ଖଣ୍ଡପଡା,୨୪ା୭(ଅଜୟ କୁମାର ମହାରଣା): କଣ୍ଟିଲୋ ଯାତ୍ରାପଦା ବଜାର ଛକ ଉପରେ ଲାଗିଥିବା ହାଇମାସ୍କ ଲାଇଟ ଦୀର୍ଘ ବର୍ଷ ହେଲା ଅକାମୀ ହୋଇ ପଡଛି। ଏବେ ଏହାର ଖୁଣ୍ଟଟିର ନିମ୍ନ ଭାଗ ନଷ୍ଟ ହୋଇ ବିପଦ ସୃଷ୍ଟି କରିଛି। ଘରୋଇ ବିଦ୍ୟୁତ୍ ଲାଇନ ସଂଯୋଗ ହୋଇଥିବା ଟଣକା ତାରରେ ଅଟକି ରହିଥିବାରୁ ଏହା କେତେବେଳେ ଯେ ବିପଦ ଘଟାଇବ କହିହେବ ନାହିଁ। ଏହି ଖୁଣ୍ଟ ପାଖ ଦେଇ ପ୍ରତ୍ୟେହ ଯାତାୟତ କରୁଥିବା ଜନସାଧାରଣଙ୍କ ନଜର ରହିଥିଲେ ହେଁ ଏହାକୁ ଉଠାଇ ଦେବାକୁୁ ଯେପରି କାହାର ଆନ୍ତରିକତା ନାହିଁ।
ଅପରପକ୍ଷରେ ଦୀର୍ଘବର୍ଷ ହେଲା ଅକାମୀ ହୋଇ ପଡ଼ିଥିବା ଏହି ଲାଇଟର ମାଲିକ କିଏ, ରକ୍ଷଣା ବେକ୍ଷଣ କାହାର ଦାୟିତ୍ୱ ସେ ନେଇ ପ୍ରଶ୍ନବାଚୀ ସୃଷ୍ଟି କରିଛି। ୨୦୦୩ରେ ତତ୍କାଳୀନ ଭୁବନେଶ୍ୱର ସାଂସଦ ପ୍ରସନ୍ନ କୁମାର ପାଟ୍ଟଶାଣୀଙ୍କ ପାଣ୍ଠିର ଅର୍ଥ ବ୍ୟୟ ବରାଦ କରାଯାଇ ବିଭିନ୍ନ ପଞ୍ଚାୟତକୁ ହାଇମାକ୍ସ ଲାଇଟ ଯୋଗାଇ ଦିଆଯାଇଥିଲା। ଏହି ଯୋଜନାରେ କଣ୍ଟିଲୋ ପଞ୍ଚାୟତ ଅଧୀନ ଶ୍ରୀନୀଳମାଧବ ଜୀଉ ମନ୍ଦିର ପୂର୍ବଦ୍ୱାର ଓ କଣ୍ଟିଲୋ ଯାତ୍ରାପଦା ବଜାର ଛକରେ ଗୋଟିଏ ଲେଖାଏଁ ଏପରି ୨ଟି ହାଇମାକ୍ସ ଲାଇଟ ଲଗାଯାଇଥିଲା। ମାତ୍ର ଲାଇଟ ଲାଗିବାର ୨ବର୍ଷ ନ ପୂରୁଣୁ ସମ୍ପୃକ୍ତ ଲାଇଟଗୁଡିକ ଅକାମୀ ହୋଇ ପଡ଼ିଥିଲା। ଏ ସମ୍ପର୍କରେ ବିଦ୍ୟୁତ ବିଭାଗକୁ ଜଣାଇବା ସତ୍ତ୍ୱେ ଏହାର ରକ୍ଷଣାବେକ୍ଷଣ ଦାୟିତ୍ୱ ଆମର ନୁହେଁ ତାହା ପଞ୍ଚାୟତର ବୋଲି କହୁଛନ୍ତି। ପଞ୍ଚାୟତ ପକ୍ଷରୁ ମଧ୍ୟ ଏହି ଖୁଣ୍ଟର ଦାୟିତ୍ୱ ଆମର ନୁହଁ ବୋଲି କହି ଆସୁଛନ୍ତି। ତେବେ କାର୍ଯ୍ୟକ୍ଷମ ହେଉ ନ ଥିବା ଏହି ଲାଇଟଗୁଡିକ ଦୀର୍ଘ ୧୯ ବର୍ଷରୁ ଊର୍ଦ୍ଧ୍ୱ ହେବ ରକ୍ଷଣାବେକ୍ଷଣ ଅଭାବରୁ ବଜାର ଛକରେ ରହିଛି। ସମ୍ପୃକ୍ତ ଖଣ୍ଟର ନିମ୍ନ ଭାଗରେ କଳଙ୍କି ଲାଗି ନଷ୍ଟ ହେବାକୁ ବସିଲାଣି। ଖୁଣ୍ଟର ୯୦ ଭାଗ ଅଂଶ ନଷ୍ଟ ହୋଇ ମାତ୍ର ଅଳ୍ପ କିଛି ଅଂଶରେ ଅଟକି ରହିଥିବା ପରିଲକ୍ଷିତ ହେଉଛି। ଖୁଣ୍ଟର ଉପରି ଭାଗରେ କୌଣସି ଏକ ଘରୋଇ ବିଦ୍ୟୁତ୍ ଲାଇନର ଟଣକା ତାରରେ ଅଟକି ରହିଥିବା ଜଣାପଡ଼ିଛି। ଏହି ଖଣ୍ଟକୁ ତୁରନ୍ତ ହଟାଇବାକୁ ବିଦ୍ୟୁତ୍ ବିଭାଗ କର୍ତ୍ତୃପକ୍ଷଙ୍କୁ ବାରମ୍ବାର ଜଣାଯାଉଥିଲେ ମଧ୍ୟ କୌଣସି ସୁଫଳ ମିଳୁ ନ ଥିବା ଜଣାଯାଇଛି। ତେବେ ସ୍ଥାନୀୟ ସରପଞ୍ଚ ଶ୍ରୀୟାରାଣୀ ବେହେରାଙ୍କୁ ପଚାରିବାରେ ଏ ଦିଗରେ ପଦକ୍ଷେପ ଗ୍ରହଣ କରିବେ ବୋଲି ସୂଚନା ଦେଇଛନ୍ତି। ଖୁଣ୍ଟଟି ଯେଉଁ ଅବସ୍ଥାରେ ରହିଛି ତାହା କେତେବେଳେ ଭାଙ୍ଗି ବିପଦ ସୃଷ୍ଟି କରିବ କହି ହେଉନାହିଁ। ତେଣୁ ତୁରନ୍ତ ଏ ଦିଗରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପଞ୍ଚାୟତ କର୍ତ୍ତୃପକ୍ଷ କିମ୍ବା ବିଦ୍ୟୁତ୍ ବିଭାଗ ଯତ୍ନବାନ ହେବାକୁ ସାଧାରଣରେ ଦାବି ହେଉଛି।
