ଭଦ୍ରକ ଅଫିସ,୩।୧୦: ଶାରଦୀୟ ଦୁର୍ଗାପୂଜା ପାଇଁ ସବୁଠି ଉତ୍ସବମୁଖର। କୋଭିଡ୍ ପାଇଁ ଦୁଇବର୍ଷ ଧରି ବନ୍ଦ ରହିବା ପରେ ଏଥର ପୂଜା ଧୁମ୍ଧାମ୍ରେ ପାଳନକୁ ନେଇ ସମସ୍ତେ ବେଶ୍ ଉତ୍ସାହ ଅଛନ୍ତି। ଭଦ୍ରକ ସହରର ସାଳନ୍ଦୀ ବାଇପାସ୍ଠାରେ ସାର୍ବଜନୀନ ଦୁର୍ଗାପୂଜା ଚଳିତବର୍ଷ ୧୪ ବର୍ଷରେ ପଦାର୍ପଣ କରିଛି। ରବିବାର ସକାଳ ୬ ଟା୩୦ରେ ସାଳନ୍ଦୀ ଘାଟରୁ ଘଟୋତ୍ତଳନ କରାଯାଇ ମଣ୍ଡପରେ ସପ୍ତମୀ ପୂଜା ଆରମ୍ଭ ହୋଇଥିଲା। ମୁଖ୍ୟ ପୂଜକ ପରମାନନ୍ଦ ପଣ୍ଡା ଓ ଭରତ କୁମାର ଦାଶଙ୍କ ଦ୍ୱାରା କଳସ ଯାତ୍ରା, ଘଟ ନବପତ୍ରିକା ପ୍ରବେଶ, ନ୍ୟାସ, ସ୍ନାନ ଉପଚାର, କୁଷ୍ମାଣ୍ଡ ବଳି, ଅଷ୍ଟମୀରେ ସନ୍ଧିପୂଜା, ହୋମ ଓ ଷୋଡ଼ଷ ଉପଚାର ପୂଜା ସହ ଚଣ୍ଡୀପାଠ ଆଦି ରହିଛି। ପଶ୍ଚିମବଙ୍ଗ କାରିଗରଙ୍କ ଦ୍ୱାରା ପଶ୍ଚିମବଙ୍ଗ ଶୈଳୀରେ ୧୦ ଫୁଟ ଉଚ୍ଚର ମା’ଙ୍କ ମୃଣ୍ମୟୀ ମୂର୍ତ୍ତି ସାଙ୍ଗକୁ ଗଣେଶ, କାର୍ତ୍ତିକ, ଲକ୍ଷ୍ମୀ ଓ ସରସ୍ବତୀଙ୍କ ମୂର୍ତ୍ତି ଆକର୍ଷଣୀୟ ହୋଇଛି। ବାଇପାସ୍ର ସମଗ୍ର ଅଞ୍ଚଳକୁ ରଙ୍ଗୀନ ଆଲୋକମାଳାରେ ସାଜସଜ୍ଜା କରାଯିବା ସହ ଲାଇଟ ଗେଟ୍ କରାଯାଇଛି। ରଙ୍ଗୀନ ଆଲୋକମାଳାରେ ବାଇପାସ୍ ବଜାର ଝଲସୁଛି। ସନ୍ଧ୍ୟାରେ ନୃତ୍ୟ ସଙ୍ଗୀତ କାର୍ଯ୍ୟକ୍ରମ ଓ ମା’ଙ୍କ ଦର୍ଶନ ପାଇଁ ରବିବାରଠାରୁ ଶ୍ରଦ୍ଧାଳୁମାନଙ୍କ ଭିଡ଼ ଲାଗିଛି। ନବମୀ ଓ ଦଶମୀ ସନ୍ଧ୍ୟାରେ ଭଜନ ସନ୍ଧ୍ୟା ଓ କୁନି ପିଲାମାନଙ୍କ ମଧ୍ୟରେ ନୃତ୍ୟ ପ୍ରତିଯୋଗିତା କାର୍ଯ୍ୟକ୍ରମ ଅନୁଷ୍ଠିତ ହେବ ବୋଲି କମିଟି ପକ୍ଷରୁ କୁହାଯାଇଛି। ଦଶହରାରେ ଦହି ପଖାଳ ଓ ଶାଗଭଜା ଏହି ପୂଜା ମଣ୍ଡପର ଅନ୍ୟ ଏକ ବିଶେଷତ୍ୱ। ହଜାର ହଜାର ଶ୍ରଦ୍ଧାଳୁ ଦହିପଖାଳ ଖାଇବା ପାଇଁ ଦଶହରାରେ ଭିଡ଼ ଲଗାଇଥାନ୍ତି।
ସ୍ଥାନୀୟ କେତେଜଣ ବରିଷ୍ଠ ନାଗରିକ ଏଠାରେ ପୂଜା ଆରମ୍ଭ କରିଥିଲେ। ପରବର୍ତ୍ତୀ ସମୟରେ ସାଳନ୍ଦୀ ନଗର, ଗୋପବନ୍ଧୁ ନଗର ଓ କାନ୍ତକବି ୩ କଲୋନୀର ବାସିନ୍ଦା, ରାଜଘାଟ ପୋଲଠାରୁ ଡାହାଣୀଗଡ଼ିଆ ପର୍ଯ୍ୟନ୍ତ ଥିବା ଦୋକାନର ବ୍ୟବସାୟୀମାନଙ୍କ ସହଯୋଗରେ ପୂଜାର କଳେବର ବୃଦ୍ଧି ହୋଇଛି। କୋଭିଡ୍ କଟକଣା ପରେ ଚଳିତବର୍ଷ ପୂଜାକୁ ନେଇ ୩କଲୋନୀର ବାସିନ୍ଦା ଓ ବ୍ୟବସାୟୀମାନେ ଉତ୍ସାହିତ ଅଛନ୍ତି। ପୂଜା କମିଟି ସଭାପତି ଗୋପାଳ ପ୍ରସାଦ ନାୟକ, ସମ୍ପାଦକ ଭବତୋଷ ଦାଶ, ଉପସଭାପତି ଅଶୋକ ଦ୍ୱିବେଦୀ, ସୂର୍ଯ୍ୟନାରାୟଣ ମହାନ୍ତି, ବିଶ୍ୱନାଥ ବାରିକଙ୍କ ନେତୃତ୍ୱରେ ପୂଜା ଆୟୋଜନ କରାଯାଇଛି। ଶାନ୍ତିଶୃଙ୍ଖଳା ରକ୍ଷା ପାଇଁ ଟାଉନ ପୋଲିସ ପକ୍ଷରୁ ବ୍ୟାପକ ବ୍ୟବସ୍ଥା ହୋଇଛି।
