ଦେଶମନ୍ତପୁର, ୧୩ା୯( ଡି.ଏନ୍. ଏ.):କୋରାପୁଟ ଜିଲାର ଦଶମନ୍ତପୁର ବ୍ଲକରେ ଏବେ ମଧ୍ୟ ଏପରି ଦୁର୍ଗମ ଗ୍ରାମାଞ୍ଚଳ ରହିଛି ଯେଉଁଠି ଅର୍ଥ ବିନିଯୋଗ ହେଉଥିଲେ ମଧ୍ୟ ଏହାର ସୁଫଳ ଲୋକେ ପାଉନାହାନ୍ତି। ଏପରି କି ଅନେକ ଗ୍ରାମକୁ ରାସ୍ତାଟିଏ ନାହିଁ। ଯାତାୟାତରେ ଏବଂ ଗୁରୁତର ରୋଗୀଙ୍କୁ ଡାକ୍ତରଖାନା ନେବାରେ ଗ୍ରାମବାସୀ ନାହିଁ ନ ଥିବା ହଇରାଣ ହେଉଛନ୍ତି। ଗ୍ରାମର ପିଲାମାନେ ମଧ୍ୟ ବିଦ୍ୟାଳୟ ଯିବାକୁ ସମସ୍ୟା ଭୋଗୁଛନ୍ତି। କେତେକ ସ୍ଥାନରେ ନଦୀପାର ହୋଇ ଯିବାକୁ ହେଉଛି। ବ୍ଲକର ପିଣ୍ଡାପଦର ପଞ୍ଚାୟତର ଦେଓଖଡ଼କ ଗ୍ରାମ ଏହାର ଏକ ଉଦାହରଣ। ଗ୍ରାମରେ ପ୍ରାୟ ୫୪ ପରିବାର ବସବାସ କରନ୍ତି। ଜନସଂଖ୍ୟା ରହିଛି ୨୮୦। ଗ୍ରାମରେ ଥିବା ବିଦ୍ୟାଳୟରେ ୧ମ ରୁ ୫ମ ଶ୍ରେଣୀ ପର୍ଯ୍ୟନ୍ତ ରହିଛି । ଷଷ୍ଠ ଓ ସପ୍ତମ ଶ୍ରେଣୀ ପାଇଁ ଛାତ୍ରୀଛାତ୍ରଙ୍କୁ ଅନ୍ଧାରୀ ନଦୀ ପାର ହୋଇ ବିଦ୍ୟାଳୟ ଯିବାକୁ ପଡେ। ଜୀବନକୁ ବାଜି ଲଗାଇ ଅଭିଭାବକମାନେ ପିଲାଙ୍କୁ ବିଦ୍ୟାଳୟ ନେଇ ଛାଡିଥାନ୍ତି। ବର୍ଷା ଦିନେ ଏହି ନଦୀର ଜଳସ୍ତର ଅଧିକ ବଢିଯାଏ ବୋଲି ଗ୍ରାମର ସତ୍ୟଦାନ ବାଘ, ରାୟଲା ମୁଦୁଲି, ପ୍ରେମଚନ୍ଦ୍ର ଖୋସ୍ଲା, ଗଙ୍ଗା ପୂଜାରୀଙ୍କ ସମେତ ଅନ୍ୟମାନେ କହିଛନ୍ତି। ଏ ସମ୍ପର୍କରେ ଗ୍ରାମବାସୀ ବହୁବାର ବ୍ଲକ ପ୍ରଶାସନଠାରୁ ଆରମ୍ଭ କରି ଜିଲାପାଳଙ୍କ ଅଭିଯୋଗ ଶୁଣାଣି ଓ ସ୍ଥାନୀୟ ବିଧାୟକଙ୍କୁ ଜଣାଇ କିଛି ସୁଫଳ ଏଯାଏ ମିଳିନି। ଗ୍ରାମକୁ ପକ୍କା ରାସ୍ତା ଓ ନଦୀରେ ପୋଲ ନ ଥିବାରୁ ସରକାରଙ୍କ କୌଣସି ଉନ୍ନୟନମୂଳକ ଯୋଜନାରୁ ସୁଫଳ ଆମେ ପାଇପାରୁନାହିଁ ବୋଲି ସେମାନେ ଅଭିଯୋଗ କରିଛନ୍ତି। ଆଗାମୀ ଦିନରେ ପ୍ରଶାସନ ଏ ଦିଗରେ ପଦକ୍ଷେପ ନ ନେଲେ ଆମେ ଜିଲାପାଳଙ୍କ ଦ୍ୱାରସ୍ଥ ହେବୁ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି।
