ଅମରପାଲି,୪ା୧(ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ଉପଖଣ୍ଡର ହରିହର ଯୋର ଜଳସେଚନ ପ୍ରକଳ୍ପ (ଠେଙ୍ଗୋ ଡ୍ୟାମ)ଏକ ପ୍ରମୁଖ ପର୍ଯ୍ୟଟନସ୍ଥଳୀ। ଏଠାକୁ ପ୍ରତ୍ୟହ ଜିଲା ଓ ଜିଲା ବାହାରର ତଥା ରାଜ୍ୟ ବାହାରୁ ହଜାର ହଜାର ପର୍ଯ୍ୟଟକଙ୍କ ସମାଗମ ହୋଇଥାଏ। ଏହାସହିତ ଅନେକ ପିକନିକ ପାର୍ଟି ମଧ୍ୟ ଏଠାକୁ ବଣଭୋଜି କରିବାକୁ ଆସିଥାନ୍ତି। ସେମାନଙ୍କୁ ଆକୃଷ୍ଟ କରିବାକୁ ବିଭିନ୍ନ ପଦକ୍ଷେପ ନିଆଯାଉଛି। ପର୍ଯ୍ୟଟକଙ୍କ ନୌକା ବିହାର ପାଇଁ ବୋଟ ଆସିଛି। ମାତ୍ର ଏହା ଉଦ୍ଘାଟନ ଅପେକ୍ଷାରେ ରହିଛି। ତେବେ ଏହି ବୋଟକୁ କିଛି ଦୁର୍ବୃତ୍ତ ଭଙ୍ଗାରୁଜା କରିଥିବା ନେଇ ବୀରମହାରାଜପୁର ଥାନାରେ ନଂ ୨/୨୪ରେ ଏକ ମାମଲା ରୁଜୁ ହୋଇଥିବା ସୂଚନା ମିଳିଛି।
ସୂଚନା ଅନୁସାରେ, ଗତ ଜାନୁୟାରୀ ୧ ତାରିଖରେ ନବବର୍ଷ ଉପଲକ୍ଷେ ବହୁ ପର୍ଯ୍ୟଟକ ଭୋଜି କରିବା ପାଇଁ ଆସିଥିବା ବେଳେ କେତେଜଣ ଅସାମାଜିକ ଯୁବକ ନୌକା ବିହାର କରିବା ପାଇଁ ସମ୍ପୃକ୍ତ କର୍ମଚାରୀଙ୍କ ନିକଟରେ ଜିଦ କରିଥିଲେ। କର୍ମଚାରୀ ଜଣକ ମନା କରିବାରୁ ସେମାନେ ଗଣ୍ଡଗୋଳ କରି ଫେରିଥିଲେ। କିନ୍ତୁ ସନ୍ଧ୍ୟା ସମୟରେ କେହି ନ ଥିବାର ସୁଯୋଗ ନେଇ ସେମାନେ ବୋଟର କାଚ ଭାଙ୍ଗିବା ସହ ବୋଟର ଅନେକାଂଶ କ୍ଷତି କରିଥିବା ନେଇ ବୀରମହାରାଜପୁର ଥାନାରେ ଦାୟିତ୍ୱରେ ଥିବା ବନରକ୍ଷୀ ରଘୁମଣି ଭୋଇ ଲିଖିତ ଅଭିଯୋଗ କରିଛନ୍ତି। ଅଭିଯୋଗ ଅନୁସାରେ ଠେଙ୍ଗୋ ଡ୍ୟାମ ନିକଟସ୍ଥ ସାଗଜୁରି ଗ୍ରାମର କେତେଜଣ ଯୁବକ ବୋଟ ଭାଙ୍ଗିଥିବା ନେଇ ସେ ଅଭିଯୋଗ ପତ୍ରରେ ଉଲ୍ଲେଖ କରିଛନ୍ତି। ହରିହର ଯୋର ଫାଣ୍ଡି ଅଧିକାରୀ ଏଏସଆଇ ଅରକ୍ଷିତ ମାଝି ଏନେଇ ଅଧିକ ତଦନ୍ତ ଜାରି ରହିଛି ଏବଂ ବୋଟ ଭାଙ୍ଗିଥିବା ଅଭିଯୁକ୍ତମାନଙ୍କୁ ଶୀଘ୍ର ଧରାଯିବ ବୋଲି ପ୍ରକାଶ କରିଛନ୍ତି। ଉକ୍ତ ଘଟଣାକୁ ଅଞ୍ଚଳରେ ତୀବ୍ର ନିନ୍ଦା କରାଯାଇଛି। ସୂଚନା ଯୋଗ୍ୟ ଠେଙ୍ଗୋ ଡ୍ୟାମରେ ଆବଶ୍ୟକ ଠାରୁ କମ କର୍ମଚାରୀ ଥିବାରୁ ନବବର୍ଷରେ ମଧ୍ୟ ଏଠାରେ ପାଟ୍ରୋଲିଂ ଠିକରେ ହୋଇ ନ ଥିବା ସ୍ଥାନୀୟ ଲୋକେ ଓ ପର୍ଯ୍ୟଟକମାନେ ଅଭିଯୋଗ କରିଛନ୍ତି।
