ଭୁବନେଶ୍ୱର, ୧୫।୧୨(ବ୍ୟୁରୋ): ପ୍ରାକୃତିକ ଜଙ୍ଗଲରେ ଆର୍ଦ୍ରତା ସଂରକ୍ଷଣରେ ଉନ୍ନତି ଆଣିବା ପାଇଁ ଓଡ଼ିଶା ବନ ବିଭାଗ କୃତ୍ରିମ ଗାତ ଖୋଳୁଛି। ଗତ ୪-୫ ବର୍ଷ ହେଲା ବିଭିନ୍ନ ସଂରକ୍ଷିତ ଜଙ୍ଗଲରେ ଏଭଳି ଗାତ ସବୁ ରହିଛି। ଏହି ଗାତଗୁଡ଼ିକ ସ୍ଥାନୀୟ ଉଦ୍ଭିଦ ଏବଂ ଜୀବଜନ୍ତୁ ଉପରେ ପ୍ରତିକୂଳ ପ୍ରଭାବ ପକାଇବା ସମ୍ଭାବନା ଯଥେଷ୍ଟ ଅଧିକ ରହିଥିବା ବନ୍ୟପ୍ରାଣୀ ବିଶେଷଜ୍ଞମାନେ ମତପ୍ରକାଶ କରୁଛନ୍ତି। ତେଣୁ ଏହାକୁ ବନ୍ଦ କରିବା ପାଇଁ ଦାବି ଉଠିଲାଣି। ଏ ନେଇ ୱାଇଲ୍ଡ ଲାଇଫ୍ ସୋସାଇଟି ଅଫ୍ ଓଡ଼ିଶା (ଡବ୍ଲ୍ୟୁଏସ୍ଓ) ତରଫରୁ ରାଜ୍ୟ ମୁଖ୍ୟ ବନ୍ୟପ୍ରାଣୀ ତତ୍ତ୍ୱାବଧାରକଙ୍କ ନିକଟକୁ ତଥ୍ୟଭିତ୍ତିକ ଅଭିଯୋଗପତ୍ର ଦିଆଯାଇଛି।
ଏହି ଅଭିଯୋଗପତ୍ରରେ ଡବ୍ଲ୍ୟୁଏସ୍ଓ ସମ୍ପାଦକ ବିଶ୍ବଜିତ୍ ମହାନ୍ତି ଢେଙ୍କାନାଳ ଡିଭିଜନ ଅନ୍ତର୍ଗତ କାମାକ୍ଷାନଗର ଅଞ୍ଚଳର ଶାଳ ଜଙ୍ଗଲରେ ଗଛମୂଳରେ ଗାତ ଖୋଳା ଯାଇଥିବା କିଛିି ଫଟୋ ସଂଲଗ୍ନ କରିଛନ୍ତି। ସେ କହିଛନ୍ତି, ଯଦିଓ ବୃକ୍ଷର ମଙ୍ଗଳ ଓ ଜଳ ରଖିବା ନିମନ୍ତେ ବନ ବିଭାଗ ପକ୍ଷରୁ ଜଙ୍ଗଲ ଅଞ୍ଚଳରେ ଗାତ ଖୋଳାଯାଉଛି, କିନ୍ତୁ ସେଗୁଡ଼ିକ ବନ୍ୟପ୍ରାଣୀଙ୍କ ପାଇଁ ଘୋର ସମସ୍ୟା ସୃଷ୍ଟି କରିବ। ଫରେଷ୍ଟ ଫ୍ଲୋର ବା ଜଙ୍ଗଲ ଚଟାଣ ପ୍ରକୃତ ପକ୍ଷେ ବହୁତ ମହତ୍ତ୍ୱପୂର୍ଣ୍ଣ। କାରଣ ଏହା ଜୀବଜନ୍ତୁ ସଂରକ୍ଷଣ ଦିଗରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ। କୌଣସି କୃତ୍ରିମ ହସ୍ତକ୍ଷେପ ବିନା ଏହା ହଜାର ହଜାର ବର୍ଷ ଧରି ପ୍ରାକୃତିକ ଭୂଗୋଳ ଓ ପରିବେଶକୁ ବଜାୟ ରଖିପାରିଛି। ଗଛ ମୂଳରେ ଗାତ ଖୋଳିଲେ ବିଭିନ୍ନ ପ୍ରକାର ସମସ୍ୟା ଦେଖାଯିବ। ଗଛ ପାଖରେ ଗାତ ଖୋଳାଯିବାବେଳେ ଚେର ମଧ୍ୟ କିଛି ମାତ୍ରାରେ କଟିଯାଉଛି। ବନ୍ୟପ୍ରାଣୀ ଓ ଗୋରୁ ଏହି ସମତଳ ଚଟାଣରେ ଚାଲିବା ବେଳେ ହଠାତ୍ ଏପରି କୃତ୍ରିମ ଗାତ (୧୮ ଇଞ୍ଚ ଗଭୀର)ରେ ପଡ଼ିଲେ ଆଘାତ ପାଇବେ। ଶିକାରୀ ଓ ବନ୍ୟଜନ୍ତୁଙ୍କଠାରୁ ରକ୍ଷା ପାଇବା ପାଇଁ ହରିଣ, କୁଟୁରା କିମ୍ବା ବାର୍ହା ଆଦି ବନ୍ୟପ୍ରାଣୀ ଦୌଡ଼ିବା ବେଳେ ସେହି ଗାତରେ ପଡ଼ି ଗୋଡ଼ ଭାଙ୍ଗିବା ଆଶଙ୍କା ରହିଛି। ସେହିପରି କିଛି ଦିନ ପରେ ସେହି ଗାତଗୁଡ଼ିକ ଉପରେ ଘାସ ବା ଲଟା ମାଡ଼ିଯାଇ ଲୁଚିଯିବ ଏବଂ ଅଜାଣତରେ ସେଥିରେ କେହି ପଡ଼ିଯିବାର ସମ୍ଭାବନା ରହିଛି। ଗାତ ଖୋଳିବା ସମୟରେ ମାଟି ଚଟାଣରେ ଗଛରୁ ପଡ଼ିଥିବା ମଞ୍ଜି ନଷ୍ଟ ହୋଇ ଜଙ୍ଗଲର ପ୍ରାକୃତିକ ପୁନଃ ନିର୍ମାଣ ଉପରେ ମଧ୍ୟ ପ୍ରଭାବ ପକାଇଥାଏ। ଅଧିକାଂଶ ସରୀସୃପ ଜଙ୍ଗଲ ଚଟାଣ ଭୂମିରେ ହିଁ ବାସ କରନ୍ତି। ତେଣୁ ସରୀସୃପଙ୍କ ଛୁଆମାନଙ୍କ ପାଇଁ ଏହି କୃତ୍ରିମ ଗାତଗୁଡ଼ିକ ଘାତକ ସାବ୍ୟସ୍ତ ହେବ। ଗଛ ମୂଳରୁ ବୁଦା ସଫା କରି ଗାତ ଖୋଳିବା ଦ୍ବାରା ସରୀସୃପଙ୍କ ପ୍ରଜନନ ଏବଂ ଅଣ୍ଡା ଦେବା ପ୍ରକ୍ରିୟା ପାଇଁ ସମସ୍ୟା ସୃଷ୍ଟି ହେବ ବୋଲି ଉକ୍ତ ପତ୍ରରେ ଉଲ୍ଲେଖ କରାଯାଇଛି। ଏ ନେଇ ଡବ୍ଲ୍ୟୁଏସ୍ଓ ସମ୍ପାଦକ ମହାନ୍ତି କହିଛନ୍ତି, ଜଳଧାରଣ କ୍ଷମତା ବଢ଼ାଇବା ପାଇଁ ଜଙ୍ଗଲରେ ଗଛମୂଳରେ ଏଭଳି କୃତ୍ରିମ ଗାତ ଖୋଳିବା ବନ୍ୟପ୍ରାଣୀଙ୍କ ପାଇଁ ଆଦୌ ମଙ୍ଗଳକାରକ ନୁହେଁ। ଆମ ଜଙ୍ଗଲର ଗଛ ଏବଂ ଅନ୍ୟାନ୍ୟ ଉଦ୍ଭିଦ ହଜାର ହଜାର ବର୍ଷ ଧରି ମଣିଷର ହସ୍ତକ୍ଷେପ ବିନା ମଧ୍ୟ ବଞ୍ଚତ୍ ଆସିଛନ୍ତି। ତେଣୁ ବନ୍ୟପ୍ରାଣୀଙ୍କର କ୍ଷତି କରୁଥିବା କୃତ୍ରିମ ଜଳଧାରଣ ଗାତ ଖୋଳା ପ୍ରକ୍ରିୟାକୁ ତୁରନ୍ତ ବନ୍ଦ କରାଯିବା ଉଚିତ।
