ମହାକାଳପଡ଼ା,୧୯ା୧(ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳ ଖରିନାସୀ ଅଞ୍ଚଳରେ ବିଦେଶୀ ପ୍ୟାସନ୍ ଫଳ ବା ଭାରତୀୟମାନେ କହୁଥିବା କ୍ରିଷ୍ଣା ଫଳ ଚାଷ ହେଉଛି। ଏହା ଶରୀର ପାଇଁ ଖୁବ୍ ଉପକାରୀ। ଏହି ଫଳକୁ ଜୁସ୍ କରି ପାନୀୟ ରୂପେ ବ୍ୟବହାର କରାଯାଏ। ତେବେ ଖରିନାସୀ ଅଞ୍ଚଳର ଚାଷୀ କଲ୍ୟାଣ ରାୟ କୋଲକାତା ଅଞ୍ଚଳର ବନ୍ଧୁଙ୍କଠାରୁ ଚାରା ମଗାଇ ବାଡ଼ିରେ ଏହି ଫଳ ଚାଷ କରିଥିଲେ। ଏହି ଗଛ ଲତା ଜାତୀୟ। ସାଧାରଣତଃ ଏହି ଫଳ ଶୀତଦିନଠାରୁ ଖରାଦିନ ପର୍ଯ୍ୟନ୍ତ ଫଳିଥାଏ। ଫଳଗୁଡ଼ିକ ଭାରି ବାସ୍ନା ଓ ସୁଆଦିଆ। ଏହାକୁ ପାନୀୟ ଜଳରେ ଚିନି ଓ ଲୁଣ ମିଶ୍ରଣ କରି ପିଇଥାନ୍ତି। ଏହି ଫଳ ମୂଳତ ଦକ୍ଷିଣ ଆମେରିକା, ଦକ୍ଷିଣ ବ୍ରାଜିଲ, ପାରାଗୁଆ ଓ ଆର୍ଜେଣ୍ଟିନା ଆଦି ଦେଶ ସହ ଭାରତର ହିମାଚଳପ୍ରଦେଶ, ଉତ୍ତରାଖଣ୍ଡ, କଶ୍ମୀର, କେରଳ ସମେତ ବିଭିନ୍ନ ଥଣ୍ଡା ଜଳବାୟୁରେ ଫଳିଥାଏ। ଓଡ଼ିଶାର ପଶ୍ଚିମାଞ୍ଚଳରେ ଏହା ଚାଷ ହେଉଥିବା ଜଣାପଡ଼ିଛି। ଭାରତର ଦିଲ୍ଲୀ, ବାଙ୍ଗାଲୋର, କୋଲକାତା, ହାଇଦ୍ରାବାଦ, ମୁମ୍ବାଇ ଆଦି ସମେତ ବଡ଼ ବଡ଼ ସୁପର ମାର୍କେଟ ତଥା ମଲ୍ଗୁଡ଼ିକରେ ବିକ୍ରିହେବା ସହ ଅନ୍ଲାଇନରେ ମଧ୍ୟ ବିକ୍ରି ହେଇଛି। ଏହାକୁ ସେବନ କଲେ ଶରୀରରେ ପ୍ରଚୁର ପରିମାଣରେ ଭିଟାମିନ ଅଭାବ ପୂରଣ କରିଥାଏ। ଯଥା ଚର୍ମରୋଗ, କେଶ ଝଡ଼ିବା, ଡାଇବେଟିସ, ଚର୍ବି କମାଇବା ଆଦି ସମସ୍ୟା ଦୂର କରାଏ ବୋଲି କୁହାଯାଇଛି। ଅପରପକ୍ଷରେ ଏହି ବିଦେଶୀ ଫଳ ଚାଷକରି ଖରନାସୀ ଗଁାର କଲ୍ୟାଣ ନିଜର ପରିଚୟ ସୃଷ୍ଟି କରିଛନ୍ତି। ଏହି ଫଳକୁ ନେବା ପାଇଁ କଲ୍ୟାଣଙ୍କ ବାଡ଼ିରେ ବିଭିନ୍ନ ରୋଗୀ ପହଞ୍ଚୁଛନ୍ତି। ଏହି ଚାଷ ଜୈବିକ ପଦ୍ଧତିରେ ଯତ୍ନର ସହ ଚାଷ କରୁଥିବା ସେ କହିଛନ୍ତି। ଏହା ୨ କିସମ ଯଥା କମଳା ଓ ସବୁଜ ରଙ୍ଗର ରହିଛି ବୋଲି ଚାଷୀ ରାୟ କହିଛନ୍ତି।
