ଚାନ୍ଦବାଲି,୧୦।୫(ଡି.ଏନ୍.ଏ.): ବାତ୍ୟା ‘ଅସାନି’ ପ୍ରଭାବରେ ଉପକୂଳବର୍ତ୍ତୀ ଅଞ୍ଚଳରେ ୪୦ରୁ ୫୦ କି.ମି ବେଗରେ ପବନ ବହିବା ସହ ପ୍ରବଳରୁ ଅତି ପ୍ରବଳ ବର୍ଷା ହେବ ବୋଲି ପାଣିପାଗ ବିଭାଗ ପକ୍ଷରୁ ଆକଳନ କରାଯାଇଛି। ଏପରି କି ଧାମରା ସମେତ ବିଭିନ୍ନ ବନ୍ଦରରେ ସତର୍କ ସୂଚନା ଜାରି କରାଯାଇଛି। ସମୁଦ୍ର ଭିତରକୁ ନ ଯିବାକୁ ମତ୍ସ୍ୟଜୀବୀଙ୍କୁ ବାରଣ କରାଯାଇଛି। ହେଲେ ଆଗକୁ ପୂର୍ଣ୍ଣିମା ଥିବାରୁ ସମୁଦ୍ର ଅଶାନ୍ତ ରହିବ। ଉଚ୍ଚ ଲୁଣାଢେଉ ଉଠିବାର ସମ୍ଭାବନା ରହିଛି।
ଫଳରେ ଚାନ୍ଦବାଲି, ଧାମରା, ଆର୍ଡି ଅଞ୍ଚଳ ଦେଇ ପ୍ରବାହିତ ହେଉଥିବା ବୈତରଣୀ, ମନ୍ତେଈ, ସାଳନ୍ଦୀ ନଦୀର ପାଣି କୂଳ ଉଛୁଳିବା ସହ ଲୁଣା ପାଣି ଚାଷ ଜମିରେ ମାଡିବାର ସମ୍ଭାବନା ରହିଛି।
ଅନ୍ୟପକ୍ଷେ ଭଦ୍ରକ ଜିଲାପାଳଙ୍କ ପକ୍ଷରୁ ବତ୍ୟା ମୁକାବିଲା ନିମନ୍ତେ ଚାନ୍ଦବାଲି ବ୍ଲକ ପ୍ରଶାସନ ସହ ଆଲୋଚନା କରିଛନ୍ତି। ସମୁଦ୍ର ଓ ନଦୀ ତଟବର୍ତ୍ତୀ ଅଞ୍ଚଳରେ ବସବାସ କରୁଥିବା ଲୋକଙ୍କୁ ଆବଶ୍ୟକ ସ୍ଥଳେ ନିରାପଦ ସ୍ଥାନକୁ ସ୍ଥାନାନ୍ତରିତ କରିବାକୁ ପରାମର୍ଶ ଦେଇଛନ୍ତି। ଏପରି କି ଗ୍ରାମାଞ୍ଚଳ ଓ ବିଜ୍ଞାପିତ ଅଞ୍ଚଳରେ ସମସ୍ତ ସ୍କୁଲ, ବାତ୍ୟ, ଆଶ୍ରୟସ୍ଥଳକୁ ପ୍ରସ୍ତୁତ ରଖିବା ସହ ଆଲୋକ, ପାନୀୟଜଳ ବ୍ୟବସ୍ଥା ପାଇଁ ଆର୍ଲଟ କରାଯାଇଛି। ମାଛ ମାରିବା ପାଇଁ ସମୁଦ୍ର ଓ ନଦୀକୁ ଯାଇଥିବା ମତ୍ସଜୀବୀମାନେ ବାତ୍ୟାର ଖବର ପାଇବା ପରେ ଡଙ୍ଗା, ମଟରଚାଳିତ ବୋଟ୍, ଟ୍ରଲର ଆଦିକୁ କୂଳକୁ ଆଣିବା ସହ ଲଙ୍ଗର ପକାଇଛନ୍ତି। ଏନେଇ ବିଡିଓ ଜ୍ୟୋତି ବିକାଶ ଦାଶଙ୍କୁ ପଚାରିବାରୁ ବାତ୍ୟାର ମୁକାବିଲା ପାଇଁ ପ୍ରଶାସନ ପ୍ରସ୍ତୁତ ରହିଛି। ଏନେଇ ୨୬୮ ଅସ୍ଥାୟୀ ଆଶ୍ରୟସ୍ଥଳୀ ପ୍ରସ୍ତୁତ କରାଯାଇଛି। ଏପରି କି ଓସ୍ଡମା ପକ୍ଷରୁ ମଧ୍ୟ ୨୯ଟି ବାତ୍ୟା ଆଶ୍ରୟସ୍ଥଳ କରାଯାଇଥିବା ବେଳେ ରେଡକ୍ରସ ପକ୍ଷରୁ ୯ଟି ଆଶ୍ରୟସ୍ଥଳ ପ୍ରସ୍ତୁତ ରଖାଯିବ ସହ କର୍ମଚାରୀଙ୍କୁ ସଜାଗ କରାଯାଇଥିବା ସେ କହିଛନ୍ତି।
