ଆଇପିଏଲ ୨୦୨୦ର ଶେଷ ଲିଗ ମ୍ୟାଚରେ ସନରାଇଜର୍ସ ହାଇଦ୍ରାବାଦ ମୁମ୍ବାଇ ଇଣ୍ଡିଆନ୍ସକୁ ପରାସ୍ତ କରି ପ୍ଲେ ଅଫରେ ପ୍ରବେଶ କରିଛି। ମୁମ୍ବାଇ ବିପକ୍ଷ କର ବା ମର ମ୍ୟାଚ୍କୁ ୧୦ ଉଇକେଟ ବିଜୟରେ ଦଳର ଅଧିନାୟକ ଡେଭିଡ ୱାର୍ନର ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ଏହି ମ୍ୟାଚ୍ରେ ସେ ଏକ ଐତିହାସିକ ରେକର୍ଡ ମଧ୍ୟ କରିଥିଲେ। ଏହି ମ୍ୟାଚ୍ରେ ଡେଭିଡ ୱାର୍ଣ୍ଣର ୫୮ଟି ବଲରେ ୮୫ ରନ ସଂଗ୍ରହ କରିଥିଲେ। ଏଥିରେ ୧୦ଟି ଚୌକା ଏବଂ ଗୋଟିଏ ଛକା ମାରିଥିଲେ। ଏହା ସହିତ ଏହି ଚଳିତ ଆଇପିଏଲରେ ୫୦୦ ରନ ପୂରଣ କରିଥିଲେ। ଏହି ଇନିଂସ ମଧ୍ୟରେ ସେ ବିରାଟ କୋହଲିଙ୍କ ଏକ ସ୍ବତନ୍ତ୍ର ରେକର୍ଡ ମଧ୍ୟ ଭାଙ୍ଗିଥିଲେ। ଡେଭିଡ ୱାର୍ଣ୍ଣର ଆଇପିଏଲରେ ଷଷ୍ଠ ଥର ପାଇଁ ୫୦୦ରୁ ଅଧିକ ରନ ସଂଗ୍ରହ କରି ବିଶ୍ୱର ପ୍ରଥମ ବ୍ୟାଟ୍ସମ୍ୟାନ ହୋଇଛନ୍ତି। ସେ ଲଗାତାର ୬ଟି ସିଜନରେ ୫୦୦ରୁ ଅଧିକ ରନ କରିଛନ୍ତି। ବିରାଟ କୋହଲି ୫ଟି ସିଜିନରେ ୫୦୦ରୁ ଅଧିକ ରନ ସଂଗ୍ରହ କରିଛନ୍ତି। ୱାର୍ଣ୍ଣର ୨୦୧୪ରେ ୫୨୮ ରନ, ୨୦୧୫ରେ ୫୬୨ ଏବଂ ୨୦୧୬ରେ ୮୪୮ ରନ କରିଥିଲେ। ଏହା ପରେ, ୱାର୍ଣ୍ଣର ୨୦୧୭ରେ ୬୪୧ ରନ ସ୍କୋର କରିଥିଲେ। ବଲ ଟାମ୍ପରିଂ ଉପରେ ନିଷେଧାଦେଶ ହେତୁ ସେ ୨୦୧୮ରେ ଖେଳି ନ ଥିଲେ କିନ୍ତୁ ୨୦୧୯ରେ ୱାର୍ଣ୍ଣର ୬୯୨ ରନ ସ୍କୋର କରି ଚମତ୍କାର ପ୍ରତ୍ୟାବର୍ତ୍ତନ କରିଥିଲେ।
