ପଦ ହରାଇଲେ ଦୈସିଂ ସରପଞ୍ଚ
8:34 amApril 17, 2021April 17, 2021 / 21

ଭଦ୍ରକ ଅଫିସ,୧୭।୪-ଭଦ୍ରକ ଜିଲା ସଦର ବ୍ଲକ ଅଧୀନ ଦୈସିଂ ସରପଞ୍ଚ ପାର୍ବତୀ ମାଝୀ ଓଡ଼ିଆ ଲେଖାପଢ଼ା ଜାଣି ନ ଥିବାରୁ ପଦ ହରାଇଛନ୍ତି। ଜିଲା ଜଜ୍‌ କୋର୍ଟ ତାଙ୍କୁ ଅଯୋଗ୍ୟ ଘୋଷଣା କରିବା ସହ ଭଦ୍ରକ ବିଡିଓ ତୁରନ୍ତ ସରପଞ୍ଚ ପଦ ପୂରଣ ପାଇଁ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଛନ୍ତି।
ସୂଚନାଯୋଗ୍ୟ, ଗତ ପଞ୍ଚାୟତ ନିର୍ବାଚନରେ ଦୈସିଂ ସରପଞ୍ଚ ପଦବୀ ତଫସିଲଭୁକ୍ତ ଜନଜାତି ପାଇଁ ସଂରକ୍ଷିତ ଥିଲା। ମୋଟ ୨ ଜଣ ପ୍ରାର୍ଥୀ ପାର୍ବତୀ ଓ ବାଗନ ସିଂ ନାମାଙ୍କନ ପତ୍ର ଦାଖଲ କରିଥିଲେ। ପାର୍ବତୀ ଅଧିକ ଭୋଟ ପାଇ ନିର୍ବାଚିତ ହୋଇଥିଲେ। କିନ୍ତୁ ପାର୍ବତୀ ଓଡ଼ିଆ ଲେଖାପଢ଼ା ଜାଣି ନ ଥିବାରୁ ପଞ୍ଚାୟତ ଆଇନର ଧାରା ୧୧(ଖ) ଅନୁଯାୟୀ ସେ ଅଯୋଗ୍ୟ ଥିବାରୁ ପ୍ରତିଦ୍ୱନ୍ଦ୍ୱିତା ଲଢ଼ିବା ପାଇଁ ପରାଜିତ ପ୍ରାର୍ଥୀ ବାଗନଙ୍କ ଆବେଦନ କ୍ରମେ ଭଦ୍ରକ କନିଷ୍ଠ ଦେୱାନୀ ଅଦାଲତରେ ସେହି ଆଇନର ଧାରା ୩୧ରେ ଏକ ମାମଲା ନିର୍ବାଚନ ମିସ୍‌ କେଶ୍‌-୫୮/୧୭ ରୁଜୁ ହୋଇଥିଲା। ନିମ୍ନ ଅଦାଲତ ଦରଖାସ୍ତକାରୀଙ୍କ ସାକ୍ଷ୍ୟ ଗ୍ରହଣ କରିଥିଲେ ହେଁ ପାର୍ବତୀଙ୍କ ସାକ୍ଷ୍ୟ ନ ନେଇ ମାମଲାକୁ ଖାରଜ କରିଦେଇଥିଲେ। ନିମ୍ନ ଅଦାଲତର ଏହି ରାୟକୁ ଚ୍ୟାଲେଞ୍ଜ କରି ବାଗନ ଭଦ୍ରକ ଜିଲା ଜଜ୍‌ଙ୍କ ଅଦାଲତରେ ଏକ ନିର୍ବାଚନ ଅପିଲ-୪୩/୧୮ ଦାଖଲ କରିଥିଲେ। ଜିଲା ଜଜ୍‌ ଶିଶିର କୁମାର ରଥ ପାର୍ବତୀଙ୍କୁ କୋର୍ଟକୁ ଡକାଇ ଓଡ଼ିଆ ଲେଖାପଢ଼ାର ପରୀକ୍ଷା ସାକ୍ଷ୍ୟ ମାଧ୍ୟମରେ କରିଥିଲେ। ଯାହାକି ପାର୍ବତୀଙ୍କ ପକ୍ଷେ ସମ୍ଭବ ହୋଇପାରି ନ ଥିଲା। ଏଣୁ ଗତ ୧୩ ତାରିଖରେ କୋର୍ଟ ତାଙ୍କୁ ଅଯୋଗ୍ୟ ଘୋଷଣା କରିଛନ୍ତି। ବାଗନଙ୍କ ପକ୍ଷରୁ ଅଧିବକ୍ତା ସନାତନ ଦୀକ୍ଷିତ ଓ ପାର୍ବତୀଙ୍କ ପକ୍ଷରୁ ବରିଷ୍ଠ ଅଧିବକ୍ତା ରାଜକିଶୋର ଦାସ ମାମଲା ପରିଚାଳନା କରିଥିଲେ।