍ଷାର୍ଥୀମାନେ ଶୃଙ୍ଖଳାର ସହ ପରୀକ୍ଷା ଦେଉଛନ୍ତି ବୋଲି ମନ୍ତ୍ରୀ ଦାଶ କହିଛନ୍ତି। କପି ହେବା କଥାକୁ ମନ୍ତ୍ରୀ ଅସ୍ବୀକାର କରିଛନ୍ତି।
